Read Karbi KEBAR 10 Bible Online

KEBAR 10 - Karbi bible

KEBAR 10

¹Anke Moses aphan HEMPHU pulo, “Damra recho aphan langdamnon. La lapen achakri atum aphan Nesi aning pangtang-lo, latum angbong lahei kemanghumeme akam kepaklangji aphansi keklemlo,

²lapen ke nangtumta nangso-nangsu aphan kopusonsi Ne Ijip asor aphan manghumeme akam keklem ahut kepaluvok loma kechethanji aphanlo. Nangtum kedo-anta Ne helo HEMPHU lo pu chinipo.”

³Lasi Moses lapen Aaron atum recho along damlo, lapen pulo, “Ibri atum a-Arnam, HEMPHU si kepulo, nang ni ko-ansi nephan chehodai mobomjilang? Nerat aso aphan padamlongnon, anke latum nephan Ne archo longpo.

⁴Nang jongsi kroimobom pulote, penap nangdet along longvur Ne pavangpo.

⁵Latum lapu-an ke-ongji latum longle dithippo. Herai kephangnone amar an longvur atum phangnopo, thengpi kepangjok arong anta.

⁶Nang hem, lapen nang saihemphu atum ahem, lapen rat atum ahem latumsi plengsetpo. Latum ke nangphusar atum kethek-long apar hingno muchotpo.” Anke Moses chetevarsi damjuilo.

⁷Alangliphan recho achakri atum pulo, “Ko-ansi laso amonit etum aphan epasungbom jilangma? Israel amonit atum aphan padamlongnon, anke latum a-Arnam, HEMPHU aphan archo longpo. Ijip virtang-lo pu nangli chechinine langma?”

⁸Lasi Moses lapen Aaron aphan recho along vanthudet-lo, lapen latum aphan alangli pulo, “Nangtum nang Arnam, HEMPHU aphan damra archo damtame. Bonta ahokpet pen komatmatsi kedamji?”

⁹Moses thak-lo, “Netum kedo-an dampetji, netum asomar lapen arlengkesar atum anta. Nelitum asopomar lapen asopimar atum, lapen nelitum abiresak lapen abi-heihei, lapen achainong-heihei anta cheponji, pima HEMPHU aphan man kepijisi nelitum rong-aje amei padoji.”

¹⁰Recho pulo, “HEMPHU amen neli semetang-lo, nangtum along arlosopimar atum lapen asomar atum ne nangpadun-longle! Nangtum kethurkrapjisi keklemlo, la chinidak-lo.

¹¹Kali! Pinso atumsi damchotpo lapen HEMPHU archo damchotpo, lasi nangtum nangning kehang pulote.” La pen amat Moses lapen Aaron aphan recho angno pen phlungjuilo.

¹²Anke Moses aphan HEMPHU pulo, “Longvur kavangjile Ijip adet aphuthak nangri chirungnon. Latum vangsi arong kevang asontin cho-etpo, lapen herai pen kejok arong an chopo.”

¹³Lasi Moses achin chirung-lo, lapen HEMPHU nihang anat pen det aphuthak tomon pavang-lo nerlosini lapen jopangthang pajap-lo. Adap ke longvur vanpak-lo.

¹⁴Latum ahursi vangpak-lo, lapen det adang bithe inghupak-lo. Lahelo longvur ahur kethenei, kethek longtang lapen kethek longjilang angbong.

¹⁵Latum longle athak ik-lirletik an bonthip-lo; latum herai kepamo amar an cho-et-lo, thengpi athe anta pangjokjedet-lo. Ijip adet along kelirseng ason thangnat ta thengpi arong along thek-longle det-lo.

¹⁶Anke Moses lapen Aaron aphan recho abang prapjin pen pahang-lo lapen pulo, “Ne nangtum Arnam, HEMPHU anat lapen nangtum anat ne pap klemtang-lo.

¹⁷Non ephong nepap nediya detnon, lapen nangtum Arnam, HEMPHU aphan laso akedukphrat akopai ne pen kepondetjile ne ardom pinon.”

¹⁸Recho aphan Moses otekangsi HEMPHU aphan ardomlo.

¹⁹Anke nihang atomon nichi atomon kethe HEMPHU lardetsi longvur kedo-an paponphaksi Suez alangbi along pachevar-et-lo. Ijip adet ejonnat aphelongta thek-longle det-lo.

²⁰Bonta recho aphan HEMPHU aning pangtangrak-lo, lapen la Israel atum aphan padam longle det-lo.

²¹Moses aphan HEMPHU pulo, “Sining-inghun anat nangri jongnon, lapen kangting-lo pu kechini dorchit akangting athan Ijip adet adang bithe kedipthipji aphan jongnon.”

²²Sining-inghun anat Moses ari jong-lo, lapen det adang bithe nithom ingtingthip-khangjang-lo.

²³Ijip asor lahin-lahin chethek-longle det-lo, lapen halabangso arni baduta ahem che-o-edet-lo. Bonta Israel aso atum kedo adim ke the-angdang-lo.

²⁴Moses aphan recho hang-lo lapen pulo, “Nangtum damra HEMPHU aphan archo damtame, nangtum along arlosopimar lapen asomar atum anta nangpadun nang. Bonta nangtum abiresak, abi-heihei lapen chainong an ladak padovek nangji.”

²⁵Moses thak-lo, “Kethokji aphan lapen kephrin athok-heihei HEMPHU netum Arnam aphan kepiji api nangli nepi nangji.

²⁶Kali, nelitum api nelitum cheponji; ejonnat ta nelitum bi tekangke. HEMPHU, netum a-Arnam aphan karchoji aphan nelitum methangsi chongvailong nangji. Lapen nelitum hadak leletik koloso api abangsi alangliphan kethok nangjima nelitum chinine.”

²⁷Recho aphan HEMPHU aning pangtangrak-lo, lapen alangli latum aphan padamlongledet-lo.

²⁸Alangli Moses aphan pulo, “Ne ingno pen damnon! Nangphan puthot nangthek-longledet nangji! Ne nang kethek-long arni nang thinangji.”

²⁹“Nangli si kechok-lo,” Moses thak-lo. “Nangli neliphan puthot nangthekthu longlelo.”