Read Karbi EZRA 6 Bible Online

EZRA 6 - Karbi bible

EZRA 6

¹Lasi Bebilon along ketoktang kebi alam-heihei kepariji aphan Darias rechokethe hukum-heihei pilo.

²Bonta la Ekbatana pu arongsopi Media alongri bangso aloh athui long-lok-lo, kebi alam lahei helo:

³Sairas rechokethe recho kecho kecheng aningkan Kardomhemthepi aphrang athok kepi adim lapen kephrin adan-heihei kepi adim Jerusalem along kepakimthuji aphan hukum pilo. Kardomhemthepi kangtui ingrup throk-kep, lapen arpan ingrup throk-kep nangji.

⁴Arpong ke arlong pharthom athaktin kapat athengpi ephar donangji. Kenangji an akhorot recho akhipuru pen padam nangji.

⁵Lapen ke ser, rup ajohton-heihei recho Nebukadnezzar, Jerusalem Kardomhemthepi pen Bebilon kevan amar anta Jerusalem Kardomhem along lahei aphrang adimthot voithu-et nangji.

⁶Ansi Darias aber ketok alam thak-lo: Nichi a-Euphratis a-Govornor, Tattenai, Shethar Bozenai, lapen nanglong kam klemrap-rap ari atum Nichi a-Euphratis asor. Kardomhem pen chepahelo non

⁷lapen la kekim akam along khamkheduntap-ri. Judah a-Govornor lapen Judia asongja atum Arnam Kardomhem aphrang adimthot pakimthunang.

⁸Neli nangliphan hukum pilo, la kekimthujile halatum aphan nang rapdunnon. Kam kesangsedetjile Nichi a-Euphratis along kerung pen kelong amidu recho apuru-heihei pen prapjin pen halatum akhorot pinangji.

⁹Arni arni pachimitmepin kurusar atum Jerusalem along halatum amar nangphan nangkehang an pidun nangji. Chainong asomar, biresak mate biresak asomar, Sining Arnam aphan kephrin-i athok-heihei mate thengthe, ingti, drakha ahorlang mate jit ajangthu jokta pinangji.

¹⁰La keklem nangji atheke halatum sining a-Arnam kedengme athok-heihei kepi thekji lapen ne lapen nesomar aphuthak alangli ahirjume kedoji aphan ardompo.

¹¹Ne puthot hukum pilo, mane jongsi labangso ahukum kekroikre abangphan ahem akapat sanjoksi, angchun pangchim pamepo lapen abang kronglutpo. Lapen la ahem paruhappo.

¹²Jerusalem along keparchoji aphan kechingvaitang a-Arnamle laso ahukum kepinrem lapen Kardomhem kepavirji pu kebor-i arecho mate adet aphan pavirnang, ne Darias si laso ahukum kepilo. La kadokaveta kroipet nangji.

¹³Ansi Tattenai govornor, Shethar Bozenai, lapen halatum keklem-rappet ari atum rechokethe ahukum kepitang atengthot klemlo.

¹⁴Judia asongja atum rechokethe kardomhem kekim pachun long-olo, atheke Haggai lapen Jekaariah montri atum aning keparungdun apot. Halatum aphan Israel Arnam lapen Sairas, Darias lapen Artaserses Parsi arechokethe atum hukum kepi ateng Kardomhemthepi paplengdet-lo.

¹⁵Latum Darias rechokethe throk aningkan recho kecho ahut Adar achiklo kethom arni Kardomhemthepi papleng-lo.

¹⁶Ansi Israel arat atum, kurusar atum, Levi atum lapen kedo-an ban kedampen nangkechevoi-tang atum aning arong pen Kardomhem hodailo.

¹⁷Kehodai aphan halatum jon 100 achainong alo, jon 200 abiresak, jon 400 abiresak aso kethokji aphan dan-heihei pilo, lapen bi jon 12 pap athok aphan, Israel arotin aphan ejon jon pilo.

¹⁸Halatum kurusar lapen Levi atum Jerusalem Kardomhem along kepaklemji aphan bat-lo, Moses aloh along kethan ateng-lo.

¹⁹Kecheng achiklo, 14 arni, ban kedam pen kechevoi arat atum Kejok Amei talonlo.

²⁰Kurusar kedo-an lapen Levi atum kedo-an chepangthirlo lapen aron ateng pen ingthir-et-lo. Kechevoitang arat aphan kurusar lapen amethang aphan Kejok Amei kethokjisi Levi atum pi-heihei that-lo.

²¹Kedo-an Israel ban kedam pen kechevoi atum, lapen kedobom arat kaprek arnam kardomthap ke-o atum lapen Israel a-HEMPHU aphan karchojisi kevang atum ansi kethok adan-heihei chopet-lo.

²²Halatum ni throksi an thap-kave ahim achojun amei talonlo. Halatum aning arongpik-lo, pima HEMPHU Assiria a-Rechokethe aphan aning parungsi halatum Israel a-Arnam a-Kardomhemthepi kekim anat alangli chetodunlo.