Read Karbi KEBAR 27 Bible Online

KEBAR 27 - Karbi bible

KEBAR 27

¹Mir jove athengpi pen isi dovan selamnon. La lepphlita chingbar nangji, arjon ingrup pho lapen arpan ingrup pho, lapen la kangtui ingrup kethom do nangji.

²Athaksi anophli along anu selam nangji. Dovan pen la angkleng isinat nangji, lapen la kedo-anta tam pensi top-thip nangji.

³Thek-lo keponji aharlung, abevuk, harlung kethe, avek lapen me akri kepon-i aharlung-heihei selamnon. Lahei ajohton an tam pensi selam nangji.

⁴Isi lan nangnak tam paivokak selam nangji, lapen la ano along kepon-iji aphan tam a-arnan avaikang phli binon.

⁵Paivokak ke dovan akung aden aberle la binon, anke la dovan ebeng angsong ledampo.

⁶Mir jove athengpi penle kepon-iji abarlon selamnon, lahei tam penle topthip-non,

⁷lapen la kepon ahut lahei dovan a-arnan-heihei avaikang along kroinon.

⁸Dovan ke thengpi aplang penle selamnon lapen la arlo pakhurung-vangnon, inglong along nangphan Ne nangkepaklang asonthot-le klemnon.

⁹Ne kedo a-pehem aphan mesen pe kanglit kebeng ape penle selamnon. Nitur anat kebeng ape ingrup 88 nangji,

¹⁰lapen tam anujok hong ingkoi lapen tam aden ingkoi, lapen kevek aphan rup apanpo akaibongta selam nangji.

¹¹Nirep anat atikup ta lasonthotsi selam nangji.

¹²Nichi anat ta kebeng ape-heihei do nangji, keding ingrup 44, nujok hongkep lapen adenta kep do nangji.

¹³Nihang anat, amangho kedo anat-lo, atikup arpan ingrup 44 do nangji.

¹⁴Amangho ahintin anat ta ingrup krephli kebeng ape do nangji,

¹⁵lapen anujok hongthom lapen adenta kethom do nangji.

¹⁶Amangho along amat aphan kebeng ape keding ingrup krenerkep do nangji lapen kelutu, hepi arong lapen ke-ersip ape kanglit ul ahon pen kethak ape nangji, lapen keroi pen alir-acham pinangji. La hongphli anujok lapen phli aden penpen archak nangji.

¹⁷Tikup komchen anujok-heihei ke rup apanpo pen hop nangji, lapen lahei avek rup pensi selam nangji lapen aden-heihei ke tam pensi selam nangji.

¹⁸Atikup ke keding ingrup 88 nangji, arpan ingrup 44 lapen kangtui ingrup pho do nangji. La kebeng ape-heihei ke pe-kanglit pensi selam nangji, lapen aden ke tam angchin pen nangji.

¹⁹Pehem along kenangji ajohton an lapen pehem aphan kenangji an akurdang-heihei lapen tikup aphan tam angchin pensi selam nangji.

²⁰Melur aphan mesen jit ajangthu Israel arat atum kevanjile hukum pinon, anke aningvetin ta kei longpo.

²¹Aaron lapen asopomar atum kechejok a-Sinduk athengno kebeng ape angtan Ne kedo a-pehem arlo amelur keipo. Aningve pen adap an ne ingno ame pamepmedetpo. Laso ahukum ke Israel lapen aso-asu atum aphan kaike seta doverpo.