Read Karbi KEBAR 19 Bible Online

KEBAR 19 - Karbi bible

KEBAR 19

¹Israel arat atum Rephidim olo, lapen latum Ijip adet odet aphi kethom achiklo, kecheng arni Sinai kejejangtang ajo latum nanglelo.

²Hadak latum Sinai Anglong akeng-risi mukam chekimlo,

³lapen Arnam aphan Moses kechetongjisi inglong arludamlo. Inglong pen alangliphan HEMPHU hang-lo, lapen Israel, Jakob aso-asu atum aphan kepapujisi alangliphan pulo,

⁴“Ijip atum aphan Ne, HEMPHU kopisi keklem loma lapen Ne nangtum aphan nangpon loma, lapen ladak Nelong nangtum aphan nangvan loma nangtum thek-long-lo.

⁵Non, nangtum jongsi Nephan kroiji lapen Ne pen kechejok alam an chebipo pulote, nangtum ke Nemethang arat plangpo. Pirthe adang anta Nemar, bonta nangtum ke Ne kangvaitang arat plangpo,

⁶isi Nephan kechehodaidet arat, kurusar atum ason nangtum Nephansi ingdukpo.

⁷Lasi Moses hirlo, lapen rat ajalin atum an aphan pangrumpet-lo, lapen alangliphan HEMPHU hukum kepitang an alam latum aphan thanlo.

⁸Anke kadokave arat atum thak-rappet-lo, ‘HEMPHU kepu athetin netum klempetpo,’” Lapen laso alam HEMPHU aphan Moses thanlo.

⁹HEMPHU Moses aphan pulo, “Ne nang long inghun karthat pen vangpo, anke rat atum Ne pen nang kechingki arjulongpo, lapen non pen latum nangphan kroibompo.” Rat atum kopisi thak-loma HEMPHU aphan Moses thanlo,

¹⁰lapen alangliphan HEMPHU pulo, “Rat atum along damra chepangthir-et pen pini lapen penap karchoji apor ke-enji aphan thannon. Latum ape-ari chechokvek nangji.

¹¹Lapen penapdik aphan pachesiknon. Halaso arni Sinai Anglong pen Ne nanghirpo, hadak kadokave arat atum Nephan nethek-longpetpo.

¹²Inglong akung-kung isi ahoi ang-ang sirinon, anke rat atum hatpetpedet khangjangpo, lapen latum inglong karluledetji aphanle, mate la adung kedamdedetji aphanle thannon. Jongsi mane abang la along akeng chebat-lo pulote, la aphan pathilot nangji;

¹³La aphan arlong pen varbop kalite thai pen apbop nangji, la aphan abang paphophepin pen nangji. Lake monit lapen pi aphan seta keklem nangji isinat-lo; lahei aphan pathivek nangji. Bonta pong-ut kebut ahut, rat atum inglong arludam nangji.”

¹⁴Inglong pen Moses nanghirsi karchoji aphan kepachesikjisi rat aphan thanlo. Lasi latum ape-ari chechok-lo, lapen

¹⁵latum aphan Moses pulo, “Penapdik aphan chesikding non, lapen laso angbong badu seta penanso akam choklemri non.”

¹⁶Kethom arni adap sining kangder lapen kebirlak doji, inglong athak inghun echet akarthat doji, lapen pong-ut arki kethe kebut ase arjulongji. Mukam along kedo-an arat kephere pen klemhurlo.

¹⁷Arnam aphan kechetong damjisi kedo-an arat aphan mukam pen Moses latum aphan japonlo, lapen latum inglong akeng-ri arjapphrong-lo.

¹⁸Sinai Anglong adang bithe inghun hupthip-lo, pima me pen HEMPHU laso athak nanghirlo. Me ade amehi asonsi mehi sumonlo, lapen kedo-an arat atum a-ok klemhurlo.

¹⁹Pong-ut arki nangthebomlo. Moses ningjelo, lapen sining kangder pen Arnam thak-lo.

²⁰Sinai Anglong aphuchong alongsi HEMPHU nanghirlo, lapen Moses aphan inglong angsong hang-lo. Moses angsong arludamlo,

²¹lapen alangliphan HEMPHU pulo, “Nephan nekelangjira rat atum ahoi kehat-hedetji aphan hirra rat aphan pacherenon; jongsi latum klemlote, ongdung atum thilotpo.

²²Nedung kevang akurusar atum jokta chepangthir-et nangji, kalite Ne latum aphan adukpiji.”

²³HEMPHU aphan Moses pulo, “Rat atum vang un-edet-lo, pima Nang nelitum aphan hukum pilo inglong ingthir-et lapen la akung-kung ahoi angthek bi nangji pulo.”

²⁴HEMPHU thak-lo, “Hirra nanglong Aaron aphanta chevannon. Bonta kurusar atum lapen rat atum Nelong kevangji pura ahoi hat nangne, kalite Ne latum aphan adukpiji.”

²⁵Anke Moses rat anat sun damlo, HEMPHU keputang alam ateng latum aphan than-et-lo.