Read Karbi EZRA 5 Bible Online

EZRA 5 - Karbi bible

EZRA 5

¹Halabangso ahut banghini amontri lake Haggai lapen Zakariah, Iddo asomar, Israel a-Arnam amen pen Judah lapen Jerusalem along kedo a-Judia atum aphan kemontri pang-cheng-lo.

²Shealtiel asopo Jerubbabel lapen Jehozadak asopo Joshua latum abirta arjulong-lok pen latum Kardomhemthepi Jerusalem along kekimthuji aphan cheng-lo lapen la banghini amontri atum halatum aphan rapdunlo.

³Menmen asonsi Nichi a-Euphratis a-Govornor, Tattenai, Shethar-Bozenai, lapen halatum kam klemrap-rap atum Jerusalem vangsi pulo, “Komatsi nangtum aphan labangso a-Kardomhemthepi kekimji lapen kepaplengji ahukum ketholo?”

⁴Halatum Kardomhemthepi kekim kerap dun atum an amonit amen hang-lo.

⁵Bonta Judia asongja aphuthak Arnam langkribom, lapen Parsi achakri atum Darias aphan loh toktetik lapen alangli pen kethak longletik ke thang panonelo pusi chesik rong-lo.

⁶Rechokethe aphan ketok kelong alam lahelo:

⁷Darias rechokethe aphan, nangli ningkangsam pen pangri-longnang.

⁸Nangli recho kechininangji alam ke la helo, nelitum Judah alongri damlo lapen Arnam kethe Kardomhemthepi arlongpi pen kekimthu lapen arpong athak kapat kepangni thek-long-lo. Labangso akam klempamesi penang an klemtang-lo.

⁹Rat kejalin atum aphan komatsi Kardomhemthepi kekimthuji lapen kepaplengji ahukum kepima pu nelitum aphan nethantha pusi arjulo.

¹⁰Labangso akam along kechetodun asongja atum aphan nangli kepachini thekji aphan amen anta arjulo.

¹¹Halatum nethak-lo, “Netum ke pirthe lapen sining a-Arnam aban lapen netum Kardomhemthepi kekimthu ke Israel arecho kang-tangnei abang aphrang kekimthot adimsi non kekimthulo.

¹²Bonta netum aphusar atum Sining Arnam aphan aning pathihak amatsi Chaldia akhei inut arecho, Bebilon a-Nebukadnezzar, Arnam halatum aphan patengkheng long-lo. Kardomhemthepi pavirdet-lo, lapen rat aso aphan Bebilon adet ban pondet-lo.

¹³Ansi Bebilon arechokethe Sairas recho kecho kecheng aningkan, Sairas Kardomhemthepi kekimthujisi hukum-heihei tholo.

¹⁴Alangli Kardomhemthepi aser, arup ajohton-heihei Nebukadnezzar, Jerusalem along a-Kardomhemthepi pen kepontang ason lapen Bebilon akardom ahem along kebitang ason an pavoithulo. Lahei ajohton Judah a-Govornor Sheshbazzar pu amen arideng Sairas hodailo.

¹⁵Rechokethe alangliphan hala-hei paponsi Jerusalem along Kardomhemthepi along kevoithuji lapen kardomhemthepi aphrang keparjap adimthot kekimthuji aphan pulo.

¹⁶Lasi Sheshbazzar vang-lo lapen ahemthur elo; halabangso arni pen kekim akam nonta klembomlo, bonta Kardomhemthepi kekim tangtelang.”

¹⁷Non la jongsi recho aphan aningpadok-lo pulote Sairas Recho labangso a-Kardomhemthepi Jerusalem along kekimthuji aphan hukum-heihei pitang-loma pipelangma alam kechiniji aphan Bebilon along ketok-kebi along parilonang, anle nanglining kehang kopima nelitum aphan pachinithunon.