Read Karbi KEBAR 15 Bible Online

KEBAR 15 - Karbi bible

KEBAR 15

¹Anke Moses lapen Israel atum HEMPHU aphan laso alun lunlo; “HEMPHU aphan ne lun lunji, pima Alang isi anong kethe pen chepahailo; halatum alosei lapen kardon atum aphan Alang talo arlo jok-et-lo.

²HEMPHU ke nejakong lapen nelun, Alang neliphan kepajok abang-lo. Alang ke ne Arnam, lapen Alangphan ne roji, Nepo a-Arnam, lapen Alang phan ne rungji.

³HEMPHU ke ron kechedan abang, HEMPHU helo Alang men.”

⁴“Talo arlo Ijip aron-armu lapen la ronhemkonglong Alang varchorlo; la achakri kemenei atum anta talo Ke-er arlo langjang-et-lo.

⁵Latum aphan karnukpik atalosi dipthip-lo, latum arlong asonsi aklong inglimlo.”

⁶“Nangri ar-e, HEMPHU, jakong thepik; la hotur atum aphan pangje-i.

⁷Nang hotur aphan Nang paremdet khangjang-lo; Nangning kethi karsi sokpun ason halatum aphan me pacholo.

⁸Nang talo aputhak but-phulo lapen lang abui ingtuilo; la arpong asonsi arjap-lo; lapen talo aklong ingtanghet-lo.”

⁹Hotur atum pulo, “Ne latum aphan hungsi nepdunpo; Ne halatum akhi thakdaksi nening hang an en-et-po; Ne nok chesansi halatum kedo-an pavir-etpo;

¹⁰Bonta nangchethe kevang amat, HEMPHU, Ijip atum an langjang-et-lo; Hitui angchin nangnaksi kepherememe alang arlo inglimchok-lo.”

¹¹“HEMPHU, Nang son komatsi arnam atum angbong kedolangma? Nang son kangthir manghumeme komatsi kedolangma? Nang son komatsi manghumeme akam lapen jakong kethe akam keklem unpo?

¹²Nangri ar-e chephajeng-lo, lapen longle netum ahotur aphan joilut-lo,

¹³Nang kechechak alam cheklemvek, nangkepajok arat atum aphan nang jalo; Nang jakong pen latum aphan nang longle kangthir along japonlo.

¹⁴Khei atum arjulong-lo lapen latum pheresi klemhurlo; Philistia atum kephere a-ok chekopdop-lo.

¹⁵Edom ajalin atum pherepik-lo; Moab anokbe atum a-ok klemhurlo; Kanaan arat atum aning ingjir-ilo.

¹⁶Latum aphuthak kethivek nangji akepherememe inghulo. Latum nang jakong thek-long-lo, O HEMPHU, lapen kephere pensi latum arjapdingdang-lo Nang rat atum kedam parpetik-an, Nang ban pen kepajok arat atum.

¹⁷Latum aphan nang arlo vanlo, lapen latum aphan nang inglong athak elo, Nang hem aphan Nang kangvaitang adim, Nang methang kekim a-Kardomhemthepi.

¹⁸Nang, HEMPHU kaike aphan recho choverpo.”

¹⁹Israel atum talo angbong kekrengdang alongle ajo damlo. Bonta Ijip asor ronhemkonglong-heihei halatum alosei kardon atum talo anat kedam ahut, HEMPHU lang vanthulo, lapen lang latum aphan inglum-et-lo.

²⁰Montripi Miriam, Aaron angjirpi, bangpi aprakso cheponlo, lapen kedo-an a-arloso atum bangpi aphi phi dunlo, prakso-heihei thip-lo, lapen kanlo.

²¹Halatum aphan Miriam si lunpilo: “HEMPHU aphan lunnon, pima Alang isi anong kethe pen chepahailo; Alang halatum alosei lapen kardon atum aphan talo arlo varchuilo.”

²²Anke Israel arat aphan Moses Talo Ke-er pen ha Shur akejejangtang ajo japonlo. Athema latum nithom kejejangtang ajo damlo, bonta lang longle det-lo.

²³Anke latum Marah pu adim along nanglelo, bonta hadak lang lapu-an keho latum la jun un-edet-lo. Lasi laso adim Marah pusi amen irlo.

²⁴Moses aphan rat atum pasimulo lapen arjulo, “Netum kopisi kejunpoma?”

²⁵HEMPHU aphan Moses choningri padikhrimlo, lapen la aphan HEMPHU erong athengpi paklang-lo, laso arong lang along varchuilo; lapen ke lang dokjinlo. Hadak latum kedo-kethakji aphan aron-heihei HEMPHU pilo, lapen hadak Alang latum aphan asat enlo.

²⁶Alang pulo, “Ne kechok-lim aron an kroipet-ra klempamenon lapen Ne hukum-heihei an chebipamelo pulote, Ijip aso aphuthak Ne kevan akeso an pen ajok nangtum aphan aduk nangpipelo. Ne ke HEMPHU, nang keso nangpame abang-lo.”

²⁷Puthot Elim along latum nanglelo, hadak lang amek krehini do, lapen sotele arong rong throksi kep do; hadak latum lang akungsi amukam chekimlo.