Read Karbi ESTHER 3 Bible Online

ESTHER 3 - Karbi bible

ESTHER 3

¹Laso aphi si Ahasuras recho Hammedatha asopo Haman pu Agagit asor aphan kangtui anghoi bat-lo, lapen alanglilong kedo are-choso atum an apar ingtui muchot anghoi athak akam bat-lo.

²Lapen kadokave recho anghap kedo aban atum an Haman angno akengphu patongruisi alangliphan ardom khrup-lo, pima recho alangliphan lason keklem nangji ahukum pilo. Bonta Mordekai ke akengphu patongtedet lapen ardomkhrupkhre det-lo.

³Lasi recho anghap amahang along kedo recho aban atum Mordekai aphan pulo, “Nangli pi athesi recho ahukum ingdiloma?”

⁴Lapen halatum arni vang alangliphan pubomlo bonta alangli arjudun long-lo, lasi halatum Mordekai alam chok loma la kechinijisi Haman aphan thanlo, pima Mordekai halatum aphan thanlo alangli ke Judia amonit.

⁵Mordekai Haman aphan akengphu patongte lapen ardomkhrup-khre pu thek-longsi Haman jasemet aning thilo.

⁶Bonta Mordekai aphan kepavirchot ke alangli ning hanghe. Pima halatum Mordekai akhei kopi la thantang-lo, lasi Haman ke Ahasuras adet adang kedo-an Judia atheke Mordekai akhei aphan kepavirjisi bidi rilo.

⁷Kecheng achiklo lake Nishan lo, Ahasuras recho kecho krehini aningkan Haman angno halatum Pur lake khadot arnivangta pathulo lapen chiklo ajontin lason thak thaksi krehini achiklo lake Adar achiklo anta klembomlo.

⁸Ansi Ahasuras recho aphan Haman pulo, “Isi akhei adet kaprek lapen nangli det alongritin kedo chehijikjamsi rat atum angbong dorapput-lo; halatum aronta kaprek atum pen prekvi, lapen halatum recho aron-heihei kroikre, la apotsi halatum aphan kelangdingji recho aphan thang ale ave.

⁹Recho jongsi aningdok lote halatum pavirnang pura hukum patoknang lapen ne recho akam keklem atum arideng rup mon 7,500 (anbak) hodaiji lapen lake recho akhipuru along halatum vanpo.”

¹⁰Lasi recho asap ketheng-i a-arnan aripen chephloksi Judia atum ahotur lake Hammedatha asopo Agagit asor Haman arideng pitekang-lo.

¹¹Lapen recho Haman aphan pulo, “Atangka lapen rat ta nangliridengsi hodailo, nanglining kehang kemesen alingle klemnon.”

¹²Ansi alangli kecheng achiklo 13 arni recho achunbang atum aphan phalo lapen Haman ahukum atengsi recho a-Govornor kethe atum an lapen alongritin a-Govornor atum lapen rat atum arechoso do-an aphan loh tok det-lo, halatum alongritin amethang ketok amek lapen akheitin amethang alam pen tok-lo; lake Ahasuras recho amen pen tokdet-lo.

¹³Lapen bangso aloh-heihei pherangke atum pensi recho adet alongritin an lodet-lo. Judia atum an kethe-kebi, sarpimar lapen osomar an aphan arnisi amat pavirnon, pathinon, pavedetnon lapen amar atar thi-etnon pusi tokdet-lo, lake Adar pu krehini achiklo, 13 a-arni.

¹⁴Bangso aloh epak pak kepitang ahukum ateng alongritin arat atum aphan pachethang-lo lasi halatum halabangso arni aphan chesiknangpo.

¹⁵Recho ahukum ateng pen pherangke atum damserak-lo lapen Susa det arongsopi kethe along bangso ahukum halabangso arni aphan pachethang-lo. Recho lapen Haman kecho-kejunjisi chongnilo bonta Susa arongsopi asor ke aning arong avedet-lo.