Read Karbi ESTHER 9 Bible Online

ESTHER 9 - Karbi bible

ESTHER 9

¹Lapen krehini achiklo lake Adar achiklo, la niphai 13 arni Judia ahotur atum halatum aphan kehaijipu aning chethe-olo, atheke recho ahukum lapen aron kepachun nangleji dokdok-lo, bonta arnisi angbong amat prekdak-lo, lapen Judia atum aphan kehijim atum aphuthak halatum haidet-lo,

²Judia atum aphan kephangnoji pu keri atum aphan ketengkhengjisi Ahasuras adet alongritin a-Judia atum chepangrumpet-lo. Lapen baduta halatum angno arjap haihedet-lo, athe halatum Judia atum aphan kephere, rat atum aphuthak dolo.

³Alongritin arechoso, a-Govornorkethe atum lapen a-Govornor atum lapen recho akam keklem atum kedo-anta Judia atum aphan rapdunlo, athe halatum aphuthak Mordekai aphan kephere dolo.

⁴Pima Mordekai non recho ahem inut ajakong thepik abang lapen anongta det alongritin an chethang-lo lapen Mordekai ajakong theponbomsi ajakongthepik abang plang-lo.

⁵Lasi Judia atum ahotur atum an aphan nokjir pen thusi pathilo, lapen pavedet-lo lapen halatum aphan kehijim atum aphan aning kehang alingsi klemlo.

⁶Susa arongsopi along amat Judia atum bang 500 amonit aphan pathisi pavirlo.

⁷Parshadatha, Dalphon, Aspatha,

⁸Poratha, Adalia, Aridatha,

⁹Parmashta, Arisai, Aridai lapen Vaizatha

¹⁰Judia ahotur Hammedatha asopo Haman asopo bangkep atum aphan halatum pathilo, bonta kethipon-un amar-atar halatum asapta ot-edet-lo.

¹¹Halabangso arni amat halatum Susa det arongsopi arlo kepathi aphai recho aphan than pachinilo.

¹²Lapen Esther rechopi aphan recho pulo, “Susa det arongsopi kethe along Judia atum bang 500 amonit lapen bangkep Haman asopomar aphan pathilo. Lapen recho alongri kaprek-heihei along halatum kopu-an klemlone! Non nangning kehang kopilo? La nangphan nangpidetji. Lapen nang kopi ason choningriji dolangma? La jokta nang pidetpo.”

¹³Lapen Esther pulo, “Jongsi recho aningdok-lote, pini ahukum ason thakthak penapta Susa kedo a-Judia atum lason keklemjile hukum tho iktha lapen Haman asopo bangkep ha kokthat kepi-i athengpi athak kokthat papinang.”

¹⁴Lasi rechota lasonthot kepaklemji aphan hukum pilo; isi ahukum Susa along pilo lapen Haman asopo bangkep aphan kokthat ot-lo.

¹⁵Judia atum Susa along kedo an Adar achiklo niphai 14 arni chepangrumsi bang 300 amonit Susa along pathilo bonta kethipon-un amar-atar aputhak ot-edet-lo.

¹⁶Lapen recho alongritin kedo akaprek a-Judia atum chingrumsi lapen apran kecharaijisi chesong-lo lapen halatum ahotur kepasung pen jok-lo lapen halatum aphan kehijim atum angbong pen bang suri 75 amonit pathilo, bonta kethipon-un amar-atar aputhak halatum asapta ot-e det-lo.

¹⁷Lake Adar achiklo niphai 13 arni lapen 14 arni sang-si kecho-kejun lapen kechehok arni pinchong-lo.

¹⁸Bonta Susa along kedo a-Judia atum niphai 13 arni lapen 14 arni anta chingrumlo lapen niphai 15 arni si halatum kesang lapen kechehok arni pincong-lo.

¹⁹La apotsi rong pen kevang rongso kedo a-Judia atum ke Adar achiklo niphai 15 arni si kechehok lapen kecho-kejun lapen kesang arni pinchongsi lahin lahin kecho ahormu-heihei chepajir seroilo.

²⁰Lapen Mordekai bangso alam-heihei toksi Ahasuras alongri tebok-terei lapen kehelo kedo a-Judia atum aphan loh lolo.

²¹alangli kepathir jisi Adar achiklo niphai 14 lapen 15 arni ke, aningkanvangta talon nangji pusi tok-lo.

²²Halahei arni Judia atum hotur kepasung pen kejok-long lapen halabangso achiklo ningduk pen chehok-long, lapen kechiru-charnap arni pen ning arong kechepi arni plang-lo. Lasi halatum bangso akecho-kejun lapen kechehok lapen lahin kecho ahormu chepajir seroi lapen keduk-kelak atum aphan dan kepi arni talon nangji pusi thanlo.

²³Lasi Mordekai ketoktang asonthot Judia atum keklemponjisi halatum chengtang-lo.

²⁴Pima Hammedatha asopo Agagit asor, Haman lake Judia atum ahotur lapen Judia atum an kepavirdetji abidi rilo, laso aphan Pur lake khadot pathulo, la Judia atum aphan kepavir arni kethik-i aphanlo,

²⁵bonta Esther, recho angno vangsi la alangli Judia atum aphan kepinchong abidi kehingno amethang aphuthak pavangnang lapen alangli sopo atum ha kokthat kepi-i athengpi athak kokthat papi-et lonang pu recho ahukum patok-lo.

²⁶Lasi nonputa bangso arni Pur amen pensi Purim pu irlo; lasi bangso aloh alam an lapen halatum bangso alam kepho alam ason an lapen halatum aphan keplang alam an pen apot

²⁷Judia atum methang aphan lapen aso-asu atum aphan lapen Judia akur kedun atum aphan la asapta tengnenepin pen aningkanvangta la nini talon ponbomji aphan ketok ateng pen aron pathik detsi chechak-lo.

²⁸Anke bangso arni-heihei chemathathu nangpo, a-ove ove anta adontin, alongritin lapen arongsopitin bi ponver nangji lapen labangso Purim arni-heihei ke Judia atum angbong pen labangso kechemathathu avedet-lo puke pupedet nangji.

²⁹Ansi Abihail asopi Esther rechopi lapen Mordekai, la Judia abang jakong do-an pen bangso Purim alam kepathirjisi hini aloh tok-lo.

³⁰Lapen Mordekai Judia atum an aphan Ahasuras recho alongri 127 an aphan aningkangsam alam lapen ningkepathe alam aloh lolo.

³¹Anke labangso Purim arni-heihei halatum kethiktang asek apor si talon nangji pusi Mordekai, Judia abang lapen Rechopi Esther ta Judia atum aphan hukum pilo lapen halatum amethang lapen halatum aso-asu atum aphan halatum an kehum-heihei lapen chiru-charnap alam aron chepathiktang-lo.

³²Lapen Esther ahukum pen bangso Purim aron alam pathirmuchot-lo, lapen la loh along tokdet-lo.