Read Karbi KEBAR 16 Bible Online

KEBAR 16 - Karbi bible

KEBAR 16

¹Israel akhei kangthim kedo-an Elim pen barlo, lapen hini achiklo, krepho arni latum Ijip odet aphi, latum Sin pu kejejangtang adim nanglelo, lake Elim lapen Sinai adaksi dolo.

²Hadak latum Moses lapen Aaron aphan pasimulo, lapen latum aphan pulo,

³“Netum aphan ha Ijip along HEMPHU nepathi-et asonte mesenji apot-lo. Hadak netum ingnilun pen cholong, ok cholong lapen netum nening hang an akaprek a-anta cholonglang. Bonta nang netum aphan ladak kejejangtang ajo kedo an kepangchir lapen kepathijisi nekevanlo.”

⁴Moses aphan HEMPHU pulo, “Non Ne nangtum kedo-an aphan sining-inghun pen an nang paklopo. Rat atum arnivang barra damnangji, lapen halabangso arni aphan dorphlup pangrum nangji. Lasonthotsi latum Ne kepinkhat-heihei alam kroiloma kroikreloma latum aphan asat enpo.

⁵Ni throk arni latum kai ateng aphan phanni chevan nangji lapen la chesik nangji.”

⁶Lasi Moses lapen Aaron atum kedo-an Israel aso aphan pulo, “Peningve ke nangtum chininangji lake HEMPHU-si nangtum aphan Ijip adet pen nang kevanlo.

⁷Adapprang nangtum HEMPHU kedo aketurbong atur nangtum thek-longji. Alang phuthak nangtum kepasimu alam Alang arjulong-lo, kalang, Alang phuthak, pima netum ke Alang kepinkhat alamsi keklemchot.”

⁸Anke Moses pulo, “La HEMPHU si nangtum aphan arnikangsam ok nangpipo, lapen nangtum nangning hang-an adap cholongpo, pima nangtum kopu-ansi Alang phuthak pasimuloma Alang arjulong-lo. Nangtum netum aphuthak kepasimu ahut, chenamsi nangtum HEMPHU aphuthaksi kepasimulo.”

⁹Aaron aphan Moses pulo, “HEMPHU angno khei kangthim kevangpetji aphan lapen karjappetji aphan thannon, pima halatum kepasimu Alang arjulongtang-lo.”

¹⁰Khei kangthim aphan Aaron keningje ahut, latum kejejangtang ajo anat chetevarlo, lapen menmen inghun along HEMPHU atur keturdang thek-long-lo.

¹¹Moses aphan HEMPHU pulo,

¹²“Israel atum kepasimu Ne arjulong-lo, thannon latum arnikangsam ahut ok cholongpo, lapen adap apor latum aninghang an him cholongpo. Anke Ne helo halatum a-Arnam, HEMPHU lo pu chinipo.”

¹³Arnikangsam apor ongdung avo-ut ahur nang ingjarlo, mukam dipphlirlo, lapen arnikangsam apor mukam akung-kung ar-e totchenlo.

¹⁴Ar-e krengsi, kejejangtang ajo athak ing-arphler lapen ajer-jer athan amar dolo. La ar-e athan ason kevir joike.

¹⁵La Israel atum thek-longsi, la kopiloma latum chininedet-lo lapen lahin-lahin cherju seroilo, “La kopilo?” Moses halatum aphan thak-lo, “Nangtum kechoji aphan lake HEMPHU nang kepi a-anlo.

¹⁶Abangphutin akenang ateng kechopangrumji aphansi HEMPHU hukum nangpilo; hemtun abangphutin linni anbak apharman enpo.”

¹⁷Israel atum la klemlo, ajehak atum ke hum-olo, lapen ajehak atum ke humchonlo.

¹⁸Latum la linlo, kehum-o atum ahin do-o-edet-lo, lapen kehumchon atumta dorde-detdelo. Abangphutin ta akenang atengsi chohumlo.

¹⁹Halatum aphan Moses pulo, “Baduta la penap aphan chobiri.”

²⁰Bonta ajehak atum Moses alam arjujedetsi adap aphan chobichomlo. Puthot arni la ingthan plengset-lo lapen men-uihak-lo, lapen Moses halatum aphan aning thihak-lo.

²¹Adapvangta abangphutin akenang ateng pensi chohumlo; lapen arni solo, longle athak ahin an ke ingjir-et-lo.

²²Throk arni latum batai hini an un-an chopangrumlo, abangphutin aphan lin phli. Laso alam khei kedo-an ajalin atum Moses along vangsi thanlo,

²³Lapen halatum aphan alangli pulo, “Penap ke kesang arni kangthirlo pusi HEMPHU hukum pilo, HEMPHU aphan kepanong arnilo. Pini kopima him keselamji selamnon, kopima ke-upji upnon. Kopima ahin kedo ahim bivetnon, lapen penap aphan chobinon.”

²⁴Moses kepu ateng latum ahin an puthot arni aphan chobilo; la hingnonedet-lo mate la along ingthan avedet-lo.

²⁵Moses pulo, “La pini chonon pima pini ke kesang arnilo, isi HEMPHU aphan panongsi kesang arni lapen mukam angtan nangtum an ri seta longlelo.

²⁶Nithrok nangtum an pangrum nangji, bonta throksi arni, kesang arni thangta avelo.”

²⁷Throksi arnita ajehak atum ke an pangrumdamjisi barlo, bonta latum thangnat ta longledet-lo.

²⁸Anke Moses aphan HEMPHU pulo, “Nang rat atum ni ko-ansi Ne hukum-heihei kekroikre bomjilangma?

²⁹Chemathatha, Ne, HEMPHU si nangtum aphan isi kesang arni nangpilo, lapen Ne nangtum aphan la apotsi throk arni dorphlup a-an nini aphan nangpilo. Abangphutinta throksi arni kedo adim chedo nangji lapen ahem che-o nangne.”

³⁰Lasi rat atum throksi arni kam klemkledet-lo.

³¹Israel arat atum laso a-an aphan manna pusi irlo. Lake isi akelok achili asonlo, lapen pijo alang pen keselam kechome ahim ason.

³²Moses pulo, “Ajehak amanna kebiji aphan etum aphan HEMPHU hukum epilo, eso-esu atum aphan, anke Alang Ijip adet pen ekevan ahut kejejangtang ajo ekepachotoi a-an halatum thek-longpo.”

³³Aaron aphan Moses pulo, “Bong isi en-non, la arlo linni amanna thapnon, lapen aso-asu atum aphan HEMPHU angnole la binon.”

³⁴Moses aphan HEMPHU hukum kepi asonsi, Aaron la Kechejok Asinduk arlo thap-lo, anke la bivermepo.

³⁵Israel atum Manna ningkan phlikep cholo, latum kedoji adim Kanaan adet leletik an cholo.

³⁶(Isi omer ke ephah phankep pen ateng isinat-lo.)