Read Karbi EZRA 8 Bible Online

EZRA 8 - Karbi bible

EZRA 8

¹Lahei helo Bebilon along ban-kedam aro-heihei ajalin atumlo; lapen Artaserses rechokethe kecho un ahut Ezra along Jerusalem anat nangkechevoi dun atum:

²Phinehas aro pen Gershom, Ithamar aro pen Daniel David aro pen Shekaniah asopo Hattush.

³Parosh aro pen Jekaariah along bang 150 amonit amethang aro pen. (Latum aphusar angthun kebi-alam do.)

⁴Pehath Moab aro pen Jekaariah asopo Eliahonai along 200 amonit do.

⁵Zattu aro pen Jehaziel asopo Shekaniah along bang 300.

⁶Adin aro pen Jonathon asopo Ebed along bang 50 amonit do.

⁷Elam aro pen Athaliah asopo Jeshaiah along bang 70 amonit do.

⁸Shephatiah aro pen Maikel asopo Zebadiah along bang 80 amonit do.

⁹Joab aro pen Jehiel asopo Obadiah along bang 218 amonit do.

¹⁰Bani aro pen Josiphiah asopo Shelomith along bang 160 amonit do.

¹¹Bebai aro pen Bebai asopo Jekaariah along bang 28 amonit do.

¹²Azgad aro pen Hakkatan asopo Johanan along bang 110 amonit do.

¹³Adonikam aro pen Eliphelet, Jehuel, lapen Shemaiah along bang 60 amonit do. (Latum aphi adihusi kevang.)

¹⁴Bigvai aro pen Uthai lapen Zakur along bang 70 amonit do.

¹⁵Ahava arongsopi anat keli adong along song do-an ne pangrumlo, lapen nithom mukam alongsi netum hadak dolo. Ne thek-long-lo song along kurusar atum do bonta Levi atum ave.

¹⁶Ne bang sirkep songja atum aphan toilo; Eliezer, Ariel, Shemaiah, Elnathan, Jarib, Elnathan, Nathan, Jekaariah, lapen Meshullam lapen banghini thanbang Joiarib lapen Elnathan.

¹⁷Halatum aphan ne Iddo, Kashiphia arong keja abang along toilo, alangli lapen ri asangho Kardomhemthepi kam-klembang, netum along rat nangketoi pen Kardomhem along Arnam aphan kangdukji aphan.

¹⁸Arnam akanghon pen halatum Sherebiah, inut klem-unbang, Mahli aro a-Levi, lapen bang 18 asomar lapen amumar alanglilong nangdunlo.

¹⁹Halatum Hashabiah lapen Jeshaiah, Merari aro along bang 20 adon-arap nangdunlo.

²⁰La apar ta bang 200 Kardomhemthepi klembang atum David recho lapen arisangho atum latum aphan aphu arni pen kepathiktang atum dolo. Halatum kedo-an amen tok-et-lo.

²¹Ahava adong along kedo-an aphan ne hukum-heihei pilo, an-kehum lapen emethang a-Arnam angno chepabihek nangji aphan lapen tovar kedam ahut akeja kelongji aphan lapen netum lapen netum asomar lapen kedo-an amar kerai kelongji aphan pardomtoilo.

²²Rechokethe pen ne kerai asong hotur atum pen tovar kedam un ahut kechedan ron-aso kehang therak-hik-lo, pima ne alangliphan pulo, netum a-Arnam ke Alangliphan kechiki atum aphan pahirme, bonta Alangliphan aning padokde abang badu setame Alangli pen kesui atum aphan aduk pi.

²³Lasi netum Arnam pen kerai longji aphan an-humlo lapen ardomlo, lapen Alangli netum akardom-heihei thak-lo.

²⁴Anong kedo akurusar atum angbong pen ne Sherebiah, Hashabiah, lapen kaprek bang kep atum aphan ingvailo.

²⁵Ansi ne ser, rup, lapen ajohton-heihei rechokethe, alangli thanpare atum, lapen chakri atum, lapen Israel arat Kardomhemthepi aphan keparimtoi amar an linlo lapen la kurusar atum arideng hodaidet-lo.

²⁶Lahei helo ne halatum aphan Kepi: Rup mon 550, Son 100 rup ajohton-heihei pangrum pet lin 70, Ser mon 85,

²⁷Ser aharlung lin 8 ra gram 400, 2 kenaibot tam aharlung, ser aharlung ador pen chingbar.

²⁸Ne latum aphan pulo, “Nang nangphusar atum a-Arnam, HEMPHU aphan ingthir-et-lo, lapen la athesi ser-rup ajohton-heihei isi ningdak-dak adan ason la aphan vanpilo.

²⁹Kardomhemthepi leletik lahei hon pamenon. Kurusar atum angdeng lahei linnon lapen kurusar atum lapen Levi atum ajalin atum lapen Jerusalem along kedo Israel arat asongja arideng hodainon.”

³⁰Lasi kurusar atum lapen Levi atum Jerusalem a-Kardomhemthepi along ser, rup lapen ajohton-heihei keponji aphan arpu deng-lo.

³¹Kecheng achiklo, krehini arni, netum Ahava osi Jerusalem damlo. Netum Arnam netum along dolo, lapen netum kedambom ahut hotur ketengkheng pen lapen tovar ketonding atum pen pajok-lo.

³²Netum Jerusalem kele ahut, netum nithom sang-lo.

³³Lapen phli arni netum Kardomhemthepi damlo, ser, rup ajohton-heihei linlo, lapen Uriah asopo Meremoth pu akurusar aphan lahei hodailo. Alanglilong Phinehas asopo Eleazar lapen banghini a-Levi Joshua asopo Jozabad lapen Binui asopo Noadiah.

³⁴Asontin ta lakhapet lapen lin et-lo, lapen laso ahut amatsi isi kechok-lim alam toksi bipamelo.

³⁵Bankedam pen kechevoi atum an Israel a-Arnam along kephrin athok-heihei kepijisi vanlo. Halatum jon 12 achainong aloso Israel aphan, biresak aloso jon 96, lapen biresak aso jon 77; lapen bi jon 12 amethang apap pen kechepangthirji aphan vanlo. La kedo-an api HEMPHU aphan kephrin athok-heihei asonsi pilo.

³⁶Halatum aphan rechokethe kepitang lamtok aloh cheponlo, lapen Nichi a-Euphratis a-Govornor atum lapen achakri atum arideng la hodailo, ansi latum ta rat along kerap lapen Kardomhem karcho chetodunlo.