Read Karbi KEBAR 25 Bible Online

KEBAR 25 - Karbi bible

KEBAR 25

¹Moses aphan HEMPHU pulo,

²“Nephan dan-heihei kepijile Israel atum aphan thannon. Monit atum kepiji aning kehang aling adan dengnon.

³Lahei adan ke: Ser, rup, tam;

⁴pe kanglit; akelu, hepi arong, lapen ke-ersip api-angmi; bi alo angmi pen kepinchong ape-ri,

⁵biresak aloso areng pa-erring acham kepi; vo serli a-ok-reng; mir jove athengpi;

⁶melur aphan jangthu; kepatip aphan lapen kepadokjok angnim aphan karnilia abor lapen adorson-heihei helo.

⁷Onyx a-arlong lapen kepabon a-arlong, sangkelang lapen ning aden a-arlong.

⁸Rat atum Nephan isi ingthir-et apehem selam nangji, la ansi Ne halatum along do dun-unpo.

⁹La klemnon lapen Ne nangphan nang-kepaklangji akam ateng pen binon.

¹⁰Mir jove athengpi penle isi Asinduk selamnon, arjon ingrup hinira ebeng lapen arpan ingrup isira ebeng, lapen kangtui ingrup isira ebeng donangji.

¹¹Arlo lapen ingtan ta ajukave aser pensi top nangji lapen ser apanpo akung-kung soding patop nangji.

¹²La keponji aphan ser arnan hongphli pachorra la akeng hongphli pen pacherap nangji, pupu hongni-ni.

¹³Kecharchong abarlon hini mirjove athengpi pen selamra lahei athak serpen top-hetnon,

¹⁴lapen sinduk pupu ta arnan arlo barlon krongnon.

¹⁵Arnan alongsi barlon padover nangji lapen la satsedet nangji.

¹⁶Anke Ne nangkepi hukum-heihei ketoktang kedo alongpak hini la arlo thapnon.

¹⁷Ser pen adip selamnon, keding ingrup-hinira ebeng, lapen arpan ingrup isira ebeng.

¹⁸Arveng kedo api jonni ser pen selam nangji,

¹⁹Adip angchuntin ejon-jon. Lapusonle selamnon latum adip pen isinatpo.

²⁰Adip soding arvengkedo api atum pupu chepangno rappo, lapen latum kechejar arveng la dipthippo.

²¹Sinduk arlole longpak plangnita thapnon lapen la athak-le adip ke batnon.

²²Hadaksi ne nangphan nangchetongpo, lapen Israel atum aphan kedo-an aron-heihei adip athak arvengkedo api jonni adak pen nangphan nangpipo.

²³Mir jove athengpi pen tebul isi selamnon, keding ingrup hini, arpan ingrup isi, lapen kangtui ingrup isira ebeng.

²⁴La athak aju kave aser pen top nangji, lapen la akung-kung ser apanpo topchennon.

²⁵Lapen nang lepphli aphan ahop komchen padonangji.

²⁶La aphan ser a-arnan avaikang hongphli selamnon lapen lahei akeng angden atok-phli binon.

²⁷Tebul keponji aphan abarlon kekroi a-arnan avaikang-heihei ahop adungle binon.

²⁸Mir-jove athengpi penle selamnon lapen lahei ser pen topthip-non.

²⁹Kasu-heihei, harlung-heihei, langbong-heihei lapen drakha ahorlang adan kepi aphan harlung kethe-heihei selamnon. Lahei ajukave aser pensi selam nangji.

³⁰Tebul ke kechejok a-sinduk athengnosi bi nangji lapen tebul athak kaiketa him kangthir nephan nepajirver nangji.

³¹Aju kave aser penle melur archok isi selamnon. La akeng-ri lapen archok karbutang aser pen selam nangji; la mir apu-heihei ta, ahu ta ingkleng isinat pen selam nangji.

³²La ahin pen ro throk chejar po, lapen ahintin pen kethom aro dopo.

³³Aro throk alongtin badam angphar nangnak mir ahu lapen aphar dopo.

³⁴Melur archok along badam angphar ason pu phli alir kepi do, ahu lapen aphar penpen.

³⁵Aro-heihei chorthom aber tin angbong asek dolo.

³⁶Asek-heihei, aro-heihei lapen amelur archok seta aju-kavepin aser angkleng isinat nangpo.

³⁷Melur archok aphan melur throksi selamnon, lapen athak batnon anke lahei athengno anat turdangpo.

³⁸La kangtip-i anapit lapen amethek aharlung aju-kavepin aser pensi selam nangji.

³⁹Melur archok lapen la ajohton-heihei aphan lin 35 aju-kavepin aser enra selamnon.

⁴⁰Inglong athak Ne nangphan nangkepaklang keklem nangji atengle lahei lang pamera selamnon.