Read Karbi KEBAR 2 Bible Online

KEBAR 2 - Karbi bible

KEBAR 2

¹Lason apor ahut, inut amonit Levi akhei pen, amethang akhei a-arloso pen chepangrilo,

²lapen bangpi alangliphan sopo inut amahang pathekpilo. Bangpi oso arje mesen thek-longsi, la aphan bangpi chiklojon thom patulo.

³Bonta la aphan bangpi patuver un-esi, arpik pen keselam ahoton ensi lang pali un-epinji aphan alkatra bangthip-lo. La arlo oso aphan bangpi thap-lo, lapen langroi akung bap keding ajo la bilo.

⁴La aputhak kopi plangjima pu oso angjirpi penang an achar arjapther si lang-chonghu dunjoilo.

⁵Recho asopi lang kechinglujisi langroi nangsunlo, lapen alangli banpi atum langroi akung an nangdunlo. Menmen bap keding ajo bangpi abang hoton thek-long-lok-lo, lapen la kepa-endamjisi inut abanpi aphan toilo.

⁶Recho asopi la ingpulo lapen inut pinso a-oso thek-long-lo. La chirulo, lapen bangpi laphan jinsopik-lo. “Lake Ibri atum asolo,” bangpi pulo.

⁷Ansi oso angjirpi bangpi aphan arjulo, “Neli dampen bangso a-oso aphan Ibri pi a-obok hangdam-tuma?”

⁸“Kanghonpen klemtha,” Bangpi thak-lo. Lasi arloso a-oso abang damsi oso apei apok aphan nanghangdet-lo.

⁹Sarpi aphan recho asopi pulo, “Laso a-oso ponra nepharman nelanapitha, lapen nangphan ne anam nangpiji.” Lasi bangpi oso aphan pondet-lo lapen laphan lanalo.

¹⁰Aphi, oso the dingsi, la aphan recho asopi ahem ponlo, lapen bangpi la aphan amethang asopo apok asonsi chekamdet-lo. Bangpi amethang chepulo, “La aphan ne lang along pen enlo, lasi ne laphan Moses pu amen irlo.”

¹¹Moses the-dingsi, alangli amethang arat aso aphan chelangdamlo, atheke Ibri atum aphan, lapen latum aphan kopusonsi kampi kepaklem bor-i loma alangli thek-long-lo. Moses amethang arat aso angbong inut abang phan inut a-Ijip aso kepathi alangli lajokta thek-long-lo.

¹²Moses adung arei chelang-lo, lapen alangliphan baduta cholangle pu la thek-longsi, la Ijip aso aphan pathilot-lo, lapen sangti ajo laphan pipbub-lo.

¹³Puthot arni alangli chedamthulo, lapen banghini Ibri amonit kechebohong alangli thek-long-lo. Alangli kechokche keklem abangphan pulo, “Kopisi nangli nang korte Ibri amonit aphan kechok-lo?”

¹⁴Bangpo thak-lo, “Komatsi nangphan netum aphuthak papangritoi lo lapen pangsaitoilo? Halaso a-Ijip aso aphan kepathi ason thak-thak nangli neliphanta pathi jilangma?” Anke Moses chepherelo lapen amethang chepulo, “Ne kopisi keklem loma rat atum nethek longtang-lo.”

¹⁵Keplangtang alam recho arjulong-lo, alangli Moses aphan kepathiji bor-ilo,

¹⁶bonta Moses katjuilo, lapen damsi Midian adet dodamkok-lo. Arnisi, Moses langtuk adung kangnilun ahut, Midian akurusar, Jethro, asopimar bang throksi lang kesokjisi vang-lo lapen apo biresak lapen abi atum aphan kepijisi langbong pen lang kepaplengji aphan vang-lo.

¹⁷Bonta ajehak kevi atum Jethro asopi atum aphan phlungjuilo. Anke latum aphan kerapdunjisi Moses vang-lo, halatum apharman pi atum aphan langpilo.

¹⁸Latum apo along kechevoi ahut, alangli arjulo, “Pini nangtum kopisi vangdap-prang-lo?”

¹⁹“Inut Ijip amonit kevi atum arideng pen netum aphan nerailo,” latum thak-lo, “Lapen alangli netum aphan lang ta nesokpilo lapen pi atum aphanta lang pilo.”

²⁰“Alangli konat-lo?” Asopi atum aphan alangli arjulo. “Kopisi nangtum bangso amonit aphan nang-kehanghedet-loma? Dam-ra etum along an kechorappetjile alangliphan hang damnon.”

²¹Lasonsi Moses hadak kedoji aphan aninghang-lo, lapen alangliphan Jethro asopi Zipporah penan chopilo,

²²lapen bangpi alangliphan sopo inut amahang pathek pilo. Moses amethang chepulo, “Ne laso adet along bang adet-aso amonit-lo, lapen la apot laphan ne Gershon pusi amen irlo.”

²³Penang an aningkan aphi Ijip arecho thilot-lo, bonta Israel aso atum latum aber ban kedonang apot chirujolo, lapen kerap kelongjisi hangkong-lo. Latum akehang Arnam along anta lelo.

²⁴Alangli latum akehang arjulong-lo lapen Abraham, Isaak, lapen Jakob pen kechepathik kechejok aloh chemathadamlo.

²⁵Israel atum ban kedo Alangli thek-long-lo lapen latum aphan mathalo.