Read Karbi KEBAR 12 Bible Online

KEBAR 12 - Karbi bible

KEBAR 12

¹Ijip along Moses lapen Aaron aphan HEMPHU pulo,

²“Laso achiklo ke nangtum aphan ningkan kecheng achiklolo.

³Laso kepinkhat alam Israel akhei kangthim aphan thannon: Laso achiklo kep arni abangphutin apinso ahemtun aphan biresak aso kalite bi aloso ejon ingvai nangji.

⁴Jongsi ejon api kechodetji aphan halabangso ahemtun bihek pulote, alangli lapen adung abang penpen pi ejon chorap nangji, lake monit aphai ateng pen lapen abangphutin kecho unchit an.

⁵Nangtum biresak ejon mate bi ejon ingvaitame, seta la kemesen ningkan isi arta aloso nangji.

⁶Anke kecheng achiklo krephli arni arnikangsam, Israel akhei kangthim pi pathipo.

⁷Rat atum ajehak avi pon nangpo, lapen inghap anujok along hi nangpo, lapen pi kechoji ahem-heihei anghap angsong hi nangji.

⁸Halabangso aningve ok phi nangji, lapen keho ahan lapen thap kave ahim pen cho nangji.

⁹La akevai mate ke-up cho nangne, bonta la phisi akangthim amat, aphu, akeng-heihei lapen aphek-angthin anta cho nangji.

¹⁰Adap kangthang an nangtum la binangne; jongsi cho-et un-e pulote la me phrindut nangji.

¹¹La nangtum kecho paprapjin nangji, pima nangtum kedam nangji aphan chesik nangji, nangkeng kengden chepon nangji lapen nangri chin chepon nangji. La Ne, HEMPHU aphan man kepiji aphan kejok arong-aje plangpo.”

¹²“Halabangso aningve Ne Ijip adet soding damsi pinso aso akleng an pathiji, monit aso tame lapen pi aso tame, lapen Ijip a-arnamso kedo-an aphan adukpiji. Ne HEMPHU lo.

¹³Inghap anujok-heihei along avi helo nangtum kedo adim angthek-lo. Ne vi thek-long lote nangtum along vurvesi damphitpo lapen Ijip aso aphan aduk kepi ahut Ne nangtum aphan nang pasungselo.

¹⁴Ne, HEMPHU kopisi keklemloma la nangtum kechematha-damjile laso arni isi dhorom arong-aje talon nangji. Kevangji arni anta talonbom nangji.”

¹⁵HEMPHU pulo, “Ni throksi nangtum thap pen keselam ahim cho nangne thapkave ahimle chochot-tu. Nangtum ahem-heihei along kecheng arni thap kedo-an pavirdet nangpo, pima ni throksi angbong jongsi mane abang thap kedo ahim cholo pulote halabangso aphan Ne monit lo pu lakha ponpedet-po.

¹⁶Kecheng arni lapen throksi arni karchoji aphan nangtum nangchetong nangji. Halahei arni jat akamta klemkledetpo, bonta nangtum an chotunlong tahai.

¹⁷Laso arong-aje rimnon, pima laso arnisi Ne Ijip pen nang khei atum aphan nangvanlo. Kevangji arni anta laso arni isi arong-aje arni pura la talon nangji.

¹⁸Kecheng achiklo, ni krephli arnikangsam pen ni ingkoira-isi arni an, nangtum thap kedo ahim chonangnelo.

¹⁹Ni throksi nangtum ahem-heihei thap thek-longledet nangji, mane jongsi thap kedo ahim cholo pulote la det along mahangkethek abang setame labangso aphan Ne rat asolo pu lakha ponpedetpo.

²⁰Nangtum thap kedo amar chochedetpo, nangtum kedo adim an thap kavesi chopetpo.”

²¹Israel ajalin kedo-an aphan Moses hang-lo, lapen latum aphan pulo, “Nangtum abangphutin ejon abiresak aloso mate bi aloso ejon ingvaisi la thu nangpo, anke nang hemtun asor Kejok Amei talon longpo.

²²Tulohi aro enra pi avi kedo aharlung arlo nimra inghap anujok-heihei along lapen hem anghap athak ajor along hi nangpo. Nangtum abangphutinta the-ang-etik hem ori.

²³Ijip aso aphan kepathijira HEMPHU Ijip soding kedam ahut, Alang inghap athak ajor lapen nujok-heihei along vi thek-long pen kethi apherangke nangtum ahem-heihei arlo palut longlelo, lapen nang pathithelo.

²⁴Nangtum lapen nangsomar atum anta laso aron kaike aphan kroiver nangji.

²⁵Nangtum aphan HEMPHU nangkepiji pu kechak alongle along kele ahut laso ajutang aron nangtum klem nangji.

²⁶Nangsomar atum nangtum aphan nang arjulote, ‘Laso ajutang aron kopi athelo? pu arjulote’,

²⁷nangtum thak nangpo, ‘HEMPHU aphan aman kepijisi la kejok athok-lo, pima Ijip along Alang Israel atum ahem-heihei pajok-lo. Alang Ijip aso aphan pathilo, bonta etum aphan epajok-lo.’ ” Israel aso atum akengphu patongruisi archolo.

²⁸Anke latum damlo, lapen latum Moses pen Aaron aphan HEMPHU hukum kepitang ateng pen klemlo.

²⁹Jirlo apor HEMPHU Ijip along kedo-an pinso a-oso akleng aphan pathilo, recho asopo recho anghoi apoton pen dang-lok chainong ahilik kehon abang asopo an; pi kechingthok-cheng asota pathi-et-lo.

³⁰Halaso aningve, recho, achakri atum lapen kedo-an Ijip aso atum amek prangdak-lo. Ijip adet soding asekethe pen kechiru hangjolo, pima asopo kethithe ahem ehum natta avedet-lo.

³¹Halaso aningve amat Moses lapen Aaron aphan recho hangdetsi pulo, “Damnon, nang lapen Israel atum an; Ne det onon; nangtum kehang ateng damra HEMPHU aphan archo damnon.

³²Nangtum abiresak, abi-heihei lapen chainong cheponra damnon. Lapen nephuthak ahirjume kelongji aphan ardomnon.”

³³Rat atum kedam serakjisi lapen det ke-ojisi Ijip aso atum choningrilo; halatum pulo, “Nangtum jongsi o-e tangte netum kedo-an thi-etpo.”

³⁴Lasi rat atum him kangther anthong along thapsi pe pen telomhet-lo, lapen parphangponlo.

³⁵Moses kepu asonsi Israel aso atum klemlo, lapen Ijip aso atum along ser, rup lapen pe-ri pahangtoilo.

³⁶HEMPHU Ijip aso atum Israel aso aphuthak pangjinsolo, lapen latum kehang ateng an papidunlo. Lasonsi Israel aso atum Ijip adet akhi ponlo.

³⁷Israel atum akeng pen Rameses pen Sukkoth anat barlo. Hadak lak throk anbak pinsolok amonit do, arloso lapen asomar atum aphan ke aphai lakha ponpedet-lang.

³⁸Ongdung amonit lapen ongdung abiresak, bi, lapen chainong ta halatum along cheponlo.

³⁹Anthong pen latum Ijip pen kevan athapkave ahim selamlo, pima latum aphan Ijip pen lapu-an phlung paprap-lo, latum a-an kechesikji aphan mate thap kedo ahim kechesikji apor anta longledet-lo.

⁴⁰Israel aso atum Ijip adet ningkan 430 an dolo.

⁴¹Ningkan 430 kechok arni, HEMPHU arat akhei kedo-an atum Ijip olo.

⁴²Ijip pen latum aphan HEMPHU kevangji pu kehonding ahut lake ajo apor; halaso ajo amat kaike aphan lapen kevangji arni anta Israel atum kehonding pen kerim nangji pura HEMPHU aphan hodaidet-lo.

⁴³Moses lapen Aaron aphan HEMPHU pulo, “Kejok amei aron-atang lahei helo: Bang adet aso atum baduta kejok a-an cholongle,

⁴⁴bonta kenam tang aban aphan aphrangsi reng-rot enlote la cholong tahai.

⁴⁵Malomso kedochot abang, lapen kerong aklembang atum la cholongle.

⁴⁶Ok akangthim amat keselam ahem along amat cho pa-ik-et nangji; la ingtan pon longle. Lapen pi arrepi-heihei ing-lok-ri.

⁴⁷Israel akhei kangthim laso arong-aje talonvek nangji,

⁴⁸bonta reng-rot ke-en-e abangpo la cholongle. Jongsi bang adet aso atum nangtum angbongsi kedolo lapen HEMPHU aphan aman kepijisi kejok amei talonji aninghang-lo pulote la ahem sopinso an aphan reng-rot endet nangjilang. Anke labangso abangphan Israel alongsi amahang-kethek lo pu lakha nangpo, lapen rong-aje along nang pajalang dunnang.

⁴⁹Lasonthotsi nang korte Israel aso atum aphanta lo, lapen bang adet aso atum nangtum angbong kedo atum aphanta lo.”

⁵⁰Moses lapen Aaron aphan HEMPHU hukum kepi ason an Israel aso atum kroilo, lapen klemlo.

⁵¹Halaso arnisi Israel atum aphan Ijip pen HEMPHU vandet-lo.