Read Karbi KEBAR 13 Bible Online

KEBAR 13 - Karbi bible

KEBAR 13

¹Moses aphan HEMPHU pulo,

²“Pinsomar sokleng atum an Nephan nehodai petnon, athema Israel asokleng pinsomar an lapen pi kechingthok-cheng aso an lake Nemarlo.”

³Rat atum aphan Moses pulo, “Laso arni chemathanon, nangtum Ijip ke-o arni, nangtum ban kedo adim. Laso arnisi HEMPHU ajakong kethe pen nangtum aphan nangvandet-lo. Thap kedo ahim ke chochedetpo.

⁴Nangtum Abib , kecheng achiklo arni si nangtum Ijip ke-o arnilo.

⁵Nangphusar atum aphan Kanaan aso atum, Hitti aso atum, Amor aso atum, Hivi aso atum, Jebusi aso atum alongle HEMPHU pipo pu chechak pamelo. Nangtum aphan Alang halabangso keplang lapen aho-or kedo alongle along nangkevan ahut, nangtum labangso arong-aje kecheng achiklo aningkan-vangta talonver nangji.

⁶Ni throksi nangtum thapkave ahimsi cho nangji, lapen ni throksi arni HEMPHU aphan aman kepijile rong-aje talon nangpo.

⁷Ni throksi nangtum thap pen keselam ahim cho nangnelo; nangtum ahem-heihei along mate det along thap avedet nangpo lapen theklongledet nangpo.

⁸Rong-aje kecheng ahut, nangsomar atum aphan Ijip adet ke-o ahut HEMPHU nangtum aphan keklemtang ason an apotsi la keklemlo pu thannon.

⁹Laso aketalon ke isi akechematha-damlo, nangri along pine chekok-het ason mate nang tehang athak kerak-het ason; la nangtum aphan kaike ning kechebiji aphan lapen HEMPHU aron kangchapji aphan, pima Alang jakong kethe pen nangtum aphan Ijip adet pen HEMPHU nangvandet-lo.

¹⁰Aningkan-vangta athik apor ahut-le laso arong-aje talon-non.”

¹¹HEMPHU nangtum aphan lapen nangphusar atum aphan Kanaan aso atum alongle along vanvekji pu nangchak-pamelo. Alangli la nangtum aphan nangkepi ahut,

¹²nangtum sopomar akleng lapen pi kechingthok-cheng aso HEMPHU aphan pi nangji, sokleng anut-tin, lapen pi kechingthok-cheng aso lake HEMPHU amarlo,

¹³bonta nangtum Alang pen gadha ajontin la adim alar abiresak aso ejon pen pen namdet-ra palardetnon. Gadha alar jongsi namji ninghanghe pulote la achethok ingdisutnon. Nangtum abangphutin pinso sokleng apharman alar nang chenam thuvek nangji.

¹⁴Mononphi la ketalon athe kopilo pu nangsopo nang arjulote, la aphan nang thak-nangpo, “Amethang thedung ajakong pensi etum aphan HEMPHU Ijip adet pen evandet-lo, hadak etum ban si kedo nang-lo.

¹⁵Ijip arecho aning kangtangrak ahut lapen alangli netum aphan nepadam longledet ahut, Ijip adet asokleng an pathi-et-lo, monit lapen pi asota. La apotsi pi kechingthok-cheng aso netum HEMPHU aphan athok pajirlo, bonta netum pinso asokleng apharman netum chenamthu det-lo.

¹⁶Laso akechemathadam ketalon ke lake isi eri along mate atehang along-heihei kechekok-het asonlo; lake Alang jakong kethe pen etum aphan Ijip pen HEMPHU evandet-lo pu kechematha damlo.”

¹⁷Israel atum aphan Ijip arecho kepadamlong ahut, Philistia atalo akung anat kedam atovar la anat Arnam ja ponpedet-lo, la akekengnei atovar lo seta. Arnam mathalo, “Ne, rat aso atum ron chedan nangji pura latum Ijip adet kechevoithuji pu aning ne pachelar ingtungte.”

¹⁸La lesi latum aphan Alang talo ke-er dongput kejejangtang ajo anat pakongvaisi ponlo. Israel aso atum ron kechedanji aphan chesik koilo.

¹⁹Joseph arrepi Moses ponlo, atheke Israel atum aphan Joseph seme patang pame ateng-lo. Joseph pulo, “Nangtum aphan Arnam nangkepajok ahut, nangtum laso adim pen ne repi-heihei ponvek nangji.”

²⁰Israel atum Sukkoth osi kejejangtang ajo akung Etham along mukam chekimlo.

²¹Anerlo latum aphan tovar kejajisi HEMPHU inghun anujok pen latum aphrang padambomlo, lapen ajo kepathe-angjisi Alang halatum angno me anujok pen japonlo, lasi latum ajo-nerlota dambomlo.

²²Anerlo ahut inghun anujok ke kaiketa rat atum athengnosi dolo, lapen ajo ke me anujoksi dolo.