Read Karbi EZRA 3 Bible Online

EZRA 3 - Karbi bible

EZRA 3

¹Throksi achiklo, Israel arat atum halatum amethang arongsopi-heihei along chedorep-lo. Ansi halatum Jerusalem along chingrumpet-lo,

²lapen Jehozadak asopo Joshua lapen Shealtiel asopo Jerubbabel, la adon arap penpen Israel a-Arnam adovan kimthulo, lasi halatum Arnam amonit, Moses ketok aron ateng pen la aputhak kephrin athok pilongpo.

³Nangkechevoi bankedam atum kedobomlang arat aphan pherelo, seta halatum aphrang kedo adimthotsi dovan kimthulo. Ansi halatum adap lapen arnikangsam akephrin athok la aputhak chemitmepin pen phrin longverlo.

⁴Latum Chepachong Achojun amei aron ateng pen talon ponlo; arnivang halaso arni aphan akenangsot athok halatum pilo;

⁵lapen la apar ta halatum chemitmepin athok kephrin etji lapen chiklokemi achojun ahut athok lapen kaprek chemitmepin akechingrum ahut HEMPHU aphan karcho lapen HEMPHU aphan aninghang aling kepi adan-heihei do-anta thok-lo.

⁶Rat atum Kardomhemthepi kekim chengthujilang seta, throksi achiklo kecheng arni halatum HEMPHU aphan kephrin athok-heihei pi pangcheng-lo.

⁷Longrokbang lapen kimbang atum aphan kepinangji atangka rat atum chepilo lapen an, lang pilo lapen Lebanon pen kedar athengpi kevanjisi kelarji aphan jit ajangthu Tair lapen Sidon arongsopi lodet-lo, lahei Joppa along talo pensi vanpo. La kedo-an akam Parsi arechokethe Sairas pen hukum hangnangji.

⁸Lasi halatum Jerusalem Kardomhemthepi along ban kedampen kevang aningkan hini achiklo si kam klem pangcheng-lo. Jerubbabel, Joshua lapen halatum arong asor kedo-an, kurusar atum, lapen Levi atum ahokpet pen pulote kedo-an ban kedam pen Jerusalem kevang atum an, kam cheto dunlo. Levi atum ningkan ingkoi arta mate ake-ong atum Kardomhemthepi kekimthuji aphan arpu pilo.

⁹Levi aso Joshua lapen alangli sopo, adon-arap atum, lapen Kadmiel lapen asomar (Hodaviah aro) Kardomhemthepi kekim arpu enlo. (Latum aphan Henadad aro a-Levi atumsi raplo.)

¹⁰Monit atum Kardomhemthepi ahemthur kekim kepangcheng ahut kurusar atum halatum apindeng chingthang pamesi abangphutinta pong-ut ot-repsi adim chedolo, lapen Asaph aro a-Levi atum prakso-heihei otsi arjap-lo. David recho arni kethantang atengsi latum HEMPHU aphan rolo.

¹¹Ruibomsi latum HEMPHU akero alun lunlo: HEMPHU mesen lapen Alangli kanghon Israel aphan kaiketa dover. Anut-tinta un an hang-lo, HEMPHU aphan rolo, pima hemthur akam chengtang-lo.

¹²Ongdung akurusar, Levi atum lapen arotin akejalin atum Kardomhemthepi kethek-longcheng-lo lapen la Kardomhemthepi ahemthur kecham akam kelangbom un ahut latum chiru lapen charnap lo. Bonta ajehak atum ke chehoksi hangjolo.

¹³Baduta kechehok lapen kechiru ase pangthek thekthedet-lo, pima halatum pu-an ase pathelo la heloving anta arjulongji.