Read Karbi EZRA 4 Bible Online

EZRA 4 - Karbi bible

EZRA 4

¹Judah arat lapen Benjamin arat ahotur atum arjulong-lo, atheke bankedam pen nangkechevoi atum Israel a-Arnam HEMPHU a-Kardomhemthepi kekimthulo.

²Lasi latum Jerubbabel lapen aro-heihei ajalin abangphu atum aphan kechehangjisi damlo, lapen pulo, “Netum aphanta Kardomhemthepi kekim nangpachelang longtha. Nangtum karcho Arnam inut nat aphansi netumta archolo, lapen Assiria arechokethe Esarhaddon dak netum aphan kepadotoi arni pen netum athok-heihei alangliphan pibomlo.”

³Jerubbabel, Joshua lapen aro-heihei ajalin atum halatum aphan thak-lo, “Netum a-Arnam HEMPHU a-Kardomhemthepi kekimji aphan nangtum akerap netum nangne. Sairas, Parsi arechokethe ahukum ateng netum aphan kepi asonsi netum methangsi la kimdetpo.”

⁴Ansi kedo barim arat atum Judia atum aphan aningpabilo lapen hem pakimkedetjisi pappherelo.

⁵Parsi asorkar kepangri atum Judia atum abe-kepathurjisi halatum rosopot pilo. Laso akam latum Sairas lapen Darias recho kechobom ahut anta klembomlang.

⁶Rechokethe Ahasuras recho kechocheng aningkan, Judia lapen Jerusalem kedo-an arat ahotur atum abethursi bok-lo.

⁷Puthot Artaserses, Parsi arecho-kethe ahut Bishlam, Mithredath, Tabeel lapen halatum kam-klemrap-rap atum rechokethe aphan isi aloh tok-lo. Loh Aramaik alam pensi tok-lo lapen keporhe ahut lam larnang-lo

⁸Lapen Rehum, la govornor lapen Shimshai lake longri achunbang, Jerusalem aputhak Artaserses aphan lasonsi tok-lo.

⁹Rehum govornor pen, Shimshai, longri achunbang pen latum kam klemrap-rap atum penpen, kangsai atum lapen Erek asor, Bebilon asor, lapen Elam adet Susa asor kepangri atum pen,

¹⁰kethenei lapen kangtangnei Ashurbanipal amethang ahem pen Samaria lapen adung-arei Nichi a-Euphratis alongri kepadotoi arat atum penpen.

¹¹La helo ketok aloh alam: Rechokethe Artaserses aphan aloh, alangli ban atum, Nichi a-Euphratis amonit atum pen.

¹²Nelitum recho aphan kepachini kangtung alam la helo, kaprek alongri-heihei pen dak kevang a-Judia atum Jerusalem along nangdolo lapen hala bang abe-kethurver arongsopi kimthutang-lo. Halatum apaisong-heihei kekimthu chengtang-lo, lapen paplengdappo.

¹³Rechokethe, laso arongsopi jongsi kimthulote lapen la apaisong tang-lote, laso arat atum midu-heihei pipedetji, lapen nangli midu kelongji kamkedetpo.

¹⁴Non, pima nelitum anta nanglibersi do lapen nelitum lapuson kepaplangji ingtungte, lasi nelitum choningrilo,

¹⁵Nangli phusar atum kebi alam-heihei kepariji hukum pinon. Nangli klemlote labangso arongsopi kaita bang abe-thurver lapen hako ahut penta recho atum lapen kepangri atum aphan pasungverlo, pu thek-longpo. Labangso arat aphan kepangri kaita sung-o. La apotsi bangso arongsopi kepavir nang-lo pu chinipo.

¹⁶Lasi nelitum chinilorlo, laso arongsopi lapen la apaisong jongsi kimtang lote, recho, nangli Nichi Euphratis alongri kepangri sungkrungji.

¹⁷Recho kethe labangso alam thak-lo: Rehum, govornor aphan, Shimshai, longri achunbang aphan lapen alangli kam klemrap-rap Samaria lapen Nichi a-Euphratis kedo-an aphan kardom.

¹⁸Nanglitum nangkelo aloh lamlar si neli ingno paporhelo.

¹⁹Neli kepariji hukum pitang-lo lapen labangso alam long-lo, latum hako ahut penta Jerusalem ke recho alam kroikreverlo lapen la kaita abe-thurversi kepasung abang cheplang-lo.

²⁰Kangtangnei arecho laso a-Nichi a-Euphratis alongri aputhak pangrilo lapen midu-heihei ta rung-lo.

²¹La apotsi nangtum latum amonit aphuthak ne pen hukum-heihei longletik rongsopi kekimthu akam kepasangji aphan hukum pinon.

²²La non amat klemnon, ansi ne kam-heihei aputhak thang akesung avedetpo.

²³Labangso aloh Artaserses pen Rehum, Shimshai lapen halatum kam klemrap-rap atum aphan porhedet aphi, latum Jerusalem anat damphit-lo lapen Judia atum aphan rongsopi kekimthu akam jakong pen pasangkok-lo.

²⁴Darias, Parsi arechokethe recho kecho hini aningkan nangleletik Kardomhemthepi kekim akam sangkok-lo.