Read Karbi KEBAR 23 Bible Online

KEBAR 23 - Karbi bible

KEBAR 23

¹Ahok-he chethan-palamso alam pachethang-tap-ri, lapen chobei ahaki kepidun pen ajok adai kedo amonit aphan rapdunri.

²Kechokche keklem ahut mate latum aporman kepaklang pen ahok pangsaisedet ahut ke-ongmuchot atum alam kroidunri.

³Kangsai ahut keduk amonit aphan langret-lang-ai akam klemri.

⁴Nang jongsi nang hotur achainong api, mate agadha arri jok phlot thek-long lote, la alanglilong ponpidetnon.

⁵La gadha arpu pen domhap-lo pulote nang ingthurdun-ra parjapthu non; langlera damjoiri.

⁶Kangsaihem keduk abang kevang ahut ahok-akangsai palongledet nangne.

⁷Boktap nangne, lapen adai kave amonit aphan pathi nangne, athema lapuson kehingno akam keklem abangphan Ne khindeji.

⁸Tangka cho-enri, athema tangka kecho-en pen ajok inut amonit ahok anat amek selokjok titi lapen adai kave atum aphan pavir-rong.

⁹Bang adet aso aphan langrop-ri; nangtumta chinilo, inut bang adet amonit-lo pulote aning kosonsi chemathama, pima Ijip along nangtum ta bang adet amonit plang-lo.

¹⁰Ningkan throk nangtum hidi tikinon lapen la kepathe an pangrum non.

¹¹Bonta throksi aningkan la pasang longnon. Kopima hadak kepathe keduk atum pachonang, lapen nampi api atum ahin an pacho nang. Nangtum adrakha aberi lapen ajit arong-heihei aphanta lasonthot-le klemnon.

¹²Erui angbong nithrok-le kam klemchot non, bonta throksi arni ke kam klemri, anke nangtum aphan kam nangkeklempi nangban atum lapen bang adet aso atum lapen pi atum anta sang longpo.

¹³Nangtum aphan Ne, HEMPHU nangkepu alam athetin arjutha. Akaprek arnam-heihei aphan ardomri; halatum amen anta pinpurri.

¹⁴Ningkan isi angbong Nephan man Nekepijile kethom arong-aje talon-non.

¹⁵Abib mate Jangmi achiklo, nangtum Ijip adet ke-o achiklo, Ne nangtum aphan hukum nangkepi ateng Thapkave ahim arong-aje talon non. Laso arong-aje ahut athok ajir vanvepin pen nephan karchoji aphan vangri.

¹⁶Sok-kerot arong-aje ta nangtum asok kerot kecheng ahut-le talon-non. “Kechepachong arong-aje chung-phang-ok ahut-le talon-non, nangtum adrakha aberi lapen rit pen athe kepangrum ahut-le talonnon.

¹⁷Laso kethom arong-aje ahut aningkanvang ta nangpinso amonit kedo-an Ne, HEMPHU nang Arnam aphan karchojile vangpet masi.”

¹⁸Nephan pi karkli ahut, thap pen keselam ahim Nepajirri. Laso arong-aje ahut karklitang pi athu puthot adap an bi nangnelo.

¹⁹Aningkanvang ta nang Arnam HEMPHU ahem aphrangsi athe van-nangji. Biresak aso mate abi aso apei amok-lang pen tun-ri.

²⁰Nangtum kedam ahut nangtum aphan nangkeparai-jisi lapen Ne kethiktang adim nangkevanjisi nangtum aphrang Ne pherangke nangtoipo.

²¹Alangliphan nocheden non, lapen kroinon. La aphuthak thurkhrap-ri, athema Ne si la aphan nangketoilo, lapen lason kethurkrap ke alangli diyajelo.

²²Bonta nangtum jongsi alangliphan kroilo lapen Ne nangtum aphan hukum nangkepi ateng an klem et-lo pulote nang hotur kedo-an atum pen Ne nangchedan piji.

²³Nangtum aphrang Ne pherangke dampo lapen nangtum aphan Amor, Hitti, Pirizzi, Kanaan, Hivi, Jebusi atum alongle along nangponpo lapen latum aphan Ne pavir-etpo.

²⁴Halatum a-arnam atum aphan ardomri mate archori, lapen halatum adhorom aron ateng endunri. Halatum a-arnam atum aphan pavir-etnon lapen halatum kangthir arlong anujok-heihei ing-lok-etnon.

²⁵Nangtum jongsi, Ne, nang Arnam HEMPHU aphan archolo pulote, Ne nangtum aphan an lapen lang pen pahirjumepo lapen nangtum akeso anta pavedetpo.

²⁶Nangtum adet arloso atum aso damphlot mate aso manme pu avedetpo. Ne nangtum aphan chethe padingpo.

²⁷Nangtum aphan kekhang arat atum aphan Ne paphereduk po; nangtum pen kechedan arat atum aphan Ne pamanghu-etpo, lapen nang hotur atum nangtum pen suisi, Ne pakat-etpo.

²⁸Nang hotur atum aphan Ne pasungphrat po; Hivi, Kanaan, lapen Hitti aso aphan nangtum kedambom ahut ke phlung-etpo.

²⁹Latum aphan Ne ningkan isi angbong phlungphle; Ne jongsi klemlote longle parongman etpo, lapen nangtum aphan nampi api nang-ong-muchotpo.

³⁰Lasi latum aphan Ne asap asap si phlungpo ha nangtum longle kecherai dorphluphle tik an.

³¹Nangtum alongle ahoi Akaba alangbi pen ha Mediterran a-talo an lapen kejejangtang ajo pen ha Euphratis Aroi an pakamji. Hadak longle along kedo atum aphuthak kehaiji ajakong Ne nangtum aphan nangpiji, lapen nangtum dambomsi latum aphan phlung etji.

³²Latum pen mate a-arnam-heihei pen thangnat akechechak padori.

³³Nangtum adet along latum aphan padolongri; jongsi nangtum padolo pulote nangtum aphan Ne anat pap ason mandetpo. Nangtum jongsi latum a-arnam-heihei aphan archolote, lake nangtum aphan isi kehingno aphamlo.