Read Karbi KEBAR 18 Bible Online

KEBAR 18 - Karbi bible

KEBAR 18

¹Moses ahupo, Jethro, la Midian akurusar, kedam arjulong-lo, Arnamsi arat aphan Ijip adet pen Israel atum aphan kejapon ahut Moses aphan klempi-et-lo pu alam arjulong-lo.

²Lasi Alangli Moses along vang-lo, alanglilong Moses apiso Zipporah, alangliphan ke-otekang ajirding-olo,

³lapen bangpi asopomar Gershom lapen Eliezer chevanlo. (Moses pulo, “Ne bang adet along bang amonit plang-lo;” lasi alangli asopo inut abangphan Gershom pusi amen irlo.

⁴Alangli ako puthulo, “Nepo a-Arnam si nephan nerap-lo, lapen Ijip arecho arideng kethinangji pen nepajok-lo;” lasi alangli akaprek asopo aphan Eliezer pusi amen irlo.)

⁵Kangthir Anglong along Moses mukam kekim adim, kejejangtang ajo Jethro ke alanglilong Moses apiso lapen bangpi asopo banghini penpen vang-lo.

⁶Latum vangbomlo pu alangli Moses aphan birta lolo,

⁷lasi alangliphan kechetongdunjisi Moses damlo, alangli ingno angphun patongkilo, lapen la aphan ingjup-lo. Pu pu mesenlangma pu birta charju seroilo lapen ke Moses apehem arlo anat damlo.

⁸Israel atum aphan kepajokjisi Ijip arecho lapen arat atum aphan HEMPHU keklem asontin alam Jethro aphan Moses than-et-lo. Tovar kevang ahut rat atum ko-an sung-loma laso alamta alangli phan Moses thanlo, lapen kosonsi latum aphan HEMPHU pajok-loma thanlo.

⁹Jethro lahei alam arjulongsi, alangli ning arongpik-lo,

¹⁰lapen pulo, “HEMPHU kero atheng, Alangsi Ijip arecho lapen arat atum pen nangpajok-lo! HEMPHU kero atheng, Alang rat atum aphan ban pen pajok-lo!

¹¹Non ne chinilo, HEMPHU ke kedo-an arnam atum apar themu, pima Israel atum aphuthak Ijip atum kelangrop akam keklem apot Alang la klemlo.”

¹²Lapen arpum kangthim kephrinji aphan lapen akaprek athok-heihei Arnam aphan kepijisi Jethro athok-heihei vanlo; Aaron lapen Israel ajalin atum kedo-an alanglilong isi karcho akam ason kangthir a-an kechorapjisi dunlo.

¹³Puthot arni rat atum aphan Moses kangsaijisi ingnilo, lapen alangli adap pen ha arni kangsam anta sangsepinlo.

¹⁴Moses kadokave keklempet nangji akam Jethro thek-longsi, alangli arjulo, “Nangli la kadokave kopisi rat atum aphan keklempet-loma? Nangli kopisi la inutvet keklemloma, nangli phan karjujisi rat atum ke adap pen ha arnikangsam anta arjapding nang-loma?”

¹⁵Moses thak-lo, “Neli la klemvek nangji, pima rat atum Arnam aningkehang kechinijisi nelilong vang-lo.

¹⁶Banghini amonit atum angbong lam dolote latum nelilong vang-lo, lapen kolobangsi kechokma neli phardunpo, lapen Arnam ahukum lapen aron-heihei than dunpo.”

¹⁷Anke Jethro pulo, “Nangli la akechok-le keklem kali.

¹⁸Nangli lapen laso arat atum anta lak-huiji. Nangliphan la inutvet keklem nangji akam the-ong-lo.

¹⁹Non nangli phan neli akeme ason kepare alam nangpathan longtha, lapen Arnam nanglilong doji. Arnam angno rat apharman karjap lapen alanglong halatum alam kevanpi lake mesen akamlo.

²⁰Nangli halatum aphan Arnam ahukum-heihei thannon lapen latum kosonsi kedo nangjima, lapen kopisi keklem nangjima thanjirnon.

²¹Bonta la aparta, nangli ajehak keklemthek abangphu atum aphan ingvainon lapen halatum aphan rat ajalin batnon: Bangsuri atum ajalin, bang pharo, bang phokep atum, lapen bang kep atum ajalin. Latum Arnam aphan kephere atum nangji lapen latum chikiklong nangji lapen latum aphan tangka pen bai un-edet nangji.

²²Latum kaike aphan kangsai atum akam paklem lonang. Latum kesung akangsai nangji an alam nanglilong vanpo, bonta aso alam ke latum amethangta phardun-unpo. La nangliphan joikepo, latum nangli arpu nangcherapdun lote.

²³Jongsi nangli la Arnam ahukum asonlo pura klemlote nangli lak-huihelo, lapen la rat kedo-anta halatum alam ingsailong pen hem chedamlongpo.”

²⁴Jethro kepare alam Moses enlo,

²⁵Lapen Israel atum kedo-an pen keklemthek abangphu ingvailo. Alangli latum aphan bangsuri, bang pharo, bang pho kep, bang kep atum angbong ajalin bat-lo.

²⁶Latum rat aphan kaike aphan kangsai akam klemlo, lapen kethe-o alamsi latum Moses along vanchot-lo, bonta aso alam ke latum angbongsi ingsai pajut-lo.

²⁷Anke Jethro aphan Moses kechepadi akardom pidunlo, lapen Jethrota ahem chevoithulo.