Read Karbi NEHEMIAH 13 Bible Online

NEHEMIAH 13 - Karbi bible

NEHEMIAH 13

¹Moses Aron, rat aphan asepathedung pen keparju ahut Ammon atum lapen Moab atum Arnam arat along akaita chelang dun longle pu kepu angdeng nanglerok lo.

²La atheke Ijip adet pen Israel atum tovar kevang un ahut Ammon lapen Moab atum an lapen lang pi dunde det apot. La kalisi Israel aputhak hirjuno kepadojisi halatum Balaam aphan tangka pilo, bonta netum a-Arnam ahirjuno alar hirjume paplangdet-lo.

³Labangso aron Israel arat atum arjulongledet aphi kedo-an bang-adet asor aphan rat-amei pen ingtan bilo.

⁴Kardomhem khi-puru-heihei ahemphu Eliashib kurusar, Tobiah pen chepame ajirding-o lo.

⁵La Tobiah aphan sok adan-heihei lapen methek Kardomhem ajohton, kurusar ahem aphan kepi adan-heihei lapen phankep-pen-ephan, drakha ahorlang, lapen jit ajangthu Levi atum aphan, Kardomhem alunse atum aphan lapen Kardomhem ahonbang atum aphan kepi adan-heihei kebi thedung angdeng pidet lo.

⁶Lasonsi dobom ahut, ne Jerusalem ave, pima Artaserses ningkan 32 Bebilon Arecho kecho ahut alangliphan kelong alam kethanjisi damjuilo.

⁷Aphithu ne alangli pen hukum chehangsi Jerusalem chevoithulo. Hadak Kardomhem aro Tobiah aphan Eliashib isi angdeng kepadotoi thek longsi ne mong-loilo.

⁸Ne ningthihaksi Tobiah ahormu an varthailo.

⁹Ne angdeng aron ateng pen kepangthirjisi hukum-heihei pilo lapen Kardomhem ajohton, sok-sang adan-heihei, lapen methek pabithutoilo.

¹⁰Ne ako chinithulo Kardomhem alunse atum lapen Levi atum Jerusalem o-etsi amethang ahidi-heihei along chedamrong-lo, pima rat atum halatum kerengji aphan dorphlup ason pipe det lo.

¹¹Ne saihemphu atum aphan Kardomhem kelangle apot ingchek-lo. Lapen Levi atum aphan lapen lunse atum aphan Kardomhem pachevang-thulo lapen halatum aphan kam paklemtoi lo.

¹²Ansi kedo-an Israel arat atum halatum phankep-pen-ephan asok, drakha ahorlang, lapen jit ajangthu Kardomhem khi-puru-heihei along kevan pangcheng-lo.

¹³Ne Shelemiah, inut akurusar, Zadok, Aron thekpamebang; lapen Pediah, inut a-Levi amonit atum aphan khi-puru-heihei pachehemphu toilo. Zakur asopo, lapen Mattaniah asupo Hanan, halatum aphan kerap abang-lo. Ne chini lapen lahei amonit aphan chiki un lapen halatum klemrap-rap atum aphan keron-kepajirji aphan angthikdut.

¹⁴Mathatha, Ne Arnam, lahei kedo-an asonta nang Kardomhem lapen la karchoji aphansi ne klempet-lo.

¹⁵Halaso ahut Judah arat-aso atum Kesang-arni ta drakha-athe kesor thek-long-lo. Akaprek atum ke halatum agadha api-heihei athak sok, drakha ahorlang, drakha-athe, thebo-heihei lapen kaprek ason arthang lo lapen lahei Jerusalem cheponlo; Ne halatum aphan Kesang-arni thangnatta kejor longle det aphan pachere lo.

¹⁶Jerusalem along kedo Tair arongsopi pen ajehak amonit atum lang-ok lapen ason ason amar rongsopi arlo vansi Kesang-arni halatum rat aphan jorlo.

¹⁷Ne Judia ajalin atum aphan ingcheksi pulo, “Nangtum kehingno keklem chelangtha! Nangtum Kesang-arni pangthirthelo,

¹⁸lasonthotsi Arnam nangphusar atum aphan aduk pilo lapen Alangli laso arongsopi aputhak kevir vanlo. Lapen Kesang-arni pangthirthesi lason keklembom pen ajok Arnam aningkethi Israel aphuthak van bomlo.”

¹⁹Lasi rongsopi anghap-heihei Kesang-arni kecheng aphongtin lapen arni kangsam kecheng aphongtin kepangkir-hetji ahukum-heihei ne pilo lapen Kesang-arni jutjetik pangpupelo. Kesang-arni thangta rongsopi arlo vanve pu kechinilorjisi ne monit atum anghap-heihei along paton lo.

²⁰Ephong-phongni ason-ason kejor-kelang atum Bhomta ajo rongsopi arpong-heihei angtansi dopo.

²¹Ne halatum aphan pacheretoilo, “Adap kevangji aphan hadak kechonghong-dingji thang ale ave. Nang jongsi lason puthot klem bor-i lote, ne nangbe jakong pen thurpo.” Laso arni pen halatum Kesang-arni vangve det lo.

²²Ne Levi atum aphan amethang chepangthirji ahukum pilo lapen damsi Kesang-arni kangthir-et pen kerimthekji aphan anghap-heihei paton damtoilo. Nemathatha, O Arnam, lata nang kanghon kethe lapen nepajoktha.

²³Halaso ahut ne long-lo ongdung Judia apinso atum Ashdod, Ammon, lapen Moab arloso pen chepangrilo.

²⁴Halatum achitim asomar atum Ashdod alam mate kaprek alamsi ningje lapen netum alam ningje lapen netum alam keningjeji thekthe det lo.

²⁵Pinso atum aphan ingcheksi ahirjuno hang-lo, theng-lo lapen halatum achu phu lo. Ansi ne halatum aphan Arnam amen pen halatum mate halatum asomar atum bang-adet atum pen piso-pangrire lo pu seme pa-en lo.

²⁶Ne pulo, “La bang-adet a-arlososi Solomon Recho aphan pap paklemtoilo. La kaprek adet a-recho-heihei atum an sose amonit lo. Arnam laphan chinghonlo, lapen Israel do-an aputhak recho bat-lo, seta la laso apap klodet lo.

²⁷Bang-adet a-arloso piso-pangri pen ajok netum a-Arnam aphan kroikrera netumta nangtum a-arjan nang endun nangjima?”

²⁸Eliashib asopo Joiadasi Kurusarpo, bonta Joiada asopo inut abang ke Sanballat asopi aphan pangrilo, Beth Horon pu arong pen. Lasi ne Joiada aphan Jerusalem pa-o toilo.

²⁹Mathatha, O Arnam, kopusonsi lahei arat atum kurusar anghoi lapen kurusar atum lapen Levi atum angbong kechechak aronta pangthirthe-tang-lo.

³⁰Rat atum aphan ne bang-adet ason pen pangthirlo; ne, kurusar lapen Levi atum aphan aron-heihei selam pilo. La pen ajok halatum amethang akam-angdeng chechinipo;

³¹Dan-heihei apor pen kepavanthek-jisi kethorji aphan theng thikpikoilo, lapen rat atum halatum atikong adan-heihei lapen pathecheng athesere kementang kevanthekji aphan pathik lo. Lahei do-an mathatha, O Arnam lapen nephan lason kemele pithunon.