Read Karbi KEBAR 24 Bible Online

KEBAR 24 - Karbi bible

KEBAR 24

¹Moses aphan HEMPHU pulo, “Nelong inglong nang arlu dunnon, nang lapen Aaron, Nadab, Abihu lapen Israel ajalin bang throksi kep atum an lapen nangtum achar pen karchojile nangtum angphun chingdihur non.

²Nang pen apar baduta Nedung nangpatebok-ri. Rat atum ke inglong anta nangparlu dunri.”

³Moses damlo lapen rat atum aphan HEMPHU ahukum-heihei lapen aron-heihei an than-et-lo, lapen kadokave arat atum thakdun hurlo, “HEMPHU kepu athetin nelitum klempo.”

⁴HEMPHU ahukum an Moses tok dun-et-lo. Adapprang inglong akeng-ri along alangli isi adovan kimlo lapen arlong krehini builo, asitin Israel khei krehini apharmanlo.

⁵Anke alangli inut ariso aphan toilo, lapen latum HEMPHU aphan athok-heihei phrinlo, lapen kejelang athok-heihei aphan ajehak achainong arklilo.

⁶Pi avi ebeng Moses enlo, lapen la harlung-heihei along bilo, lapen ahin ke alangli dovan alongsi arsilo.

⁷Anke alangli kechejok aloh enlo, lapen hala alongsi HEMPHU ahukum-heihei tok-et-lo, lapen rat aphan asekethe pen porhe parjulo. Latum pulo, “HEMPHU aphan nelitum kroipo lapen alangli ahukum asontin klempo.”

⁸Anke harlung along kedo avi Moses enlo lapen la rat atum aphuthak arsilo. Alangli pulo, “HEMPHU lahei ahukum nangkepi ahut nangtum pen kechejok aloh chepathik ahut kepathir avi la helo.”

⁹Moses, Aaron, Nadab, Abihu lapen bang throksi kep Israel ajalin atum inglong arludamlo,

¹⁰lapen latum Israel a-Arnam aphan thek-long-lo. Alangli akengber lake arlong-chething abor aklong ason, sining-inghun ason lirtir.

¹¹Lahei ajalin atum aphan Arnam pasungse; latum Arnam thek-long-lo, lapen latum chorappet junrappet-lo

¹²Moses aphan HEMPHU pulo, “Inglong angsong Nelong vangnon, lapen nangtum ladak kedo ahut, nangtum aphan Ne longpak plangni nangpi po lapen ladak rat atum aphan Ne kepinkhat aron-heihei an ketoktang dolo.”

¹³Moses lapen la kerap abang Joshua chesik-lo, lapen Moses inglong arludam pangcheng-lo.

¹⁴Jalin atum aphan Moses pulo, “Netum nangchiruire-tik ladak mukam alongle netum aphan inghong non. Aaron lapen Hur nangtum along nangdodunpo; lapen mane abang lam do tangte badutame latum along kangsaiji aphan padam nang.”

¹⁵Sinai Anglong Moses arludamlo, lapen la aphan inghun ethan dipthip-lo.

¹⁶Sinai Anglong athak HEMPHU adak-atur mek-rirohak-lo, lapen inghun ni throk an dipthip-lo; lapen throksi arni inghun angbong pen Alangli Moses aphan hang-lo.

¹⁷Inglong aphuchong along HEMPHU adak-atur ke isi kechovurvur-det ame asonsi rat atum aphan cheklang-lo.

¹⁸Inghun angbong Moses lutdunlo, lapen inglong athak arludunlo. Lapen inglong athak Moses jophlikep niphlikep dolo.