Read Karbi KEBAR 29 Bible Online

KEBAR 29 - Karbi bible

KEBAR 29

¹Nekam along Aaron lapen asomar atum kurusar keklemjile latum aphan kehodaijile la nang klem nangpo. Chainong aloso ejon lapen kemenei biresak aloso jonni ponnon.

²Thap kave ahim akemenei, ajehak ahim jit ajangthu pen selamnon lapen ajehak ke jangthu avepin pen selamnon, lapen ajehak ke him aplang jangthu pen pajum pamenon.

³Lahei ton arlo thap-ra, nang chainong alo ejon lapen biresak alo jonni nephan nekethok ahut lahei ta dan nepinon.

⁴Ne kedo a-pehem ajakan along Aaron lapen asomar atum vannon, lapen latum aron alang pachinglu non.

⁵Kurusar ape-ari penle Aaron aphan ape-achoi pindeng non, choi ajahep aber keche-um ape, ajahep, aning aden lapen vamkok-hihita.

⁶Alangli phu poho phungnon lapen la athak kangthir angthek ketoktang “HEMPHU aphan hodaitang-lo pu”, kok-hetnon.

⁷Anke kepatip ajangthu ennon, la alangli phuthak dungnon, lapen la aphan patipnon.

⁸Asomar atum aphan vannon, lapen latum aphan choi pangchoi non;

⁹latum avam soding achephan kok-ra phutup kupnon. Lasonsi nang Aaron lapen asomar atum aphan kam batnon. Latum lapen latum aso-asu atumsi nephan kurusar kaiketa ingduk verpo.

¹⁰Ne kedo a-pehem athengno along chainong alo vannon lapen la aphu along Aaron lapen asomar atum ari bat nangji.

¹¹Hadak ne kedo a-pehem ajakan along-le chainong alo pathinon.

¹²Chainong avi ajehak enra la dovan anu athak nangri pen hinon. Lapen ahin avi anke dovan akeng-ri dung nangji.

¹³Adunthu, aphek-angthin an kedip athu, angthin kang-ar akemenei, ahambi lapen la along kechebon athu an enra, lahei nephan isi athok kepijile dovan athak pinon.

¹⁴Bonta chainong a-ok kangthim, la arengta, lapen la aphek-heihei ta mukam angtanle phidetnon. Laso athok ke kurusar atum apap-heihei kechamji aphanlo.

¹⁵Ejon abiresak alo enra lapen la aphu along Aaron lapen la asomar atum ari kebatjile thannon.

¹⁶La pathinon, lapen la avi enra dovan aleptin anat dung phaknon.

¹⁷Biresak a-ok ingthan-i non; la aphek-angthin-heihei cham-et non, aphi akengta chamnon, lapen lahei aphu athak lapen akaprek a-ok athan athak batnon.

¹⁸Biresak kangthim dovan athak phrinnon, la isi kecho adanlo. La kedokjin angnim nephan ning pangsamlo.

¹⁹‘Ajon kaprek abiresak alo en-non kehodaiji aphan ke-en abiresak lapen la aphu along Aaron lapen asomar atum ari kebatjile thannon.

²⁰La pathinon, lapen la ajehak avi ennon, lapen la Aaron lapen asomar atum ano lapen anokan ar-e athak, halatum ari ar-e achimunpo athak, lapen ar-e akengmunpo athak hi nangji. Ahin avi anke dovan akung soding dungnon.

²¹Dovan along kedo ajehak avi lapen ajehak kepatip ajangthu enra Aaron lapen achoi athak lapen asomar atum achoi athak la arsinon. Alangli lapen alangli somar atum, lapen halatum ape-ari anke Nephan Nehodaidetnon.’

²²Biresak athu an lir-etnon, athu kedo arme, athu kedo aphek-angthin, angthin kang-ar akemenei, athu kedo ahambi hini, lapen ar-e akengtham thakdaknon.

²³“Nephan nekepi ahim aton pen ajattin ahim ennon; jit ajangthu pen keselam ahim eplang, lapen jangthu kavepin ahim eplang, lapen kangtang ahim eplang.

²⁴Lahei ahim an Aaron lapen la asomar atum arideng pinon, lapen kepanong adan ason Nephan Nekehodaijile thannon.

²⁵Anke halahei angbong pen la ponra dovan athak phinon, kephrin athok athak la Nephan isi kechome athok-lo. Laso athok angnim kedok Nephan ningpangsamlo.”

²⁶Laso abiresak alo aningthang ponra Nephan isi kepanong adan ason la Ne hodai non. Laso pi a-ok abahak ke nangtum apharmanlo.

²⁷Inut akurusar aphan kam kebat ahut, aningthang lapen biresak aloso akengtham kam kebat ke-enjile Nephan kepanong adan asonle nehodainon, lapen kurusar atum aphan bi pivetnon.

²⁸Lake Ne kelarlepin akephar lo, Ne rat aso atum kejelang athok kepi ahut pi aningthang lapen akengtham ke kurusar atum apharmanlo. Lake rat atum Ne HEMPHU aphan Nekepi adanlo.

²⁹Aaron kurusar ape-ari-heihei ke la thilot aphi asomar atum aphan pinangpo, latum aphan akam bat lote latum kepachingchoiji aphanlo.

³⁰Aaron asopo la alar kurusar kedengdun abang lapen kangthir adim kangdukjisi Ne kedo a-pehem arlo nangkelut ahut laso ape-heihei ni throksi chingthang nangji.

³¹Aaron lapen la asopomar atum aphan kam kebatji a-ok en ponra kangthir adim updetnon.

³²Ne kedo a-pehem ajakan along la ton along kedo ahin ahim penpen chonangji.

³³Kopi-si halatum kam kebat ahut lapen kediya aron kerim ahut latum cho nangji, laso anam kurusarsi chochot nangji, pima la ingthir-et.

³⁴Jongsi ajehak a-ok mate ahim adap angbong cho-et-e pulote la me phrin-et nangji; la cho nangnelo, pima la ingthir-et.

³⁵Aaron lapen asomar atum aphan ni throksi kam kebat aron akam klemnon ne nangphan hukum nangkepi ateng.

³⁶Arnivang ta athok aphan nang chainong alo ejon pivek nangji, ansi halaso apap diyalongpo. La pen ajok dovan ingthirpo. Anke la kangthirji aphan jit ajangthu la patipnon.

³⁷La arnivang ni throksi an klemnon. Anke dovan ingthir pamepo, lapen badutame mate la kepapho abang aling la kangthir-et ajakong pen ajok phangnopo.

³⁸Arni vangta lapen kevangji arni anta, dovan athak karkli ningkan isi arta abiresak aso jonni pinangji.

³⁹Adap ejon abiresak aso arklinon, lapen ajon kaprek arni kangsam apor arklinon.

⁴⁰Aphrangsi ajon along elin ahim aduk kemenei pen elin aju-kavepin jit ajangthu pen pangvuinon. Isi athok ason elin adrakha horlang dungnon.

⁴¹Arni kangsam apor ajon kaprek abiresak arklinon, lapen isinat ateng ahim aduk, ajit ajangthu, lapen adrakha ahorlang adap ason dan pinon. Lake Ne, HEMPHU aphan an athok-lo, lapen la angnim nephan ningpadok-lo.

⁴²Kevangji arni anta, laso kephrin athok Ne kedo a-pehem ajakan along Ne kedo alongsi pajir nangji. Hadaksi Ne rat atum aphan chetongji lapen nangphan ningjepo.

⁴³Hadaksi Ne Israel arat aphan Ne chetongji lapen keturbong Ne kedo akethe-angsi dim pangthirpo.

⁴⁴Pehem lapen dovan Ne pangthirpo, Aaron lapen la asomar atum nephan kurusar kangdukjisi paprekdakpo.

⁴⁵Ne Israel arat angbong dopo lapen neke halatum a-Arnam plangpo.

⁴⁶Ne helo HEMPHU, halatum a-Arnam, latum aphan Ijip pen kevan abang-lo pu latum chinipo, anke Ne latum angbong dodun-unpo. Ne helo HEMPHU, halatum a-Arnamlo.