Read Karbi NEHEMIAH 4 Bible Online

NEHEMIAH 4 - Karbi bible

NEHEMIAH 4

¹Judia atum arpong kekim cheng-tang-lo pu Sanballat arjulongsi, alangli ning thihak-lo lapen nelitum aphan tamlo.

²Alangli risangho atum lapen Samaria ron-asong angno la pulo, “Labangso a-Judia langno atum kopi akam keklemlo putong kechematha lone? Latum rongsopi kekimthujitong kemathama? Athok-heihei kepi pen latum kam arnisi angbong patang unji putong latum chemathama? Kerutang a-arlong abui lapen me kepachotang alongbui-heihei pen latum kim unjima?”

³La adung Tobiah ta arjapding lapen lata lam ingthundunlo, “Kopi arpongsi latum kimthek poma? Laphan serung atum anta ardak-rai un!”

⁴Neli ardomlo, “Netum aphan latum kelangrem arjutha, O Arnam! Halatum akangnekchoi halatum amethang aphuthak paklo nang. Halatum kedo an ason bang atumle pathi-et-lo nang, bang adet atum latum aphan pakokpon-et lonang.

⁵Halatum kehingno keklem apot diyari lapen halatum apap-heihei diyari pima latum netum kekim an atum aphan pinremlo.”

⁶Lasi netum arpong kimthubomlo, lapen la ebeng an lo ketang, pima rat atum kam keklemji aninghang-lo.

⁷Sanballat, Tobiah, Arob asor, Ammon lapen Ashdod atum netum Jerusalem arpong kekimthu lapen kangthim pen pachinghip-tang-lo pu arjulongsi halatum aningthipik-lo,

⁸lasi latum kedo-an chelangpet pen Jerusalem vangsi ketengkhengji aphan mang-lo, lapen pahuriseilo,

⁹bonta netum a-Arnam aphan ardomlo, lapen ajo-nerlo halatum aphan ketondingji amonit bilo.

¹⁰Judah arat atum kelun alun ejir do: Anghor koibomsi netum do-olang Kosonsi netum pini arpong kimthek-poma?

¹¹Netum ahotur atum mathalo netum halatum aphan thek-longle mate halatum netum along nangle hamhetik kopi plang-loma netum aphan pathisi netum akam keklem pasangkok-ketik ke netum chinine lo pu.

¹²Bonta aphong aphongta hotur angbong kedo a-Judia atum vangsi netum aphan hotur kemang pen pacheretoilo.

¹³Lasi rat atum aphan Nokjir, chir lapen thai-heihei pen pachesik-lo lapen kam ketangte adim arotin arpong anung halatum aphan padotoilo.

¹⁴Rat atum aning ke-oi thek-longsi neli halatum aphan lapen halatum ajalin atum aphan lapen chakri atum aphan pulo, “Elitum ahotur aphan phereri, chemathanon etum a-Arnam ko-an kethe lapen kepherememe a-HEMPHU, lapen nangtum akorte, nangsomar, nangpiso lapen nangtum ahem-heihei aphan chedanpo.”

¹⁵Netum ahotur atum keklemji alam netum chinitang-lo pu hotur atum arjulong-lo, lapen Arnamsi halatum akemang paremtang-lo pu chechinilo, lapen nelitumta arpong kekimthuji aphan chedamthurep-lo.

¹⁶Halaso ahut pen neli monit achi-tim atum kam klemlo, lapen achitim atum kechedan achoi chingchoisi tondingdang-lo, lapen chir-heihei, chong-heihei, thai-heihei che-ot-rep-lo. Lapen rat ajalin atum arpong kekim arat atum aphan un an cherapdunlo.

¹⁷Hala herim-jintak keroi atumta ari ehong pen kam klemlo lapen ehong ke risim che-ot-lo,

¹⁸lapen kekim abangphutinta avam along nokjir chesek nang-lo. Kepachereji aphan pong-ut kebut abang nelilongsi dolo.

¹⁹Nelirat atum aphan, halatum achakri atum aphan lapen jalin atum aphan pulo, “Kam lapu-an chesang-lo, etum pu pu arpong pen kedo cheheloving-vang-lo.

²⁰Nangtum Jongsi pong-ut arki arjulong-lote neli dungle nang chingrum-petnon. Etum aphan Arnamsi echedanpipo.”

²¹Lasonsi netum adapprang pen ajo chiklolongso lokbong-bang an achitim amonit atum arnivang arpong akam klemlo, lapen achitim atum ke chir-nok-heihei pen tonlo.

²²Laso ahut monit atum kelang abangphu aphan pulo, halatum rapbang atum an ajo Jerusalemsi padotoilo, anke ajo netum Jerusalem hon longpo lapen anerlo ke kam klem-longpo.

²³Neli, neliri sangho atum, neliban atum mate neliraibang atum anta ajo pe-ri cheseleledet-lo. Kedo-anta risim erideng chebirep-lo.