Read Karbi NEHEMIAH 5 Bible Online

NEHEMIAH 5 - Karbi bible

NEHEMIAH 5

¹Penang an aphi ongdung arat atum, pinso arlo halatum akorte Judia atum abe thursi pujolo.

²Ajehak atum pulo, “Netum ahemtun-heihei the-o, netum kerengji aphan sok-sang nangji.”

³Kaprek atum pulo, “Netum kangchir pen kejokji aphan, dorphlup asok-sang kelong thekji aphan, netum ahidi, drakha aberi lapen hem-heihei kechelang nangji do-o.”

⁴Kaprek atum anta pubomlo, “Netum ahidi-heihei lapen drakha aberi-heihei amidu kepiji aphan tangka choram nangji.

⁵Netumta Judia akorte atum asonsi isivet akheilo. Halatum asomar ason netum asomar ta mesen kalima? Bonta netum asomar aphan ban paplang nang-lo. Ajehak netum asopimar atum aphan banpi ason chojor nang-lo. Netum thang avarsai avetang-lo, pima netum ahidi-heihei lapen drakha aberi-heihei bang aridengsi do-et-lo.”

⁶Ne halatum kepujo arjulongsi, nening thilo

⁷lapen keklemjisi chesik-lo. Ne rat angno, rat ajalin atum lapen chakri atum alam kroikredet-lo, lapen neli pulo, “Nanglitumke nangli korte atum aphansi chechenek-lo!” Labangso akesung kangsaijisi ne isi rat amei phalo,

⁸lapen pulo, “Elitumke un an ekorte atum bang adet aso aphan kejortang kenam dunthu pen langdun pibom nangji. Non nanglitum nangli methang akorte atum nangtum aphan nang pachojorji bor-ilo, halatumta akorte Judia atum saidelo!” Keja atum doklip-lo lapen kethakji alamthe chelongle det-lo.

⁹Ansi neli pulo, “Nanglitum keklem kopima, la chokche! Nanglitum Arnam aphan kroinangji lapen kopisi kechechakma klem nangji. La pensi khei kaprek atum etum aphuthak epangnekchoi longledetpo.

¹⁰Neli rat atum aphan tangka lapen sok nelipen pachoram long-lo, lapen nerisangho atum, kam keklem atum an aphanta lo. Non lasi elitum apreng kechevoi nangji kedo-an matha nangnelo.

¹¹Nanglitum aphan halatum nangkepi nangji apreng kedo-an hanghedetnon, tangka tame, sok tame, drakha ahor tame mate jit ajangthu tame. Halatum aphan ahidi-heihei, drakha aberi-heihei, jit ajangthu aberi tame, mate hem-heihei tame non amat halatum aphan voithu-et nangji!”

¹²Keja atum thak-lo, “Nangli kepu ateng nelitum klempo. Longle-phelang nelitum voipo lapen preng-heihei hangthuthelo.” Neli kurusar atum aphan arlo hang-lo, lapen latum angno keja atum malomso aphrangjong kechechak ateng keklem thekji aphan seme patang-lo.

¹³Anke neli vamkok ason achoiso chephlok-lo, la nelivam alongsi kechekok lapen la hijuk-lo. “Lasonthotsi nanglitum angbong seme kechebibe atum aphan nanghijukpo” neli pulo, “Nanglitum ahem lapen nanglitum kechepahemphu amar an Arnam pon-etpo, lapen nangtum aphan thangnatta bitekangke-detpo.” Kechetong abangphutinta purrep-lo, “Amen!” lapen HEMPHU aphan rolo. Lapen keja atum halatum aseme chebilo.

¹⁴Judah a-Govornor ningkan krehini neli kecho esek, Artaserses Rechokethe kecho ningkan ingkoi aningkan pen ha alangli recho kecho ningkan thomkep-ra hini an, nelitum adon mate neli seta neli Govornor apot neliphan nekepanongpi a-an neli chochedet-lo.

¹⁵Neliphrang Saihem along kedo abangphutin a-Govornor atum ke rat aphan isi arpu plang-lo, latum kechoji lapen kejunji aphan arni isi si rup dum phlikep hang-lo. La anchot kali, halatum aban atumta rat atum aphan chenek-lo. Bonta neli ke keklem paprekdak-lo, athema neli Arnam aphan aman pilo.

¹⁶Neli jakong kedo-an paisong kekimthuji aphansi chepidet-lo, lapen nelimethang aphan thangnatta cheriredet-lo. Neliphan kam nekeklempi atum anta paisong akam alongsi chetodunpet-lo.

¹⁷Neli arnivangta neli tebul along bangpharo isira bangphokep a-Jihudi amonit atum lapen ajalin atum aphan an pacholo, lahei ke adung arei adet pen nelilong kevang atum aphan batdet-lo.

¹⁸Arnivang neli ejon achainong, akemenei jon throk abiresak, lapen ongdung avo, pinang-lo, lapen nikep chok-lote drakha ahorlang kemi padorlo. Bonta neli chini rat atum ko-an kardik arpu inghornang loma, lasi Govornor apot kelong nangji nelipharman neli hanghedet-lo.

¹⁹Neli nangliphan ardomlo, O Arnam, asontin labangso arat aphan neli keklem apot nangli nechemathatha.