Read Karbi KEBAR 21 Bible Online

KEBAR 21 - Karbi bible

KEBAR 21

¹Lahei aron Israel atum aphan pinon:

²“Nangtum jongsi Ibri aban nam lote, la nangphan ningkan throk nang ingdukpo. Jat ta pinangnepin pen la aphan throksi aningkan pajok nangpo.

³La nangban keplang ahut piso-en-elang pulote, la ke-o ahut apiso chepon longlelo; bonta la nang ban keplang ahut piso enlo pulote, alang piso cheponlong tahai.

⁴Jongsi ahemphu abang la aphan apiso ripilo pulote lapen bangpi asopo mate asopi la aphan amahang pathekpi lote, arloso lapen asomar anta ahemphu amarlo, lapen pinso abang amethang che-o nangpo.

⁵Bonta jongsi ban abang la ahemphu aphan chinghonlo pu pachethangdak-lote lapen apiso, asomar anta kejokji aphan aninghang pulote,

⁶la aphan ahemphu abang karcho adim pondetpo. Hadak laphan inghap mate inghap anujok along parjapding nangpo lapen ano-et nangpo. Anke la akai isi aphan aban plangverpo.”

⁷Inut abangpo jongsi kejokjepin aban kepaplangji aphan asopi aphan sopinso aban ason chojordet-lote,

⁸jongsi bangpi aphan ke-enji pu abangphansi chojorlo pulote, bonta bangpo la aphan aningdokde pulote, bangpi apo aphan la jorthudetpo; bangpi ahemphu bangpi aphan bang adet aso along jor dun longle, pima bangpi aphan la langpame-medet-lo.

⁹Inut abangpo jongsi asopo kepa-en aphan bangpi namlo pulote, bangpi aphan alangli sopi ason chekam nangji.

¹⁰Jongsi inut abangpo piso ke-en thu pulote, aphrang apiso aphan kepi atengthot a-an, ape-ari lapen ajakong-heihei pinangji.

¹¹Bangpi aphan jongsi lahei akam cheklemkle pulote, bangpi aphan la pajok nangji lapen anam thangnat ta en-edet nangji.

¹²Mane jongsi inut amonit aphan arbubop lote labangso aphan pathilot nangji.

¹³Bonta jongsi la kephoji ahut-lo, kepathiji binong kali pulote, Ne nangtum aphan nang kangvaipiji adim along la chepachong dam-unji, lapen hadak la jokphlotpo.

¹⁴Bonta inut amonit aningthilo lapen chenamsi anut kaprek aphan pathibinong-lo pulote, labangso aphan pathilot nangji, la kejokji aphan Ne dovan along kat chepachongdam seta.

¹⁵Apo mate apei aphan karbubop aling abangphan pathilot nangji.

¹⁶Badutame monit neppondet pulote, kejordetji aphan tame mate ban kebiji aphan setame, bangso aphan pathilot nangji.

¹⁷“Apo mate apei aphan ahirjuno kehang aling abangphan pathilot nangji.

¹⁸“Jongsi kechebohong dolote, lapen inut amonit abang anut kaprek abangphan arlong pen mate ari chikip pen tame arbulo, bonta pathilot-le pulote halabangso aphan aduk pinangji.

¹⁹Jongsi karbu kecholong abang hongplang athak tinanglailo, bonta aphi thur-undet-lo lapen chin akerap pen dam-unlo pulote, la aphan areng kepaso abang la apor kekon an lapen la memetik an se lang nangji.

²⁰“Mane jongsi kaibong enra aban aphan arbulote, pinso tame arloso aphan tame, ketheng adim along amat hala thilot-lote, bangso amonit aphan adukpinangji.

²¹Bonta aban abang arnisi, nini anta thi-thelang, pulote ahemphu aphan aduk pinangnelo. Alangli akhi kekon anam arengkeso anta chok-lo.

²²“Jongsi ajehak amonit atum chebohong-lo lapen oso aphili ahut inut abangpi aphan ketheng pen ajok aso varnangkok-lo, bonta bangpi abang ke thangthelang pulote bangpi aphan areng kepaso abangsi bangpi apenan kehang aling adai tu nangpo, Kangsai atum chedondun lote.

²³Bonta arloso amethang jongsi areng sodak pulote la alar aduk ke pinangji ke apran alar apran,

²⁴Mek alar mek, so alar so, ari alar ari, akeng alar akeng,

²⁵me kepacho alar me kepacho, areng kepaso alar areng kepaso, keparop alar keparop-lo.”

²⁶Inut amonit jongsi la abanpo mate abanpi aphan amek along arbulo la pen ajok amek checharchedet-lote, amek anam ajoine aban aphan la pajok nangpo.

²⁷Alangli jongsi aso ehong thengphlinlo pulote, aban aphan aso anam ajoine pajok nangji.

²⁸Chainong ejon jongsi bang aphan tongbop pulote laphan arlong pen varbop nangji, lapen la a-ok chonangnelo; bonta la ahemphu aphan aduk pinangne.

²⁹Bonta chainong jongsi monit aphan ketong abe do, pulote; la ahemphu aphan pachere nangji, bonta lam ano chevarvedet pulote, lapen la anut kaprek amonit aphan tongbop pulote, la aphan arlong pen varbop nangji, lapen la ahemphu aphanta pathilot nangji.

³⁰Jongsi ahemphu abang apran chepajokji aphan adaitudet pulote, alangli akenang an anam tudet nangji.

³¹Chainong jongsi aso mate arloso a-oso aphan pathilot pulote, la keklem nangji aron isinat-lo.

³²Chainong alo jongsi banpo mate banpi aphan pathilot-lo pulote, ahemphu abang ban ahemphu aphan rup ingkleng thomkep pinangji, lapen chainong alo aphan arlong pen arbubop nangji.

³³Inut amonit jongsi hilik adip endet-lo mate alangli akaprek ahilik hut-lo lapen la dipdedet lote, lapen chainong alo mate gadha ejon la arlo jangthot lote,

³⁴pi anam alangli pivek nangji. Ahemphu aphan alangli tangka pinangji lapen kethitang api enlongtahai.

³⁵Jongsi inut amonit achainong alo anut kaprek achainong aphan tongbop-lo pulote ahemphu banghini kerenglang achainong aphan jordetpo lapen atangka chethak-kreipo; lapen latum kethitang api a-ok ta chethak-kreipo.

³⁶Bonta achainong abang bang aphan ketong abe do pu chinilor pen arjuje pulote ahemphu abang anut kaprek aphan alar kerenglang achainong kepidet pen kekon an chepapleng nangji, bonta kethitang api alangli chebilongji.