Read Karbi NEHEMIAH 8 Bible Online

NEHEMIAH 8 - Karbi bible

NEHEMIAH 8

¹Throksi achiklo Israel arat atum halatum arongsopi-heihei along chedorep-lo. Chiklo kecheng arni halatum Jerusalem Lang Anghap atikup arlo chingrumpet-lo. Halatum kurusar lapen Moses pen kepi Arnam Aron kethekpame Ezra aphan Aron aloh kelongji aphan arjulo.

²Lasi pinso-arlo, osomar karjuthek an rat kechingrumpet adim la vanlo.

³Hadak inghap atikup along halatum aphan Aron adap pen ha nerlo-chittim an porhe-parjulo lapen halatum kedo-an ta arjudun pamelo.

⁴Laso aphan kekimtang thengpi ahongplang athak arjapding-lo. Mattithiah, Shema, Ananiah, Uriah, Hilkiah lapen Maaseiah atum alangli ar-e arjap-lo; lapen Pedaiah, Mishael, Malkijah, Hashum, Hashbaddanah, Jekaariah, lapen Meshullam atum alangli arvi si arjap-lo.

⁵Rat aphan kangtuimuchot ahongplang athak Ezra karjap un ahut halatum amek alangliphansi lang-lorlarlo. Alangli loh purdet pen halatum kedo-an thurpet-lo.

⁶Ezra pulo, “HEMPHU, Arnam kethe aphan chorolo!” Kedo-an arat atum ari chirungsi thakdunpet-lo, “Amen! Amen!” Latum karchojisi akengphu patongruilo, lapen latum amahang longle patongruilo.

⁷Ansi latum thurlo lapen latum amethang adim charjap-rep-lo, lapen Jeshua, Bani, Sherebiah, Jamin, Akub, Shabbethai, Hodiah, Maaseiah, Kelita, Azariah, Jozabad, Hanan, lapen Pelaiah a-Levi atum Aron alam halatum aphan than pachinilo.

⁸Latum Arnam Aron lam-larlo lapen monit atum la kechinipetji aphan than pachinilo .

⁹Rat atum Aron ateng kedo nangji alam arjulongsi aning donolo, lapen latum chiru pangcheng-lo. Lasi Nehemiah Govornor, lapen Ezra kurusar lapen Aron kethekpame abang, lapen thanpachini a-Levi atum, rat kedo-an aphan pulo, “Pini arni ke nang Arnam HEMPHU aphan kangthir-et arnilo, lasi nangtum ningri mate chiru nangnelo.

¹⁰Non hem damra kecho-kejunle klemnon. Kedorde atum pen nang an, nang drakha ahorlang chepinon. Pini ke etum a-Arnam aphan kangthir arnilo, lasi ning chepa-oiri. HEMPHU nang kepiji aning arong lake nangphan jakong paplangpo.”

¹¹Levi atum damsi rat aphan lason kangthir arni ning-oiri pu than pangsam damlo.

¹²Lasi kedo-an arat atum hem chedamsi kecho-kejun ahut halatum kedo-an ason kaprek aphan pilo, pima halatum aphan kopisi porhe parjuloma latum chinilo.

¹³Puthot arni aro ajalin atum kurusar atum lapen Levi atum penpen Aron kethan kecharlijisi Ezra along damlo.

¹⁴Latum Moses pen HEMPHU kepi Aron along thek-long-lo, rat atum Chepachong Achojun Amei ahut pharlasi donangji.

¹⁵Lasi latum aphan toisi aber ketok klem angdeng-heihei Jerusalem lapen kaprek arong lapen arongsopi kedo-an aphan pathantoilo! “Inglong-heihei anat damra jit athengpi aro, lapen ingnam ajit athengpi aro lapen thengplum aro lapen sotele aro lapen kaprek athengpi arong-heihei pen pharla-heihei Aron along kethan ateng vannon.”

¹⁶Lasi rat atum Lang Anghap along, lapen Ephraim Anghap along amethang methang ahem asarnung-heihei ahem along halatum atikup along aro-heihei pen pharlahehei kimlo.

¹⁷Kedo-an bankedam pen kevang atum an pharla-heihei chekimsi hadak dolo. Nun asopo Joshua arni pen lahelo keklemcheng-lo, lapen anut-tinta chonkarkursi chehokpik-lo.

¹⁸Chojun Amei kecheng arni pen ha kejut arni anta arnivang Arnam Aron ingdeng isi porhepiverlo. Halatum ni throksi talonlo, lapen nerkep arni Aron kenangji ateng isi kepajut amei dolo.