Read Karbi KEBAR 17 Bible Online

KEBAR 17 - Karbi bible

KEBAR 17

¹Israel arat aso kedo-an Sur asangtimili ajo olo, HEMPHU ahukum ateng elong adim pen along kaprek adim dambomlo. Rephidim alongsi latum mukam chekimlo, bonta hadak kejunji aphan lang ave.

²Latum Moses aphuthak pasimulo, lapen pulo, “Netum aphan kejunji alang nepinon.” Moses thak-lo, “Nangtum kopi apotsi pasimuverloma? Kopisi nangtum HEMPHU aphan asat en loma?”

³Bonta rat atum ing-it pik-lo lapen Moses aphan pasimubomlo. Latum pulo, “Kopisi nang netum aphan Ijip pen nekevan loma? Lang kang-it pen netum, netum asomar lapen netum kepangreng api-heihei aphan kepathiji puma?”

⁴Moses HEMPHU aphan kardom padikhrimlo, lapen pulo, “Lahei amonit atum pen ne kopisi keklemthek poma? Latum nephan arlong nekevarjisi chesikding-lo.”

⁵Moses aphan HEMPHU pulo, “Nanglong ajehak Israel ajalin atum cheponnon, lapen rat aphrangle damnon. Nang Nil Aroi karbu achin nanglong cheponnon.

⁶Sinai Anglong along Ne nang ingno arjappo. Arlong athak arbunon lapen rat atum kejunji aphan la pen lang nanglipo.” Israel ajalin atum angno Moses klemlo.

⁷Massah lapen Meribah pusi adim amen irlo, pima Israel atum pasimulo, lapen “Etum along HEMPHU doma mate avedetma?” pu kepu pen ajok latum HEMPHU aphan asat enlo.

⁸Amalek atum vang-lo lapen Rephidim along Israel atum aphan tengkheng-lo.

⁹Joshua aphan pulo, “Penap Amalek atum pen kechedanji aphan ajehak amonit ingvaitha. Nephan Arnam nepapontoi achin pen ne ha inglong angsong otdingsi arjaptherpo.”

¹⁰Joshua aphan Moses hukum kepi atengsi klemlo, lapen Amalek atum pen kechedan jisi damlo, lapen Moses lapen Aaron lapen Hur inglong angsong damlo.

¹¹Moses ari chirungtik ke Israel atum hailo, bonta alangli ri arum chebilote Amalek atum kehai cheng-po.

¹²Moses ari keharjak ahut, kangniji aphan Aaron lapen Hur atum arlong vanpilo, lapen latum ke adung arjapdunsi ari otdunding-lo, la arni chichetik an otdingverlo.

¹³Lasonsi Joshua ke Amalek atum aphan parempamelo.

¹⁴Moses aphan HEMPHU pulo, “Labangso akehai alam tokdetnon, anke la chematha damthekpo. Joshua aphan thannon, Ne Amalek atum aphan pavirdet khangjangpo.”

¹⁵Moses isi adovan builo, lapen la amen “HEMPHU si ne karchak abang.”

¹⁶Alangli pulo, “HEMPHU ape rung pangtuinon! HEMPHU kaike aphan Amalek atum pen chedanverpo!”