Read Karbi KEBAR 14 Bible Online

KEBAR 14 - Karbi bible

KEBAR 14

¹Anke Moses aphan HEMPHU pulo,

²“Israel atum aphi anat pachetevarjile thannon lapen Pi-hahiroth athengno Migdol lapen Talo Ke-er adak, Baal-Jephon adungle mukam pachekimnon.

³Recho abang mathalo, Israel atum det angbong tovar chenine pen kemanghulo lapen kejejangtang ajosi latum dokok-lo.

⁴Alangliphan Ne aning pangtangrakpo, lapen la nangtum aphi phi hungdunpo, lapen la lapen aron-armu aphuthak kehai lake Ne men aphan anong vanpo. Anke Ijip atum Ne helo HEMPHU lo pu chinipo” Israel atum aphan kethan ateng si latum klemlo.

⁵Rat atum kat tang-lo pu alam aning chelarlo, lapen pulo, “Elitum kopisi keklemloma? Israel atum aphan eli pakat-toilo lapen latum aphan eli ban en longledet-lo!”

⁶Recho abang ronhemkonglong arlo chethap-lo, lapen la aron armu atumta chesikding-lo.

⁷La aronhemkonglong kedo-an pen barlo, hum pharo throk akemenei penpen, halatum achakri atumsi hukum pilo.

⁸Recho aphan HEMPHU aning pangtangrak-lo, Israel atum kehaidong pen kedambom aphi phi la hungdunlo.

⁹Kedo-an alosei, ronhemkonglong lapen kardon atum penpen Ijip aron armu atum, halatum aphi phi hungdunlo, lapen Pi Hahiroth lapen Baal-Jephon adung Talo Ke-er along latum mukam kechekim adim halatum aphan chephodunlo.

¹⁰Recho lapen la aron-armu atum, Israel atum anat kevang thek-longsi latum pherepik-lo, lapen kerap kelongjisi HEMPHU aphan choningrijolo.

¹¹Latum Moses aphan pulo, “Ijip along thiri avedet-loma? Nangli netum aphan ladak kejejangtang ajo kepathiji aphan tong kevanma. Chelangtha, nangli nelitum aphan Ijip adet pen kevan kopisi keklem loma!

¹²Lason plangji pu nangliphan aphrang pen nelitum nangthanthe langma? Nelitum aphan Ijip atum aban paplangver lonang pu nangliphan nangpupe-langma. Ladak kejejangtang ajo kethi apar hadak ban kedo memu.”

¹³Moses thak-lo, “Nangtum phereri! Nangtum adim charjapthip non, lapen kosonsi HEMPHU nangtum aphan nangkepajok poma nangtum pini thek-longpo; lahei a-Ijip atum aphan nangtum kaike aphan thek-longledetpo.

¹⁴Nangtum apharman HEMPHU nang chedanpipo, lapen nangtum thangnatta klem nangnelo.”

¹⁵Moses aphan HEMPHU pulo, “Kopisi nang kerap kelongji aphan kechoningri loma? Rat atum aphan aphrang padambom non.

¹⁶Talo aphuthak nangchin chirungver non. Lang chephardakpo, lapen talo soding Israel atum kekrengphun alongle ajo dam unpo.

¹⁷Ne Ijip aso aphan lapu-an aning pangtangpo, latum halatum aphi phi dunpo, lapen recho, la aron-armu, la ronhemkonglong, lapen kardon atum aphuthak Ne kehai apot nenong the-i po.

¹⁸Ne latum aphan keparem ahut, Ne helo HEMPHU lo pu Ijip atum chinipo.”

¹⁹Arnam apherangke, Israel aron-armu aphrang kedo abang, chetereksi aphi anat damjuilo.

²⁰Inghun anujokta Ijip lapen Israel atum angbong. Inghun Ijip atum aphan pangtingkuk-lo, bonta Israel arat aphan ke pathe-angdang-lo, lasi jo pangthang ron-armu atum lahin-lahin chevang-chedam un-e det-lo.

²¹Moses talo aphan ari pen jarding-lo, lapen nihang atomonpi pen ajok HEMPHU talo aphuthak tomon pajapsi aphi anat pachevoilo. Tomon jo pangthang jap-lo, lapen talo pakrengdang-lo. Lang chephardak-lo,

²²lapen Israel atum talo angbong kekrengdang alongle athak damlo, lapen ar-e, arvi ta lang arpongsi arjap-lo.

²³Ijip atum latum aphi phi hungdunlo, lapen latum aphi halatum alosei, aronhem-konglong lapen kevek atum penpen talo anat dunlo.

²⁴Kethe-ang aphrang me anujok lapen inghun anujok pen HEMPHU nanglangsi Ijip aron-armu aphuthak pasung-lo.

²⁵Alang halatum ronhemkonglong akongtelong pajangthup-lo, anke latum kedam sungkrung-lo. Ijip aso atum chepulo, “HEMPHU si Israel apharman etum pen chedanlo. Eli ladak pen barlonang!”

²⁶Moses aphan HEMPHU pulo, “Talo aphuthak nangri chirungnon lapen Ijip atum aronhemkonglong lapen kardon atum aphuthak lang nangtosailo.”

²⁷Lasi talo anat Moses ari jarding-lo, lapen anerlo apor kai asonsi lang nangchetosailo. Lang pen Ijip atum chepajokji bor-ilo, bonta HEMPHU latum aphan talo arlo panglem-et-lo.

²⁸Lang nangchevoisi ronhemkonglong-heihei lapen kardon atum lapen talo along Israel atum aphan kehungdun aron-armu aphan panglim-et-lo. Latum angbong inutnat ta jokjedet-lo.

²⁹Bonta Israel atum ke talo angbong kekrengdang alongle ajo ar-e arvi lang arpong soding damlo.

³⁰Halaso arni Ijip atum arideng pen Israel aphan HEMPHU pajok-lo, lapen Israel atum halatum aphan talo akung kethi ketipre thek-long-lo.

³¹HEMPHU ajakong kethe pen Ijip atum aphan keparem akam Israel atum thek-longsi latum HEMPHU aphan pherelo; lapen latum HEMPHU aphan lapen aban Moses aphan kroilo.