Read Karbi ESTHER 2 Bible Online

ESTHER 2 - Karbi bible

ESTHER 2

¹Lahei aphi, Ahasuras recho aning kethi jon si alangli Vashti lapen la keklemtang lapen la aphan kesengtang ahukum chemathathulo.

²Ansi recho aphan kepare atum alangliphan pulo, “Recho aphan langmepik ingthir-et animsopimar pari lonang.

³Lapen arje langmepik nimsomar kangthir kedo-an Susa det arongsopi kethe arloso ahem along kepangrumjile recho adet adang longri do-an keri-abangphu-heihei pabatnang lapen recho akasi-entang Hegai pu arlosomar kehon abang aridengle papinang lapen halatum aphan jangthu nempru-heihei ta papilonang.

⁴Lapen recho aning kedok animsopi kangduk abangle Vashti alar rechopi paplangnang.” Lapen recho bangso alam aning dok-lo lapen lasonsi klemlo.

⁵Lapen arongsopi kethe Susa along inut Judia amonit dolo, amen Mordekai pu, apo ke Benjamin akhei Jair asopo, Jair asopo ke Shimei, Shimei ke Kish asopo,

⁶Bebilon arecho Nebukhadnezzar Jerusalem pen kenep pon Judah arecho Jekoniah penpen keneppontang atum angbong alanglita inut-lo.

⁷Lapen ke alangli punu asopi Hadassah atheke Esther aphan pangreng-lo pima la api apo ta avedet lapen bangso animso kangduk arje mesen lapen inghonmeme lapen api apo thidet aphi Mordekai si amethang akur ponsi asopi chekamlo.

⁸Lapen recho ahukum lapen pathirtang aron pachethang-lo, nimso kangduk ongdung atum Susa det arongsopi kethe along Hegai arideng kechingrum ahut Esther aphanta recho ahem pondet-lo lapen arlosomar kehon abang Hegai arideng hodaidet-lo.

⁹Lapen bangso animso kangduk alangli ning padok-lo, lapen alangli akangjinso long-lo lapen alangli jangthu nempru-heihei lapen apharman kecho asonta prapjin pen vanpilo lapen recho ahem pen la aphan kangvaitang bang throksi aban pi pilo lapen latum alangliphan kemenei arloso ahem angdengso padolo.

¹⁰Esther amethang akhei mate chepho-chero atum aphan alangli lam pachinine det-lo, pima Mordekaisi thanri pusi pukoilo.

¹¹Lapen Esther mesenlangma lapen alangli pisi plang-loma la kechinijisi arnivang Mordekai arloso ahem atikup angno helatbomlo.

¹²Arlosomar atum aphan chiklo jonkrehini an kepang-e aron kepathik do. La chiklo jonthrok hijung aphik ajangthu lapen chiklo jonthrok ke kepang-e ason-heihei lapen nemprujin abap-heihei alang pen abang kechihi abangphutin animso kangduk Ahasuras recho along kedamji ahut nanglelo.

¹³Lasonsi nimso kangduk recho along kedam ahut aningkehang alingsi arloso ahem pen recho ahem kedamji aphan pidet-lo.

¹⁴Arnikangsam apor la damsi adap arloso ahem hini ahum Shaashgaz arideng kedojisi chevangthulo, bangso abang recho akasi-entang abang-lo, lapen en-pangtar arloso atum aphan alangli honlo. Arloso abang aphan recho aning dokdera amen hanghete bangpi recho along damthuthelo.

¹⁵Lapen Mordekai apunu Abihail asopi Esther atheke Mordekai akur kepon asopi recho along kelut damji adeng nanglesi recho akasi-entang Hegai, la arloso atum aphan kehon abang kepathik apar Esther ke thangta hanghedet-lo. Lapen non Esther aphan kethek-long atum an pen kangjinso long-lo.

¹⁶Lapen recho kecho throksi aningkan kep achiklo atheke Tebeth achiklo Esther aphan recho ahem Ahasuras recho along ponlo.

¹⁷Lapen kedo-an arlosopimar atum aphan apar recho Esther aphan chinghon muchot lo, lapen okarjang atum an aphan apar bangpi aphan ingjinso muchot lo, lapen aningdok muchot-lo, lapen labangpi aphu athak rechopi aphutup kupsi Vashti alar bangpi aphan rechopi bat-lo.

¹⁸Ansi recho, rechoso lapen kepangri atum an aphan thedung akecho-kejun pilo, la ke Esther anong aphansi pilo. Lapen recho alongritin aphan midu pajoike muchot-lo lapen recho aninghang an chingchomchesi dan-heihei ta pilo.

¹⁹Okarjang atum batai hini aphong kechingrum ahut Mordekai, Recho anghap amahang along ingnilunsi do.

²⁰Esther non anta amethang chephochero mate amethang amonit atum aphan alangli lam pachinine det-lo, pima Mordekai alangliphan thanri pulo, atheke Mordekai bangpi aphan kechopangreng ahut ason thak thaksi Esther alangli lam kroilo.

²¹Lapen halabangso arni Mordekai recho apai anghap along kangni un ahut recho ahongthu kehon akasi-entang atum banghini, Bigthan lapen Teresh aningthisi recho Ahasuras aphan kepathiji abidi rilo.

²²Lapen Mordekai la chinisi alangli Esther rechopi aphan thanserlo lapen Esther ta Mordekai amen pen recho aphan thanlo.

²³Lasi bangso alam hutsi ahok thek-longsi halatum banghini aphan thengpi angsong vek-lingsi kokthat-ot-lo. Lapen bangso alam recho angno det aphurkimo aloh along tokdet-lo.