Read Karbi ESTHER 4 Bible Online

ESTHER 4 - Karbi bible

ESTHER 4

¹Mordekai la kadokave keklemtang alam chinidet aphi alangli ape chingsek-lo lapen pethoila che-umsi thek-lo chinglulo. Lapen rongsopi angbong damsi asekethe pen hangkongsi aningkeduk pen chirulo.

²Alangli recho anghap angno an vangchot-lo athe pethoila pen keche-um abang baduta hadak arlo lut longle.

³Lapen alongritin recho alam lapen ahukum kele adim an Judia atum chirupik-lo, halatum an humsi chiru charnap-lo, lapen penang atum pethoila che-umsi thek-lo athak tiruilo.

⁴Esther abanpi atum lapen kasi-entang atum vangsi alangliphan kethan un ahut rechopi aning dukpik-lo. Alangli Mordekai apethoila kepa-chephlokjisi pe lo dunlo bonta alangli halahei dengdedet-lo.

⁵Lasi Esther, recho akasi-entang atum angbong pen inut Hathak pu bangphan hang-lo, lake Esther aphan keparapdunjisi recho bangso aphan bat-lo. Lapen alangli Mordekai pi cheplang-loma lapen la athe kechiniji aphan padamtoi lo.

⁶Hathak, recho anghap angno kedo rongsopi achetaikethe adim Mordekai along damlo.

⁷Lapen Mordekai amethang aphan keplangtang alam an lapen Judia atum aphan kepavirjisi Haman, recho akhipuru along kethapji pu kechak arup angkleng aphai alam athikpetsi alangliphan thanlo.

⁸Susa along keron Judia atum aphan pavirnangji pu kepachethang aloh epak Hathak aphan Mordekai pilo lapen la Esther aphan paklangra thanpajirmi non lapen recho along padamra amethang akhei aphan kangjinso chohang nangji pura pachoningrinon pusi Mordekai halaphan pulo.

⁹Lapen Hathak damsi Mordekai kepu alam an Esther aphan thanlo.

¹⁰Ansi Esther Hathak aphan pulo, lapen Mordekai aphan birta papilo,

¹¹“Recho aban atum an lapen recho adet adang alongritin amonit atum eson alam chinilo lake kehanghedet abang, pinso-arlo seta arlo atikup recho along kedam abangphu tin thinangji la esonnat arondo, lapen jongsi ser achinso badu anat setame otdong lote la thinangnelo. Lapen non ni 30 lo seta recho along kedamji aphan nehanghelang.”

¹²Lapen halatum Mordekai aphan Esther kepu ason an thanlo.

¹³Ansi Mordekai halatum aphan thaksi Esther aphan pathantoilo, “Kaprek a-Judia atum apar nang recho ahem pen jok-longji pura mathari.

¹⁴Pima nang jongsi lason ahut dojoi pu seta Judia atum aphan akaprek ahin pen akerap longsi jokji! bonta nang lapen nangpo ahem asor ke virdet po. Lapen mat chini, lason ahut aphansi nang rechohem kevanglong kalima?”

¹⁵Ansi Esther Mordekai aphan kethakjisi halatum aphan pulo,

¹⁶“Damra Susa along kelong an a-Judia atum pangrumnon lapen nephan an humra jothom nithom an pachoche pajunje nang, lapen ne, nebanpi atum ta lasonsi an humpo. Ansi la aron kalidet seta ne recho along dampo, lapen jongsi ne thinangji pu seta ne thipo.”

¹⁷Lasi Mordekai damsi Esther alangliphan kepaklemtoi asonthotsi kadokave klemlo.