Read Karbi KEBAR 28 Bible Online

KEBAR 28 - Karbi bible

KEBAR 28

¹Nang ik Aaron aphan lapen asomar Nadap, Abihu, Eleazar lapen Ithamar atum aphan hangnon. Israel arat pen latum paprekdak non, anke latum nephan kurusar ason ingdukpo.

²Nang ik Aaron aman lapen athok kepadojile kurusar ape-ri thik pinon.

³Kangsai keklemthek ajakong Ne kepitang an abangphu atum aphan hangpetnon, lapen latum Aaron ape-ri keparoijile thannon, anke la aphan nekam kepaklemji aphan inut akurusar pu hodaivet unpo.

⁴Latum ning aden isi, kurusar arlo achoi epak, choi ari keding epak, amang ketur achoi epak, poho epak lapen vamkok epak selampi nangji. Latum lahei kurusar ape-ri nang ik Aaron lapen asomar atum aphan thakpi nangji, anke latum nephan kurusar ason ingduk-unpo.

⁵Ri asai kethek atum akelu, hepi arong lapen ke-ersip a-ul ser ahon pen lapen pe-kanglit ape en nangji.

⁶Latum akelu, hepi arong lapen ke-ersip ser ahon a-ul ahon ape achoi lapen pe kanglit pen achoi selam nangji, lapen alir-acham pen roi dun nangji.

⁷Choi ari phang akung along roi nangji lapen la achoi penpen pupu akung pacherap-het nangji.

⁸Lasonthot ateng isinat ahon keme pensi vamkok selamsi pacherap-het nangji la lote epaknat achoi plangpo.

⁹Nang Karnelian arlong abor hini ponnon lapen lahei aphuthak Jakob asomar bang krehini amen hongnon,

¹⁰latum aphan akleng pen chengsi akebisi an mahang kethek arta ateng pen toknon, bangthrok amen epak a-arlong along lapen bang throk amen ke along kaprek apak along toknon.

¹¹Dorson kepachorthekpo abang Jakob asomar atum amen arlong hini athak amen kepatokji aphan rinon lapen lahei ser angbong pangni nangji.

¹²Lahei choi aphang akung alongsi hom nangji, la Israel kur krehini arjanlo. Lasonsi Aaron ke halatum amen-heihei aphang along ponpo, lapen Ne rat aso aphan HEMPHU kaiketa chematha verpo.

¹³Ser amar hini pachornon,

¹⁴lapen ser arri kepharlem selam non lapen la ser angbong along pachebon-hopnon.

¹⁵Arnam aning kehang kechiniji aphan kurusar kethe aphan isi aning adenplang selamnon. Choi aphan alir-acham pen keroi amar ahon asonthot-le lata selamnon.

¹⁶La akungphli donangji lapen duphlup nangji, keding echak lapen arpanta echak do nangji.

¹⁷La along renphli arlong abor-heihei pangni nangji; kechengsi aren ke rubi abor, topaz abor lapen garnet abor arlong isi;

¹⁸hini aren along ke emerald abor, saphire abor lapen hira abor along isi;

¹⁹kethom aren along abang ke turquoise abor, agate abor lapen amethist abor along isi;

²⁰Lapen phli aren along ke beryl abor, karnelian abor lapen jasper abor along isi. Lahei ke ser angbongsi bi nangpo.

²¹La krehini arlong asitin ta Israel akhei arjan angthek asonsi Jakob asomar amen anut-tin along hong-si thap dunpo.

²²Ning adenplang aphan aju-kavepin aser arri pharlemsi selam nangji.

²³Ser arnan avaikang hongni selamra ning adenplang athak ano hini along pabonlok non,

²⁴lapen ser arri pharlem pen arnan avaikang hongni along rakchek non.

²⁵Arri angchun pupu along pavurlok non, lasonsi choi ariphang akung athengno along pabon-loknon.

²⁶Anke ser arnan avaikang hongni selamnon, lapen choi ajahep adung kedo ning adenplang aber ano akung hini along arnan-heihei pabonnon.

²⁷Ser arnan avaikang hongni selamthura lahei choi ari aphang hini athengno aber lapen akam achepan adung lapen vamkok kethak pame athak homlingnon.

²⁸Ning adenplang arnan-heihei avaikang lapen choi ajahep arnan-heihei avaikang arri kelu pen rakchek-non, anke ning adenplang abang vamkok athak parjap unpo lapen sovaivelo.

²⁹“Kangthir adim Aaron nangkelut ahut, la Israel kur-krehini amen kehongtang aning adenplang alangli nang-chepindengpo, anke Ne rat aso aphan Ne HEMPHU kaiketa chematha verpo.

³⁰Kepatini amar Urim lapen Thummim ke ning adenplang arlosi bipo, anke Aaron Ne kangthir angno kevang ahut, alangli lahei chingchoipo. Halason ahut alangli laso ning adenplang kaike chingthang nangji, anke Nerat aso Israel aphan alangli Ne ning kehang patini unpo.”

³¹Choi aber kephan ape-um ahonlu pensi thak nangji.

³²La achethok aphan pangkovang nangji, lapen la kangrak-redetjile akung duphlupsi roi pame nangji.

³³La amang along kelutu, hepi arong lapen ke-ersip adalim athe amang akung-kung tur nangji, lapen adak-dak ser arong akhring-ring angbongta turdun nangji,

³⁴lapen choi komchen ser akhring-ring isi, lapen dalim athe ethe lapen ser akhring-ring lapen dalim athe ethe amang turchen nangpo.

³⁵Aaron kurusar akam kangduk ahut laso achoi chingchoi nangpo. Ne ingno kangthir adim alangli nangkelut ahut mate alangli kebar ahut porphai arki arjulong nangpo lapen ke alangliphan pathilot-lelo.

³⁶Aju kavepin aser eplang thip-ra la along, “HEMPHU aphan hodaitang-lo”, pu toknon.

³⁷Akelutu arri pen poho athengno rak-hetnon.

³⁸La Aaronsi atehang along chevek nangpo, ansi Israel aso atum nephan kehodaitang adan an ne dengpo, jongsi rat atum dan kepi ahut chokchedet-leledet pu seta Ne dengpo.

³⁹Pe kanglit penle Aaron achoi selam pinon, lapen pe kanglit penle poho selam pinon, lapen amang kedo kebu avamkok epak roi nangji.

⁴⁰Aaron asomar aphan choi, vamkok lapen phutup-heihei selam pinon, lahei ke latum aphan aman lapen alon aphanlo.

⁴¹Lahei ape-ari nang ik Aaron lapen asomar atum aphan pangchoinon. Anke latum aphan jit ajangthu patip pen ajok kam batnon lapen latum aphan hodaidetnon, ansi latum Nephan kurusar ason ne ingduk thekpo.

⁴²Latum aphan pe kanglit pen avam pen akengtham an ketelomchen arri selam pinon, an lote latum amethang abang cheklangsakselo.

⁴³Aaron lapen asomar atum Ne kedo adim pehem arlo nangkelut ahut mate kangthir adim kurusar ason kangdukjile dovan anat patebok ahut latum lahei chepindeng nangji, ansi latum amethang kecheklang apot latum aphan pathithedetpo. Lake Aaron lapen la aso-asu atum aphan kaike kedover aron-atang-lo.