Read Karbi ESTHER 8 Bible Online

ESTHER 8 - Karbi bible

ESTHER 8

¹Lapen halabangso arni amat Ahasuras recho Judia atum ahotur Haman ahem Esther rechopi aphan pidet-lo. Lapen Mordekaita recho angno vang-lo pima langli lapen Esther kechepho alam, Esther, recho aphan thandet-lo.

²Lapen recho Haman pen keche-enthu sap ketheng-i a-arnan chephloksi Mordekai aphan pilo lapen Esther ta Haman ahem kelang abang Mordekai aphuthak bat-lo.

³Lapen Esther, recho aphan puthulo, alangli recho akeng-ri klibupsi chirulo lapen ha Agagit asor Haman, Judia atum aphan kehingno keklemji abidi pen kephriji aphan choningrilo.

⁴Lapen recho ser achinso Esther anat otdong-lo,

⁵lapen Esther thursi recho angno arjapding-lo, lapen alangli pulo, “Jongsi recho la aningdok pulote lapen nephan recho ingjinsolo lapen recho amek angden chok-lo, lapen alangli neliphan aningdok-lo pulote Hammedatha asopo Haman, Agagit asor keklemji pu ketoktang alam lake recho adet adang alongritin kedo Judia atum aphan kepavirji pu akam kephriji aloh patoknang.

⁶Pima nekhei aphuthak kevir nangji akehingno ne kopusi chelangdunding thekpoma? Lapen ne chepho-chero atum akevir kopusi ne chelangdunding thekpoma?”

⁷Ansi Ahasuras recho, Esther rechopi lapen Mordekai, Judia aphan pulo, “Langtha, neli Esther aphan Haman ahem pitang-lo lapen halabangso aphan ke halatum kokthat kepi-i athengpi athak kokthat-ot-lo, pima la Judia atum aphan kepavirjisi abidi rilo.

⁸Lapen Judia atum aphan akemele ning kedok aling recho amen pen lapen recho asap ketheng-i a-arnan pen la sap thengnon, pima recho amen pen ketoktang pachethang alam lapen recho a-arnan pen sap kethengtang alam baduta phri un-elo.”

⁹Halaso ahut recho achunbang atum aphan pahang-lo la ke chiklo jonthom mate Sivan achiklo niphai 23 arni lapen isi alam Mordekai hukum kepi an atengsi ha Judia a-Govornorkethe atum lapen govornor atum lapen alongritin arechoso, India pen ha Ethiopia adet an 127 alongri an aphan loh tokdet-lo, alongritin amethang amek lapen akheitin amethang alam lapen Judia atumta amethang amek pen amethang alam pensi pachethang lo.

¹⁰Recho amen pensi la tokdet-lo lapen recho a-arnan pensi sap thengdet-lo, lapen aloh-heihei prapjin alosei kardonthek atum arideng lodunlo. Halahei recho akam aphan achili keme pen kepaplangtang aloseilo.

¹¹Kepon aloh alam lahelo, arong arong kedo a-Judia atum an chingrum pen amethang apran aphan chesong dun-un pusi recho ahukum tholo, jongsi risim kedo arat ajakong lapen longri arat atum thurra Judia atum an, osomar tame, arlosomar aphuthak tame, tengkheng lote Judia atumta chedandun pen halatum aphan pavir, pathi lapen pavedetsi amar atar thidun-un.

¹²Lake arnisi angbong amat lake niphai 13 arni, Adar achiklo mate krehini achiklo Ahasuras recho adet alongritin aphan alamlo.

¹³Alongritin ketoktang ahukum aloh epak pak kepachethangjisi arattin akhei aphan lodet-lo, lapen kadokave arat atum an aphan kepachethang pen ajok lapen halabangso arni hotur atum aphuthak alar kehuijisi Judia atum chesiknangji.

¹⁴Lasi pherangke atum recho akam aphan ke-en alosei ardonsi recho ahukum sodak apot dam serak-rak-lo, lapen Susa arongsopi kethe angbong laso ahukum pachethang-lo.

¹⁵Lapen Mordekai akelu lapen akelok, recho ape chingchoilo, lapen ser aphutup kethe chekup-lo lapen hepi arje ul achoi keding ta chingchoi si recho angno pen nangbarlo la apot Susa arongsopi kethe ning arong pen hangjolo.

¹⁶Judia atum kethe-ang long-lo lapen chehoksi aning arong chepi lo lapen aman dolo.

¹⁷Lapen alongritin, arongsopitin recho ahukum kele adim an Judia atum chehoksi aning arong chepilo lapen isi kecho-kejun aphan kesang arni padolo. Lapen det arat ake-ongpi atum Judia cheplang-lo, athe halatum non Judia atum aphan pherelo.