Read Karbi KEBAR 26 Bible Online

KEBAR 26 - Karbi bible

KEBAR 26

¹Kangthir a-pehem arlo selamnon, Ne kedo a-pehem, akelu, hepi acham, lapen ersip arong a-ul ahon pen lapen pe kanglit pak kep angbong penle selamnon. Arveng kedo api arjan lahei pe along roidunnon.

²Apaktinta apak kethe ateng isinat selamnon, keding ingrup 24 lapen arpan ingrup 4.

³Pakpho isinat pacherappet non, lapen akaprek pakpho ta eteng isinat ateng-le klemnon.

⁴Kepacherop pakpho abeng ape angtan akung lutu ape avaikang selamnangji.

⁵Pakpho pacherop kecheng ape abeng along avaikang phokep selamnon lapen lasonthotsi akaprek pakpho kepacherop hini abeng along avaikang phokep selamsi pupu achor chingdenchit binon.

⁶La bengni ape kepacheropji aphan ser avek selam ra epakvet ape pinchongnon.

⁷Pehem kedipji aphan bi angmi pen keselam ape beng kre-isi selam non.

⁸Lasonthot-le ateng isinat selamnon, keding ingrup 26 lapen arpan ingrup 4.

⁹Pakpho roi rappet-ra ebeng ape pinchongnon, lapen akaprek pakthrok ebeng pinchongnon. Throk ape pehem athengno along duphlupnon.

¹⁰Kejutsi ape akung along avaikang phokep binon, lapen akaprek abeng akung along avaikang phokep binon.

¹¹Tam avek phokep selamra la-heihei kepacherapjile avaikang along pavurnon, hini angdenchit la isivet cheplangpo.

¹²Pehem anung anat pe ebeng vek-ling non.

¹³Ahin ingrup isi ke pehem akung-kung vek-ling nangji, la kedipji aphan.

¹⁴Hini kedipji aphan selamnon, isi abang ke biresak alo areng erring acham hi nangji lapen akaprek abang ke kemenei a-ok reng, lake ingtan anat kedipji aphanlo.

¹⁵“Mir jove athengpi pen pehem keparjapji aphan arbung-arphe selam nangji.

¹⁶Ahoptin keding ingrup nerkep lapen arpan ingrup isi ra ebeng,

¹⁷hinita ateng isinat nangji, la lote ahop-heihei pacherappet unpo. Kadokave ahop anta ateng isinat selam nangji.

¹⁸Nitur anat aphan hop ingkoi selamnon,

¹⁹lapen lahei aber aphan rup aden phlikep selamnon, ahoptin aphan aden hini la keparjap aphan.

²⁰Pehem nirep anat aphan hop ingkoi selamnon,

²¹lapen rup aden phlikep selamnon, ahoptin along hini aden.

²²Pehem anung mate nichi anat aphan ahop throk selamnon,

²³lapen hopni ke atok aphanlo.

²⁴Lahei atok ahop ke ateng-ri lapen achelon anat pacherap-lok nangji. La hopnisi lepni plangsi lasonthot selam nangpo.

²⁵Lasonsi adak hop nerkep dopo lapen halatum aphan rup aden krethrok dopo, ahoptin aphan aden hini donangji.”

²⁶Mir jove athengpi pen abarlon-heihei selamnon, pehem ehin anat aphan ahop-heihei aphan abarlon pho selamnon,

²⁷akaprek ahin anat ahop aphan pho, lapen nichi kejut anat ahop-heihei aphan pho, anung anat.

²⁸Angbong arpan abarlon ke ahop anat ebeng anke pehem ehin anat pen ahin kaprek anat ingthum nangpo.

²⁹Ahop-heihei ser pen topnon lapen arpan arlan-heihei ser top-het nangji.

³⁰Inglong along ne nangphan nang kepaklangtang keklem nangji ateng pen pehem parjap nangji.

³¹Kelutu, hepi arong lapen erring a-ul ahon pen kebeng ape kanglit selamnon. La arveng kedo api-heihei arjan la roidunnon.

³²Ser avek-heihei kepavurtang mir jove athengpi anujok hongphli along veknon, lapen la rup aden phli athak binon.

³³Pehem asarnung along avek-heihei aren aberle kebeng ape veknon, lapen kebeng ape anung longpak pakni kedo kechejok a-Sinduk binon. Kebeng apesi kangthir adim lapen kangthirnei adim paprekpo.

³⁴Kechejok a-Sinduk athak-le adip dipnon.

³⁵Kangthirnei adim angtan ke pehem anirep anat tebul binon, lapen melur archok ke nitur anat binon.

³⁶Pehem amangho aphan lutu, hepi arong lapen ersip a-ul ahon pen kebeng ape selamnon, lapen keroi penle alir-acham pinon.

³⁷Laso akebeng ape aphan mir jove athengpi anujok-heihei hongpho ser topnon lapen ser avek homdunnon; lahei anujok aphan tam aden-heihei pho selamnon.