Read Karbi 2 PHURKIMO 9 Bible Online

2 PHURKIMO 9 - Karbi bible

2 PHURKIMO 9

¹Solomon Recho anong Sheba a-Kungripi arjulong-lo, lapen bangpi alangliphan karsik akarju pen asat kelangjisi Jerusalem anat damlo. Bangpi along ongdung karjudun asong chepon-olo, lapen mosala-heihei, kepang-e adorson lapen ongdung aser ka-ut athak arthangponlo. Bangpi lapen Solomon kechetong ahut la kematha un karjunangji ason an arju-et-lo.

²Alangli kedo-an akarjuta thakdun-et-lo, alangliphan lahei kethakdunji thangnat akesungta avedet-lo.

³Solomon abidi alam Sheba a-Rechopi arjulong-lo, lapen la kekim arechohem thek-long-lo.

⁴Ankecho atebul along kecho ason-heihei kevanpi, la aban atum kedo ahem, rechohem kam keklem asong, lapen halatum kechingthang ateng isi apindeng, la an kecho along kehon aban apindeng, lapen Kardomhemthepi along la kepi athok-heihei an bangpi thek-long-lo. Lahei bangpi aphan achethepi pavangphunlo lapen pamong-loilo.

⁵Recho aphan bangpi pulo, “Neli det nanglilam karjulong lapen nangli bidi alam ahok-lo!

⁶Halatum neliphan kethan alam neli methang mek-hini pen thek-longvekvetik ke neli kroimolo. Nangli bidi ebeng anat neli arjulong-lelang. Rat atum kechethan apar nangli remulang.

⁷Nangliphan kangduk atum akopai kemelo, latum nangli ingno kaike dolongverlo lapen nangli bidi-heihei alam karjulong avarsai long-lo!

⁸Nangli Arnam HEMPHU aphan chorolo! Nangliphan recho nangkebat pen ajok la nangliphan ko-an aning ingsamloma la paklang-lo, alangli men pen kepangriji aphan, pima la amethangsi arat Israel aphan chinghon-o-lo lapen kaiketa halatum aphan kepadoverji aninghang, halatum aphuthak nangliphan recho bat-lo anke nangli aron lapen ahok-akangsai klem unpo.”

⁹Solomon Recho aphan kevanpi adan-heihei bangpi pajirlo: lin suriphli an sose aser lapen ongdung amosala-heihei, kechingthang adorson-heihei Solomon Recho aphan Sheba a-Rechopi kepi amosala asonthot akeme nahokta avelang.

¹⁰(Hiram Recho amonit atum lapen Solomon Recho amonit atumta Ophir pen ser vanpilo, lapen Juniper athengpi lapen pindeng adorson-heihei ta vanpilo.

¹¹Thengpi ke Kardomhemthepi lapen rechohem kangtuimuchot angdeng aphan Solomon enlo, lapen kumbeleng-heihei lapen kumbeleng chongdeng-heihei lunse atum aphan enpilo. Judah adet angbong aphrang lapuson thek-longle pinlang.)

¹²Sheba a-Kungripi kehang asontin Solomon Recho pidunlo. Lake laphan bangpi kevanpi adan-heihei alar apar akelesi kepidunlo. Ansi bangpi lapen la along karjudam atum pen pen Sheba adet chedamthulo.

¹³Solomon Recho aningkanvang ta lin suri ingkoira kethom aser long,

¹⁴la beha keklem lapen behapi keklem atum kepi amidu pen apar salajongsi long-lo. Arab arecho atum lapen Israel adang a-Govornor atum laphan rup lapen ser-heihei vanpilo.

¹⁵Solomon 200 achongpi selamlo, asitinta kethenghet aser lin 7 topdunlo,

¹⁶lapen 300 achongso selamlo, apaktin along lin-thom kethenghet aser pen top-lo. Lahei la Lebanon a-Ingnam pu a-Hem along si bilo.

¹⁷Lapen Solomon akethe a-Recho anghoi ingnar aso pen selamsi ajukave aser pen top-lo.

¹⁸Recho anghoi akam throk do, lapen la penpen kechera-phet recho anghoi ser akeng anghoi do. Lapen anghoi hi hi ari do, lapen ari akung hingho jonni akumlin do.

¹⁹Lapen ha kamthrok athak hihi jonthrok throk hingho akumlin do, atheke, jonkrehini parjap-lo. Lapen nahok adet dam seta lason keselam hingho akumlin ave.

²⁰Solomon Recho aharlung an ser pensi keselam, lapen Lebanon a-Ingnam a-Hem arlo kebi aphule-phukok-heihei ta aju-kavepin aser pensi keselam. Solomon arni rup ke adorkeso amarlo pupe.

²¹La talopi kedam atelongpi-heihei do, lahei Hiram Recho atelongpi pensi damrappet. Ningkan kethom aphi la atelongpi ser, rup, ingnar aso, thero lapen misang-heihei vanpilo.

²²Solomon Recho ke pirthe akaprek arecho apar plangmu lapen remu.

²³Alangliphan Arnam kepi abidi alam kechinijisi laphan arjupet-lo.

²⁴Abangphutin ta Solomon aphan dan-heihei, rup, ser lapen ser ahormu, pe-choi, risim-heihei, mosala-heihei, losei, lapen gadha-heihei vanpilo. La aningkanvangta dolo.

²⁵Solomon Recho alosei lapen ronhemkonglong aphan hum 4000 aroi dolo, lapen ron alosei kardon atum bang suri krehini do. Lahei ajehak ke Jerusalemsi bilo, lapen ahin an ke along kaprek arongsopi-heihei si bilo.

²⁶Recho kedo-an angbong la det pangrithekneilo, Euphratis Aroi alongri pen ha Philistia lapen Ijip ahoi an.

²⁷La recho kecho ahut Jerusalem along rup ke arlong ason nahoktado, lapen kedar athengpi dorphlup si Judah along akeng-ri-heihei a-ingle arong ason rikcholo.

²⁸Musri lapen akaprek adettin pen Solomon losei vanlo.

²⁹Solomon aphurkimo ahin kecheng pen ha kejut an Nathan montri a-Phurkimo, Shiloh Ahijah kemontri lapen Iddo Montri akethek-long, la along Israel arecho Jeroboam recho-kecho alam-heihei ta tok-lo.

³⁰Israel aphuthak Solomon ningkan 40 pangrilo.

³¹La thi-lo, lapen la asopo Rehoboam si la alar recho cholo.