Read Karbi ESTHER 7 Bible Online

ESTHER 7 - Karbi bible

ESTHER 7

¹Lasi recho lapen Haman, Esther rechopi pen kecho-kejun aphan damlo.

²Lapen nini arni halatum chojunbomlang ahut Esther aphan puthulo, “Nang kopisi choningrijima? La nedet achitim an seta nangphan nangpi detpo.”

³Ansi rechopi Esther thaksi pulo, “Ne jongsi nanglipen kangjinso long-lo O recho, lapen recho aningdok pulote ne kehangke nephan pareng-long tha lapen ne khei amonit aphanta pareng-longtha, la ne choningrilo.

⁴Athe kepavirdetji, kepathi-etji lapen kepavedetji aphansi ne lapen ne khei amonit aphan jordet-lo. Jongsi netum aphan banpo banpi keplangjile jorchot pulote ne dojoiji apot-lo, athe netum akesungchot ke recho aphan kephangno ason pen pangbarno.”

⁵Ansi Esther rechopi aphan Ahasuras recho pulo, “La komat-lo, lapen konat-sido lason akam aning arlo keklemji pu abang?”

⁶Lapen Esther thaksi pulo, “Netum aphan kepasung abang lapen hotur ke bangso kehingno Haman helo!” Ansi recho lapen rechopi angno Haman pherepik-lo.

⁷Lapen recho aning thisi kecho kejun pen thurphlutsi recho ahem aberi anat damjuilo; bonta Haman dokoksi Esther rechopi pen apran kejokji aphan choningrilo, athe recho alangphan kepasungjisi chesiktang-lo pu chechinilo.

⁸Lapen recho aberi pen halatum ha kecho-kejun chiruithu ahut Haman ke Esther kedo ahongplang athak klithor thek-longsi recho pulo, “Ne ingno laso abang rechopi aphan langrem jilang ma?” Lapen recho angho pen bangso alam bardet pen amat halatum Haman amahang dipthip-lo.

⁹Ansi Harbona, recho akasi-entang atum angbong pen inut kangduk abang pulo, “Recho apran kerai abang Mordekai aphan kokthat kepijisi ingrup 50 akangtui athengpi Haman ahem methang la paselamsi sik-lo.”

¹⁰La pen recho pulo, “Haman aphan hadak-le kokthat-otnon.” Lasi Haman, Mordekai aphan kokthat kepiji pu kesiktang athengpi athak halatum Haman aphan kokthat-ot-lo. Ansi recho aningkethi hamlo.