Read Karbi NEHEMIAH 9 Bible Online

NEHEMIAH 9 - Karbi bible

NEHEMIAH 9

¹Halaso achiklo amat, ingkoira phli arni, Israel arat atum halatum apap-heihei aputhak aning ke-oi chepaklangji aphan an kehumjisi chingrumpet-lo. Latum bang adet amonit atum pen chepaprekdak-lo. Latum aning ke-oi angthek ason pethoila lapen latum aphu-heihei longle aduk chinglulo.

²Ansi halatum thurpet-lo, lapen halatum aphusar atum keklemtang apap-heihei chekobir pangcheng-lo.

³Pima porphai kethom halatum a-Arnam HEMPHU Aron halatum aphan porhe pilo, lapen aphi porphai kethom latum amethang apap-heihei chekobirlo, lapen latum a-Arnam aphan archolo.

⁴Hadak isi ahongplang Levi atum aphan dolo, lapen laso along Jeshua, Bani, Kadmiel, Shebaniah, Bunni, Sherebiah, Bani, lapen Chenani thurlo. Latum a-Arnam HEMPHU aphan ase pathedung pen ardomlo.

⁵Aber ketok a-Levi atum karchoji aphan hang-lo: Jeshua, Kadmiel, Bani, Hashabneiah, Sherebiah, Hodiah, Shebaniah, lapen Pethaliah. Latum pulo: “Thurpet-ra Nang Arnam HEMPHU aphan kaiketa rohurnon; Kaiketa Alangliphan ronon! Monit akerokethe padorphlup un-e seta, Anut-tin ta Alanglinong kethe amen paropet lo nang.”

⁶Lapen Israel arat atum bangso akardomsi ardomlo: “Nang HEMPHU, Nang inutnatsi Hemphu-chot; Nang sining-heihei lapen sining achiklolongso pinchong-lo. Nangsi longle lapen talo lapen la along kedo-an amar pinchong-lo; Nangsi kedo-an aphan chethe pilo. Sining ajakong kedo-an Nangliphan ingduk-lo, lapen archolo.

⁷Nang HEMPHU Arnamsi Abram aphan ingvailo, lapen Bebilon adet Ur pen pabarlo; Nang laso amen larsi Abraham irlo.

⁸La Nangphan kekroithirklong Nang long-lo, Nang lapen la angbong Nang kechejok aloh pathik-lo. Kanaan asor alongle laphan Nang kepiji chechak-lo, Hitti, lapen Amor, Perizzi, Jebusi lapen Girgashi alongle-heihei la aso-asu atum aphan kepadolongjisi pipo. Nang kechak alam chebilo, pima Nang kekroithirklong.

⁹Nang thek-long-lo, nephusar atum Ijip adet ko-an kesung chechak Nang-loma; Ikora atalo along halatum kerap kechohang Nang arjulong-lo.

¹⁰Recho abethursi Nang manghumeme akam klemtang-lo, alang asaihemphu la adet kedo-an arat abe Nangthurlo, pima Nang chini ko-an latum Nangrat aphan chenek-loma. Nang chepahaisi pini anta Nangnong dolo.

¹¹Talo angbong Nang rat aphan Nang tovar pinchong pilo lapen krengdang alongle athak padam long-lo. Adihu kethe atalo along arlong kanglim asonsi latum aphan kehung dun atum langjang nang-lo.

¹²Inghun pen Nang halatum aphan anerlo japon lo, latum ajo Nang halatum atovar me pen pathe-ang-lo.

¹³Sinai Anglong along Nang sining pen vang-lo; Nang rat aphan Nang ningjelo, lapen halatum aphan mesen aron-heihei lapen karsik akethan-heihei pilo.

¹⁴Nang kesang kangthir arni kebiji aphan halatum aphan thanlo, lapen Moses pen ajok halatum aphan Nang Aron-heihei pilo.”

¹⁵“Halatum kangchir ahut, Nang halatum aphan sining pen him pilo, lapen kang-it ahut arlong pen lang pilo. Nang kepiji kechechak alongle pacherai longjisi halatum aphan thanlo.

¹⁶Bonta netum aphusar atum ane chepathe bomlo lapen arjuje lo, lapen Nang hukum-heihei kekroiji aphan molo.

¹⁷Halatum kekroiji molo; halatum Nang keklempi ason an tengnetang-lo; halatum Nang kepaklang kemanghumeme akam-heihei tengnedet lo. Ane chepathesi halatum inut ajalin chingvailo halatum aphan Ijip adet ban kedodamjisi. Bonta Nang inut kedin a-Arnam; Nang jinsopik lapen inghonpik, ningkethi derklui a-Bang. Nang kejinso thepik, Nang halatum aphan o-e det-lo.

¹⁸Chainong aso thipsi halatum kumlin pinchong-lo lapen la helo Ijip adet pen ekevan a-arnam lo pu! Ko-ansi latum Nangphan langrem loma HEMPHU!

¹⁹Bonta hadak kejejangtang ajo Nang halatum aphan otekangke det-lo, pima Nang akangjinso thepik. Ajo-anerlo tovar halatum aphan kepaklangbom a-inghun lapen ame Nang pavedetde det-lo.

²⁰Nang mesen pensi halatum kopi klem Nangji ma Nang than lo; Nang halatum aphan Manna ahim pacholo lapen kejun alangta pilo.

²¹Kejejangtang ajo ningkan 40 halatum kenangji ason an Nang-pilo; halatum ape ingrak long nangne det-lo, lapen halatum keso pen akeng kang nangnedet lo.”

²²“Det-heihei lapen recho arat-heihei aputhak halatum aphan pahaidet toilo, lapen halatum ahoi alongle an aputhak seta. Sihon kepangri Heshbon alongle lapen Og recho kecho Bashan alongle aputhak seta pahailo.

²³Sining achiklolongso-heihei ason thak thaksi Nang halatum aphan ongdung asomar pilo, lapen halatum aphusar atum aphan Nang kepiji pu kechak alongle along kepalongjisi Nang halatum aphan det aputhak pahaitoilo.

²⁴Kanan adet lapen hadak kedo arat aphuthak Nang pahai toilo. Kanan arat lapen recho atum aphuthak aning kehang aling latum keklemji ajakong Nang rat aso aphan pitang-lo.

²⁵Apaisong kedo arongsopi-heihei ho-or kedo alongle lapen akhi plengset ahem-heihei lapen ketuk alang tuk-heihei jit arong-heihei thesere arong-heihei lapen drakha aberi-heihei Nangrat aso aphan pachehemphu toilo. Halatum un an cholongsi the-o-a lo; Nang kepi akeme ason an pen latum aning chepajang-lo.”

²⁶“Bonta Nangrat atum Nangbe thursi lapen Nang kroikredet lo; Nang Aron-heihei latum panung-lo. Nangnat kepangnotoi kepu abang halatum aphan kepacheretoi montri atum aphan latum pathilo. Aphong aphong ta latum Nangphan pinremlo.

²⁷La apotsi Nang halatum ahotur atum halatum aphuthak pahaidet-lo lapen papangri longdet-lo. Kesung ahut halatum Nang pen kerap hang-lo lapen Nang sining angsong pen halatum aphan thak-lo. Nang kangjinso thepiksi halatum aphan halatum ahotur pen kepajokjisi jalin atum toilo.

²⁸Ningkangsam longthulo, puthot halatum pap klemthutang-lo, lapen Nang halatum ahotur latum aphuthak pahaithulo. Tebonseta latum aning chiruilo pulote lapen kejokji akerap halatum Nangchohang lote, sining angsong pen Nang aphong aphong ta arju Nang kangjinso pensi Nang halatum aphan pajok lo.

²⁹Nang akethan-heihei pakroijisi Nang halatum aphan pacheretoilo, bonta ane chepathesi latum Nang Aron kerim ke chethe atovar seta Nang Aron-heihei latum dengde lo. Kebuiklui lapen karjuje, halatum kekroiji molo.

³⁰Aningkan-ningkan ta Nang halatum ning chepaningding pen pacheretoilo. Nang montri atum pen Nang pathantoilo, bonta Nangrat atum ano ingthong-het, lasi Nang latum aphuthak kaprek adet atum pahaitoilo.

³¹Lapen pima Nang kangjinso thepik apotsi Nang latum aphan o-e mate pavirvedet-lo. Nang inut kangjinso parpik lapen kediya thepik a-Arnam!”

³²“O Arnam, netum a-Arnam, Nang ko-an kethe! Ko-an pherememe, ko-an jakongkethe! Nang kekroithirklong pen Nang kechejok kechechak-heihei chebi, Assiria arecho netum aphan kechenek arni pen non anta netum kesung chechak nangbomlang! Netum arecho atum netum ajalin atum netum akurusar atum, lapen montri atum, netum aphusar atum lapen kedo-an netum rat aso atum ke sung-chechak Nang-lo. Mathatha, netum ko-an sung chechak Nang-loma!

³³Netum aphan Nang aduk kepi ke mesen lo; netum pap klem seta Nang ke kekroi thirklong.

³⁴Netum aphusar atum, netum arecho atum, jalin atum, lapen kurusar atum Nang Aron ot thekthe det lo. Halatum Nang hukum-heihei lapen pacheretoi anta arjuje det lo.

³⁵Nang hirjume pensi recho atum Nangrat pangri lo halatum aphan adang kethe ho-or alongle pisi padolong-lo, bonta halatum pap pen che-osi Nangphan ingdukde det-lo.

³⁶Lapen non Nang, Nangkepi adet la ho-or kedo alongle netum aphan an nekepiji alongle along netum ban do Nang-lo.

³⁷Longle kepathe ason an Nang netum aphuthak kebat arecho alongsi dam et-lo, pima netum pap klemlo. Halatum netum lapen chopangreng api aphuthak aninghang atengsi latum klemlo, lapen netum thi rengjeng lo.”

³⁸Lahei kadokave keplang apotsi, netum Israel arat isi thirklong aloh chetokdut-lo, lapen netum ajalin atum netum a-Levi atum, lapen netum akurusar atum, halatum lalong angthek theng-lo.