Read Karbi NEHEMIAH 2 Bible Online

NEHEMIAH 2 - Karbi bible

NEHEMIAH 2

¹Chiklo jonphli aphi, ansi recho-kethe Artaserses an kecho ahut, neli horlang alangli anat ponlo. Nelining ke-oi alangli aphrang nethek-longle pinlang,

²lasi neliphan arjulo, “Nang kopi athesi pu-an ning kechepa-oiloma? Nangphu kesoma, nangning arong avedet?” Neli manghuhaksi thak-lo,

³“Rechokethe achethe padingnang! Nephusar atum aphan kepip arongsopi virtang-lo lapen la anghap-heihei anta me pen pavir-tang-et ahut neli kopusonsi ning cheparong-thek poma?”

⁴Rechokethe neli arjulo, “Tangte, la nang kopisi keklemji ning kehang-lo?” Neli sining Arnam aphan ardomlo,

⁵lapen neli rechokethe aphan pulo, “Rechokethe jongsi neliphan ningdok-lo pulote lapen neli kechoningri ason kepiji ninghang pulote, neliphan neliphusar atum aphan kepip arongsopi neli kekimthuji aphan Judah adet nelitum aphan padamlongtha.”

⁶Rechokethe, rechopikethe pen alangli dung ingni rap-rap ahut neli kechoningri ason deng-lo. Alangli neliphan ni ko-an do damjima lapen komantusi nang chevoithujima arjulo lapen neli arjulo, lapen neli alangliphan thanlo.

⁷Ansi neli alangliphan pulo, Judah adet kedam longji aphan Nichi a-Euphratis alongri a-Govornor kedamlong aloh-heihei nang paloduntoilo.

⁸Kardomhemthepi kehon atum apaisong anghap-heihei aphan, rongsopi arpong-heihei aphan lapen neli kedoji ahem aphan thengpi nang kepathonjile recho a-ingnam kehon abang Asaph aphanta loh nangpalo duntoilo. Arnam neliphan kerap apot neli kehang ason an rechokethe nelipi dun-et-lo.

⁹Rechokethe nelilong ron apinpo atum lapen losei kardon esong amonit atum nangtoi dunlo, lapen neli Nichi a-Euphratis anat kedam pangcheng-lo. Govornor atum aphan hadak rechokethe aloh-heihei neli pajirlo.

¹⁰Bonta Beth Horon arong pen Sanballat lapen Tobiah, Ammon alongri achakri atum Israel arat aphan keme akam keklemjisi inut amonit vangtang-lo pu arjulongsi, halatum aning dokdedet-lo.

¹¹Neli Jerusalem damlo, lapen

¹²Jerusalem aphan kopisi keklem nangjima laphan Arnam nelining parung-lo, bangso alam nithom anbak neli badu aphanta thanthedet-lo, lapen jirlo apor neli thurphlutsi ajehak neri sangho nelilong cheponsi damjoilo. Nelitum kepon api ke neli kardon agadhachot.

¹³Rongsopi Nichi anat Ruiphe Alangbop apar damsi Phelo aberi Anghap anat nanglelo. Dambomsi kerutang arpong-heihei lang-lo.

¹⁴Ansi rongsopi a-Nihang pen Nitur kangbop Anghap anat lapen Recho Alangteng anat damlo. Bonta neli kardon agadha vang-ui-ai atovar angbong damthekthe det-lo.

¹⁵Lasi neli Kidron Arlok anat sunsi arpong langponbomsi damlo. Ansi neli kevang atovarthot chiruithusi Arlok Anghap anat pen rongsopi arlo damlo.

¹⁶Neli konatsi kedamloma mate kopisi keklemloma la badu achakri atumta chininedet-lo. Neliri asangho a-Judia kurusar atum, jalin atum, chakri atum mate laso akam along nangkecherap dunji atum badu aphan seta laso alam neli thanthe pinlang.

¹⁷Bonta non neli halatum aphan thanlo, langnon, pima Jerusalem lapen anghap-heihei keru-et pen ajok etum ko-an sungnang-loma! Etum rongsopi arpong-heihei kimthulonang lapen etum aphan akelangrem pajut lonang.

¹⁸Lapen nelilong Arnam nangdodunsi ko-an nelirap loma lapen rechokethe kopisi neliphan pu loma neli halatum aphan thanlo. Halatum thak-rappet-lo, “Etum kekimthuji cheng-lonang!” Lapen halatum kam kechengji chesik-lo.

¹⁹Sanballat, Tobiah lapen inut Arob amonit amen ke Geshem pu nelitum keklemji alam arjulongsi halatum nelitum aphan ingnekchoilo, lapen pulo, “Nangtum rechokethe abe-tong kethurjima?”

²⁰Neli thak-lo, “Sining Arnamsi nelitum aphan pachun longpo. Nelitum Alangliban lapen nelitum kekimji aphan chengpo. Bonta Jerusalem akhi aputhak nangli thangnat jakong ave lapen la Nim-rokom-heihei along nangli pharman ave.”