Read Karbi ESTHER 6 Bible Online

ESTHER 6 - Karbi bible

ESTHER 6

¹Halabangso ajo recho amek jang thekthedet-lo; lapen alangli ningdo-e akam aloh mate phurkimo aloh-heihei kepavanji aphan hukum-heihei pilo, lapen halahei recho angno porhelo.

²Lapen kosonsi Bigthana lapen Teresh pu banghini recho akasi-entang atum latum hongthu kehon abang Ahasuras Recho aphan kepathiji abidi keri alamjir Mordekaisi thanlo pu ketoktang long-lo.

³Lapen recho pulo, “La apot Mordekai aphan kopi aman mate anong-e pitang-loma?” Ansi recho aphan kangduk aban atum thak-lo, “Alangliphan thangta klemklelang.”

⁴Lapen recho pulo, “Tikup komatsido?” Lapen amat Haman recho ahem angtan atikup pen arlo vang-lo, alangli kepaselamtang kokthat kepi athengpi athak Mordekai aphan kokthat kepiji ahukum recho pen kehangjisi vang-lo.

⁵Lasi recho, recho aban atum alangli phan thanlo, “Hamansi tikup arlo arjapdingsido.” Lapen recho pulo, “Alangliphan pavangnon.”

⁶Lasi Haman arlo vang-lo lapen recho alangliphan pulo, “Recho man kepiji aningkehang abangphan kopi klemnangji?” Lapen Haman aning arlo chepulo, “Ne pen apar komat aphansi recho man kepiji aning hangjilangma?”

⁷Lapen recho aphan Haman pulo, “Recho man kepiji aning kehang abangphan

⁸recho kechingthangtang ape vanra lapen recho kardontang alosei ta pavannang lapen aphu athak recho aphutup pachekupnang.

⁹Lapen bangso ape lapen alosei vanra recho akethenei arechoso atum angbong pen inut arideng pahodainang lapen halatum recho man kepiji aning kehang abangphan papangchoi lonang lapen bangso alosei athak pardonra rongsopi atovar padamnang lapen angno ‘Recho man kepiji aning kehang abangphan lasonsi klemdetpo’ pu pahangkong lonang.”

¹⁰Ansi recho Haman aphan pulo, “damserak rak-ra pe lapen losei enra nang kepu asonthot-le recho anghap amahang kangni Mordekai pu Judia abangphan lahei klemnon. Nang keputang alam athetin pachekoknang.”

¹¹Ansi Haman pe lapen losei ponsi Mordekai aphan pangchoilo lapen losei athak pardonsi rongsopi atovar padamlo lapen angno “Recho man kepiji aning kehang abangphan lasonsi klemdetpo” pu hangkong-lo.

¹²Lapen Mordekai recho anghap anat nangchevoilo. Bonta Haman chirucharnapsi aphu pe charkulun pen amethang ahem anat chedam serak-lo.

¹³Lapen Haman apiso Zeresh lapen ajirpo do an aphan alangphan keplang tang alam than-et-lo. Ansi alangli kethek kere atum lapen apiso Zeresh alangliphan pulo, “Komat angnosi nang keremcheng-loma, la jongsi Mordekai Judia akhei amonit pulote nang alangliphan hai un-elo, bonta alangli ingno remvekpo.”

¹⁴Halatum chingkibom ahut recho kasi-entang atum vangsi Haman aphan Esther kesiktang akecho-kejun along ponserak-lo.