Read Karbi NEHEMIAH 6 Bible Online

NEHEMIAH 6 - Karbi bible

NEHEMIAH 6

¹Sanballat, Tobiah, Geshem lapen netum ahotur kedo-an netum arpong kekim patangtang-lo lapen la angkrak-heihei pavepinlo pu arjulong-lo, tebonseta anghap-heihei, inghap atovar-heihei along bibelang.

²Lasi Sanballat lapen Geshem neliphan birta ethe nang-lolo, Ono pu alongklam along kechetongji aphan tok-lo. Lake neliphan kepasungji isi abidilo.

³Neli pherangke atum halatum aphan kepathanjisi toilo, “Neli akenangsotnei akamsi keklem, lapen neli arum nangsun un-e. Dan pen nangtum aphan nangkelangchot pen neli kam keklem ington un-e.”

⁴Lasonsi esonnat abirta bataiphli neliphan pilo, lapen aphongtinta neli halatum aphan isinatsi thakdunlo.

⁵Ansi Sanballat amethang inut aban pen ajok bataipho aphong birta nepilo, laso aphong abang ke angthek kethengthe pen abirta .

⁶Lasonsi tok-lo: “Geshem neliphan thanlo, nangli lapen Judia arat atum recho abekethurjisi laso arpong kepakimthutoilo pu alam adung-arei arat atum chethanjolo.

⁷La anta alangli nethanlo, nangli methang recho kechoji aphansi ajehak montri atum Jerusalem along nangli helo Judah arecholo pu kepachethang-jisi siktang-lo. Rechokethe bangso alam arjulong-tahaipo, lasi neli nang pinkhat-lo, labangso alam aputhak kechingkiji aphan elitum chetongvek nangji.”

⁸Neli alangliphan ethe thak-lo, “Nangli kepu esonnatta ahok kali, lahei nangli kepinchong alamchot.”

⁹Kam kepasangkokji aphansi halatum neli papherelo. Neli Arnam ardomlo, “Arnam nephan jakong nepitha!”

¹⁰Delaiah asopo lapen Mehetabel asupo Shemaiah along halaso ahut kevurdamjisi chesik-lo, alangli hem che-o un-e. Alangli neliphan pulo, “Nangli lapen neli Kardomhem kangthir-et adim damsi chepatu dam nangji lapen inghap-heihei ingkirhet-lonang, pima halatum nangliphan kepathijisi vangpo. Nonke aling aningve seta vangsi nangli pathipo.”

¹¹Neli thak-lo, “Neli ke kekatji lapen kechepatuji abang kali. Neli chethe kechepajokji aphan neli chepatuji putong nangli kemathama? La neli klem un-e.”

¹²Neli la chemathathulo, neli chinilo, Shemaiah aphan Arnam kethan alam kali, bonta Sanballat lapen Tobiah si neli nepacheretoiji aphan alangliphan tangka pilo.

¹³Halatum nepaphere pen nepachopapjisi alangliphan rong-lo, lapen ajok latum nenong pajunopo lapen bang nangpangthok-ripo.

¹⁴Neli Arnam ardomlo, “Arnam kopisi Sanballat lapen Tobiah keklem-tang-loma, mathatha lapen latum aphan aduk pinon. Chemathatha Nodiah arloso lapen kaprek kedo-an amontri atum nephan papherejisi bor-ilo.”

¹⁵Ni phokep-ra hini an arpong akam klemsi Elul pu achiklo nikhap 25 arni kam keklem patang-lo.

¹⁶Adung-arei adet kedo netum ahotur atum la arjulong pen halatum chechinilo, halatum amahang chepaklangji therak nangpo, athe baduta chinilo, laso akam Arnam akerap pensi patanglong-lo.

¹⁷Labangso ahut an Judia ajalin atum Tobiah pen loh chelobomlang.

¹⁸Ongdung a-Judia arat atum alangli be si dun pima alangli ong lake Arah asopo Shekaniah, inut a-Judia. La pen apar alangli sopo Jehohanan, Berekiah asopo Meshullam asopi aphan pangrilo.

¹⁹Tobiah keklem akeme alam rat atum neli ingno chethanji lapen neli kepu alam anta la aphan than. Alangli neliphan papherejisi birta-heihei nang-lobom.