Read Karbi EZRA 7 Bible Online

EZRA 7 - Karbi bible

EZRA 7

¹Ongdung aningkan aphi, Artaserses, Parsi arechokethe recho kecho ahut Ezra pu amen inut amonit dolo. Alangli phusar angthun ha Aaron kurusarpo an ingthumlo: Ezra ke Seraiah asopo, la Azariah asopo, la Hilkiah asopo,

²la Shallum asopo, la Zadok asopo, la Ahitub asopo,

³la Amariah asopo, la Azariah asopo, la Merioth asopo,

⁴la Zerahiah asopo, la Uzzi asopo, la Bukki asopo,

⁵la Abishua asopo, la Phinehas asopo, la Eleazar asopo, la Aaron asopo.

⁶Ezra inut loh ketok abang, lapen Israel atum a-Arnam, Moses pen kepi HEMPHU aron kethekpame abang-lo. Pima Ezra a-Arnam HEMPHU ahirjume alangli phuthak dolo, lasi kehang aling govornor ta alangliphan pilo.

⁷Artaserses throksi aningkan recho kecho ahut Ezra Bebilon pen Jerusalem anat esong Israel arat pen damlo laso along kurusar atum, Levi atum, Kardomhem alunse atum, Kardomhem kehon atum, lapen kam keklem atum do.

⁸Kecheng achiklo, kecheng arni si halatum Bebilon otekang-lo,

⁹lapen Arnam akerap pen latum pho achiklo, kecheng arni Jerusalem nanglelo.

¹⁰Ezra HEMPHU aron-heihei lapen kekroinangji ason-heihei Israel arat aphan kethanjisi alangli akai chepidet-lo.

¹¹Artaserses aber ketoktang kebi ason kurusar lapen tok-bang, Ezra aphan pilo, alangli ke Israel atum aphan HEMPHU kepi aron lapen hukum-heihei aputhak kethekpame abang-lo:

¹²Rechokethe Artaserses pen Sining Arnam aron ketok abang kurusar Ezra aphan.

¹³Ne hukum pilo, nedet angbong kedo-an Israel arat, kurusar atum lapen Levi atum aningkehang abang aling nanglong Jerusalem nangpadun nang.

¹⁴Ne pen bang 7 thanpare atum Jerusalem lapen Judah kopusonloma kelangji aphan nangliphan nangtoilo, nang Arnam aron ko-an akeme kekroipet thekji aphansi nangliphan arpu pitang-lo.

¹⁵Nanglilong ser, rup adan-heihei neli lapen neli thanpare atum Israel a-Arnam aphan Jerusalem along Kardomhemthepi along kepiji ning kehang ason pon iknon.

¹⁶Nangli ako Bebilon alongri kerungtang aser-arup kedo-an lapen Israel arat lapen akurusar atum Jerusalem along kedo halatum a-Arnam Kardomhemthepi aphan kepi an ta pon-etnon.

¹⁷Labangso atangka nangli padam pamenangji lapen chainong aloso, biresak aloso, biresak aso, a-ok, lapen drakha ahorlang lapen Jerusalem a-Kardomhemthepi along lahei thok-non.

¹⁸Ser-rup, him an nang lapen nangri sangho atum aningkehang ateng penle rimnon.

¹⁹Nangrideng nangkepi ajohton an Jerusalem along Kardomhemthepi akam aphan Arnam angno hodainon.

²⁰Lapen nang akenang ason an recho akhipuru pen enlongpo.

²¹Nichi Euphratis alongri khipuru akam keklem atum aphan ne hukum pilo, Ezra, kurusar lapen Sining Arnam aron tok-bang, kehang alingle prapjin pen pidunnon,

²²isi ahoi lake rup lin 3,400 an, lapen thengthe lin 10,000 an, drakha ahorlang lin 2,000 an, Jit ajangthu lin 2,000 an, lapen ingti kenang an.

²³Mathapamera Sining Arnam amethang Kardomhemthepi aphan kenangji amar an pinon, lapen ne lapen nephi kepangri atum aphuthak Alangli aning kethithe detjile akeme klemnon.

²⁴Kurusar atum, Levi atum, lunse atum, kehon atum kam keklem atum pen pen mate laso a-Kardomhemthepi pen kecherap badu pen tame nangli midu rung-longle.

²⁵Ezra, nangli nang Arnam nangliphan nangkepi abidi lake jalin atum aphan lapen kangsai atum nangli Arnam aron pen kedo, kedo-an Nichi Euphratis arat kepangriji aphan kebatjile rimnon. Aron kechini abangphan nang thanvek nangji.

²⁶Mane jongsi nang Arnam aron-heihei mate rechokethe aron-heihei kroikrelote prapjin pen aduk pinangji kepathi pen tame, mate ban ketoi tame, mate amar kekuruk tame, mate kebeng setamelo.

²⁷Ezra pulo, “HEMPHU, ephusar atum a-Arnam ronon! Jerusalem along HEMPHU a-Kardomhemthepi aphan lapusonsi rechokethe aning Alangli parungsi man papitoilo.

²⁸Arnam kangjinso pen ajok neli rechokethe, alangli thanpare atum, lapen jakongthepik ajalin atum pen kangjinso long-lo; HEMPHU ne-Arnamsi neliphan ning ajakong nepilo, lapen ongdung Israel aro kejalin atum nelong nangkepadunji aphan hungdun undet-lo.”