Read Karbi KEBAR 31 Bible Online

KEBAR 31 - Karbi bible

KEBAR 31

¹Moses aphan HEMPHU pulo,

²“Uri asopo lapen Hur asupo Bezalel aphan Judah akhei angbong pen Ne ingvaitang-lo,

³lapen alangliphan nejakong pen paplengset-lo. La aphan Ne kechiniji ajakong, kam asai lapen keklem nangji asontin akam keklem-un ajakong pitang-lo,

⁴athema mang pame asai arjan lapen lahei ser, rup, lapen tam akam klem nangji;

⁵athema arlong abor-heihei ingtipsi thon nangji; thengpi kehongji aphan; lapen asontin asai akam keklemji aphanlo.

⁶Dan akhei pen Ahisamakh asopo Oholiab, alangli pen kam keklem rap-rapji aphan Ne ingvai tang-lo. Lapen Ne akaprek asai kethek ahemai atum aphan seta kam keklemthek ajakong pitang-lo, anke latum Ne hukum kepi ateng pen keklem nangji ason an klemthekpo;

⁷Ne kedo a-pehem, kechejok a-Sinduk lapen la adip, pehem aphan kenang an ajohton-heihei,

⁸tebul lapen la ajohton, aju kavepin aser amelur archok lapen kedo-an la ajohton, mephik kethor aphan adovan,

⁹kephrin athok aphan adovan lapen la ajohton-heihei, kecharsam aphumang lapen la aklong aden,

¹⁰Aaron lapen la asomar atum aphan ahir asang kedo kurusar ape-ari-heihei latum kurusar akam kangdukji aphan ke-en ape,

¹¹kepatip ajangthu, lapen kangthir adim aphan kedokjin angnim kepado amethek-heihei keselamji aphanlo. Lahei kedo-an keselam ahut, ne nangphan hukum nangkepi atengthot latum selam nangji”.

¹²Moses aphan HEMPHU hukum pilo,

¹³lapen Israel arat aphan paputoilo, “Sabbath, Ne kesang arni do-thak pamenon, pima Ne, HEMPHU si nemethang arat aso aphan pinchong-lo pu kepaklangji aphansi lake nangtum lapen Ne angbong kevangji arni anta isi angthek-lo.

¹⁴Kesang arni nangtum talonvek nangji, pima lake ingthir-et. Badutame la ketalonle abang bonta halabangso arni kam klembom pulote pathilotnon.

¹⁵Nangtum kam kecheklemji aphan nithrok long-lo, bonta throksi arni abang ke nephan kehodaitang isi kesang pame arnilo. Halabangso arni badutame kam keklem abangphan pathivek nangji.

¹⁶Israel arat atum laso arni talonvek nangji lake isi kechejok angthek asonlo.

¹⁷Lake Israel arat lapen Ne angbong kaike kedover angthek-lo, pima Ne, HEMPHU si sining lapen pirthe ni throk an pinchong-lo, lapen throksi arni Ne kam keklem ingtonsi sang-lo.”

¹⁸Sinai Anglong along Moses aphan HEMPHU keningje pajutsi, Alang Moses aphan Arnam amethang ketoktang ahukum-heihei kedo longpak plangni pilo.