Read Karbi KEBAR 30 Bible Online

KEBAR 30 - Karbi bible

KEBAR 30

¹Mirjove athengpi pen mephik kethorji aphan dovan kim nangji.

²La lep phli do nangji, keding ingrup isi lapen arpan ingrup isi, lapen la kangtui ingrup hini do nangji. Adovan pen anu angkleng isi nat nangji.

³La athak dipnon, kung phlita, lapen la anu ajukave aser pen top-het nangji, lapen la apanpo ser pen top nangji.

⁴La keponji aphan ser arnan avaikang hongni selamnon lapen la dovan keponji akaibong kekroi ji aphan ahop pen pacherap lokpo.

⁵Lahei mirjove athengpi pen selamnon, lapen ser penle lahei dipthipnon.

⁶Laso adovan kebeng ape angtan kechejok a-Sinduk angnole binon. Laso adim along helo Ne nangphan kechetongji adimlo.

⁷Adapvang melur kekaiji aphan Aaron kevang ahut la along alangli kedokjok angnim amephik thor nangji.

⁸Arni kangsam la melur kekai ahut ta lasonthotsi la klem nangji. Kevangji arni anta laso amephik athok kepi chemitmepin nangji.

⁹Laso adovan along kepapipetoi amephik, api athok, mate jat asok-asang adan setame pipedet nangji, lapen drakha ahorlang tame dungdedet nangji.

¹⁰Ningkan isi pen ephong pap aphan karkli api dovan anu hongphli along kehipen ajok Aaron dovan kepangthir nangji aron akam klempo. Laso akam ke aningkan-vangta kevangji arni anta klem nangji. Laso adovan ke ingthir pame nangji lapen Ne, HEMPHU aphan hodaidet nangji.

¹¹Moses aphan HEMPHU pulo,

¹²“Nang Israel arat aphai ke-en ahut abangphutin ta akai achethe aphan nephan anam nepi nangji, anke aphai ke-en ahut halabangso amonit aphuthak thangnat akevir ta vangvelo.

¹³Abangphutin amen kechethap abang akenang atangka pi nangji, alin ta chakri alin atengthot pi nangji. Abangphutin ta lake nephan isi athok pura nepivek nangji.

¹⁴Abangphutin aphai amen lakhapet nangji, ningkan ingkoi mate ongmuchot arta kedo apinso atum nephan laso atangka nepinangji.

¹⁵Keplang atum ta Nepi-o nangne, lapen keduk atum ta Nepichom nangne, latum jongsi halatum akai achethe apharman laso atangka Nepilote.

¹⁶Laso atangka Israel arat penle rungnon, lapen laso atangka Ne kedo a-pehem akenang aphanle khorotnon. Laso amidu ke halatum achethe anamlo, lapen Ne latum aphan keraijisi chemathapo.”

¹⁷Moses aphan HEMPHU pulo,

¹⁸“Tam aklong kedo tam aphumang isi selamnon. La pehem lapen dovan angbongle binon, lapen la along lang binon.

¹⁹Aaron lapen la asomar atum ari akeng kechingroiji aphan laso alang enpo,

²⁰latum Pehem mate an athok kepijile dovan adung kedam aphrang chingroi nangpo. Anke latum aphan pathilot-lelo.

²¹Latum ari lapen akeng chingroi nangji, ansi latum thithelo. Latum lapen latum aso-asu atum kaiketa ketalon nangji aron lahei helo.”

²²Moses aphan HEMPHU pulo,

²³“Akemenei amosola hijung aphik alang linthrok, theng keching kedokjok lin thom, nok kedokjok lin thom,

²⁴lapen long arvo lin throk (kadokaveta chakri alin atengthot). Lin phli ajit ajangthu batdun non,

²⁵lapen isi kepatip ajangthu kangthir selamnon, jangthu nempru ason pangvuidun non.

²⁶La Ne kedo a-pehem, kechechak a-Sinduk,

²⁷tebul kedo-an ajohton, melur archok lapen la ajohton kedo-an, methek kethor-iji adovan,

²⁸kephrin athok adovan, lapen la ajohton kedo-an, kecharsam aphumang lapen la aklong aden kepatipji ke-enji aphanlo.

²⁹Lahei lasonle hodainon, anke lahei ingthirpamepo, lapen la kangthir ajakong pen ajok badutame, hormu tame la kepapho aling abangphan phangnopo.

³⁰Anke Aaron lapen la asomar atum aphan patipnon, lapen latum nekam along kurusar keklemjile kam batnon.

³¹Israel arat aphan punon, ‘Laso kepatip ajangthu kangthir ke Ne kam along kevangji arni an seta ke-enji aphanlo.

³²Lake jung-jung amonit aphuthak dung nangne lapen lasonthot kepangvui aron nang klemver nangne. Lake ingthir-et lapen nangmethang ta la ingthir-et pusi matha nangji.

³³Badutame lasonthot selamlote mate kurusar kalipin aphan la en lote la Ne rat aso angbong inut-lo pu Ne lakha khelo.’”

³⁴Moses aphan HEMPHU pulo, “Kedokjok amosola ardi pupu chingbarchit en-non, hijung aphik ajangthu, nemprujin achopi, hijung, amehi kelok ahijung-heihei en-non.

³⁵Mephik kepaplangjile lahei ennon, pangvuira panemprujin non. La aju kavepinji aphan lapen kangthir-etji aphan ingti jokdunnon.

³⁶La kemenei aduk keplangjile ephar ke paduk-inon, lapen Ne kedo a-pehem arlo la ponra kechejok a-Sinduk athengno arsinon. Laso amephik lake ingthir pame pusi matha nangpo.

³⁷Mephik kepaplangji aphan lasonthot keselam aron pen nangtum methang aphan cheselamri. Lake Nephan kehodaitang ingthir-et amarlo pusi nangtum matha nangji.

³⁸Kenemprujinji aphan mane jongsi lasonthot selamlo pulote, halabangso abang Ne rat aso atum angbong pen inut-lo pu Ne lakha khelo.”