Read Karbi EZRA 9 Bible Online

EZRA 9 - Karbi bible

EZRA 9

¹La kadokave klemtangdet aphi, ajehak Israel arat kejalin atum nelilong vangsi pulo, rat atum, kurusar atum, lapen Levi atum adung-arei adet Ammon arat, Moab lapen Ijip mate Kanan asor, Hitti asor, Perijit asor, Jebusi asor lapen Amor asor pen chepaprekpre. Latum bang atum kehijimmeme akam-heihei keklem asonthotsi klemlo.

²Judia atum bang adet a-arloso aphan piso enlo, lapen lapusonsi Arnam kangthir-et arat pangthirthelo. Jalin atum lapen chakri atum helo kechokche akethenei.

³Neli la arjulong-lok pen ning-oisi neli pe-ri chingsek-lo, nelichu lapen neli ingmum chephulo, lapen ning runhupsi ingnijoilo.

⁴Arnikangsam athok kethokji apor nangleletik an neli hadak ningke-oi pen ingnilunverlo, lapen rat atum nekompetsi chingrumlo, la kephere atum an, pima ban kedam atum apap alam Israel a-Arnam putang-lo.

⁵Arnikangsam athok kepiji apor nangkele ahut neli ningduk pen kangnilun adim pen thurphlut-lo, seta kangsektang achoisi neli chingchoi bomlang, neli kengphu patongrui lo lapen neliri chirungsi ne Arnam HEMPHU aphan ardomlo.

⁶Neli pulo, “O Arnam, Nang ingno ne ingphun kechirungji aphan therak-lo. Netum apap-heihei chebuihup-lo, netum aphu kangtui an soselo; lahei sining-heihei kangtui asonsi ingtuilo.

⁷Netum aphusar arni pen nonpu anta netum Nangrat asolo, lapen thedung apap klemtang-lo. Pima netum apap apot recho atum arideng donang-et-lo, lapen netum aphan thu-that-et-lo, thiparohumlo, lapen kebengjisi nepondet-lo. Non netum kedonang asonthotsi netum aphan langrempik khangjang-lo.

⁸Non thihek apor aphan anchot, O HEMPHU, netum Arnam, Nang netum aphan jinsobomlo, lapen netum angbong ajehak aphan ban pen pajok-lo, lapen joksi ladak kangthir adim dolong-lo. Nang netum aphan ban pen pajoktang-lo lapen netum aphan kai kemi pilo.

⁹Netum ban donang-lo bonta Nang netum aphan ban padovervedet-lo. Nang Parsi arechokethe netum aphan pajinsosi kerutang Nang Kardomhemthepi along padolong-lo lapen pakimthulong-lo, lapen Judah lapen Jerusalem along akerai long-lo.”

¹⁰Bonta non, O Arnam, kedo-an klemtangdet aphi kopisi netum puthekjilangma?

¹¹Netum puthot nangban, montri atum pen netum aphan kepitang ahukum-heihei kroikretang-lo. Halatum nepulo, etum kecheraidamji alongle ke isi kangthirthe alongle pima ladak kedobom arat atum kangthirthe akamsi isi angchun pen ha kejut angchun an plengset-lo.

¹²Halatum netum aphan nepulo, bang ajat pen kaita che-en chedori lapen halatum jongsi aningjangtik an longle kechingthurji mate ke-unji aphan ninghang-lo lapen laso alongle mo aso-asu aphan kaike epiverpo pu seta rap dun nangne.

¹³Netum apap-heihei lapen kechokche pen ajok kephonangji an aduk netum phonang-lo seta netum chini, nang netum a-Arnamsi aduk netum aphan pilo, seta netum kephonangji ateng an pipedet-lo, lapen netum aphan kerengthuji avarsai pilo.

¹⁴Lasi kopusonsi netum Nanghukum-heihei abatai batai longledet poma lapen lahei kehingnodak arat pen keche-en-kechedo poma? Jongsi netum klemlote, Nangning thihaksi netum aphan pavirdet khangjangpo lapen badu aphan seta pareng longledetpo.

¹⁵HEMPHU, Israel a-Arnam, Nang ahokpet lapen netum aphan pareng-lo. Netum ado Nangphan chekobirlo; netum Nang ingno kevangji a-ot ave.