Read Karbi KEBAR 32 Bible Online

KEBAR 32 - Karbi bible

KEBAR 32

¹Moses inglong pen nangkehir rat atum thek-longledet-lo bonta hadak kedo ajir pading-lo, latum Aaron adung chingrumsi alangliphan pulo, “Moses, etum aphan Ijip pen ekevan abang, kopitong cheplang-lone netum chinine; la apotsi netum aphan kepajajile arnam inut neselam pinon.”

²Kechingthang aser ajangsai-heihei chephloknon, lapen lahei nelong vannon.

³Lasi kadokave arat atum halatum aser ajangsai chephlok-lo lapen lahei Aaron along van-et-lo.

⁴Alangli jangsai-heihei enlo, lapen lahei pangjirlo, ser longle-inghan athak dung-lo, lapen ser achainong aloso ejon thip-lo. Rat atum pulo, “Israel, lahelo etum a-arnam, Ijip pen ekevan abang-lo!”

⁵Anke ser achainong angno isi adovan Aaron selampilo lapen pachethang-lo, “Penap HEMPHU aphan man kepijisi isi arong-aje doji.”

⁶Puthot adap latum kephrin athok kepijisi ajehak api vanlo, lapen ajehak ke kejelang athok kechoji aphan vanlo. Rat atum kecho-kejun amei along chongni phrong-lo, lahei kejun lapen pinso-arlo kechebam keche-en arong plang-lo.

⁷Moses aphan HEMPHU pulo, “Non amat chiruira arum hirdamnon, pima nang rat, nang Ijip pen kevan amonit atum pap klemtang-lo, lapen Nephan Nedengdetang-lo.

⁸Latum kopusonsi kedo nangjima Ne kepi ahukum latum che-o tang-lo; latum kepangjirtang aser pensi chainong aloso thip tang-lo, lapen la aphan archotang-lo, lapen la aphan athok-heihei pitang-lo. Latum chepulo, lahelo latum a-arnam, latum aphan Ijip pen kevan abang.

⁹Ne chini lahei amonit atum ko-an kechingkino arat-loma.

¹⁰Non, Nephan Nekhangri. Ne latum aphan Nening pung-lo, lapen Ne latum aphan pavirdetpo. Anke Ne nang lapen nangso-nangsu pen isi thedung akhei pinchongpo.”

¹¹Bonta Moses ke a-Arnam HEMPHU aphan choningrilo lapen pulo, HEMPHU, Nang methang ajakong-horang pen Nang rat aso aphan Ijip pen kepajoktang arat aphan kopisi lapu-an Nangning thi nangpo?

¹²Nang rat aso aphan Ijip pen vandet-lo lapen inglong along kepathijisi lapen latum aphan pavir pamelo pu Ijip atum nangpapu longset jilangma? Ningkethi ingtonnon; Nangning chelarra Nangrat aphuthak laso akevir vanrinon.

¹³Nangban Abraham, Isaak lapen Jakob aphan chemathatha. Latum aphan sining angsong achiklolongso an aso-asu pipo pu Nang kechak alam lapen halatum aso-asu atum aphan kepiji pu alongle latum kaike aphan chepahemphu longpo pu kechak alam Nang chematha damtha.

¹⁴Ansi HEMPHU ning chiruilo, lapen Alang kepaphere akevir arat aso aphuthak Alang vanvedet-lo.

¹⁵Moses inglong pen nanghirlo, longpak plangni along ketoktang ahukum a-arlong plangni nang-otdong-lo.

¹⁶Arnam amethangsi longpak selamlo, lapen lahei along hukum-heihei tok-lo.

¹⁷Rat atum kehangjo Joshua arjulong-lo, lapen Moses aphan pulo, “Ron kechedan arki mukam along ne arjulong-lo.”

¹⁸Moses thak-lo, “Lake ron kehai mate kerem ase kali; lake kelun-kekan arki.”

¹⁹Moses vangsi mukam an nangpatebok-lo, lapen chainong aloso lapen rat atum kekan thek-longsi alangli aning thihak-lo. Hadak inglong akeng-ri amat alangli kevan alongplang-heihei ingthuphunlo lapen lahei pangje-ilo.

²⁰Latum keselam achainong aloso alangli pondetsi pangjir-ilo, koi paduk-ilo, lapen lang along chingvui-et-lo. Anke Israel arat aphan alangli la pajuntoilo.

²¹Aaron aphan alangli pulo, “Nang latum aphan kepherememe apap kepaklemtoike laso arat atum nangphan kopilo nangkeklem?”

²²Aaron thak-lo, “Nephan nangning thiri; laso arat atum kehingno keklemji aphan ko-an mathathip-loma nang chini.

²³Latum nephan pulo, ‘Labangso amonit, Moses, Ijip pen ekevan abang kopi cheplangdet-loma netum chinine, lasi netum aphan nekepajajile inut arnam nethip pinon.’

²⁴Ne latum aphan latum kechingthang adorson nelong kevanji aphan pulo, lapen latum angbong kedo atum an chephloksi lahei nephan nepilo. lahei ne me pen pangjirsi la pen ajok laso achainong aloso nang klang-lo!”

²⁵Moses thek-long-lo, Aaronsi rat atum aphan pachonphrolo, lapen latum ahotur atum angno kangnekchoi akam paplang-lo.

²⁶Lasi alangli mukam anghap along arjapsi hangprak-lo, “HEMPHU abe abangphutin ladak an vangpetnon!” Lasi Levi aso kedo-an alangli dung chingrumlo,

²⁷lapen latum aphan alangli pulo, “Israel a-Arnam HEMPHU nangtum abangphutin nokjir kecheponji aphan lapen mukam soding laso anghap pen akaprek anghap an damsi nangkorte atum, nangjirpo atum lapen nangdung arei atum aphan kepathiji ahukum nangpitang-lo.”

²⁸Levi atum kroilo, lapen halabangso arni bang suri kethom anbak amonit atum aphan pathi-lo.

²⁹Levi atum aphan Moses pulo, “Pini nangtum nangmethang aphan nangsomar, lapen nangkorte atum aphan kepathi pen ajok HEMPHU akurusar akam aphan chepangthirtang-lo, lasi HEMPHU nangtum aphan Alang hirjume nangpitang-lo.”

³⁰Puthot arni rat aphan Moses pulo, “Nangtum isi kepherememe apap choklemtang-lo. Bonta ne non puthot inglong athak HEMPHU along arlu damthuji; nangtum apap kediya ne long tahaiji mene.”

³¹Moses puthot HEMPHU along chevoithulo, lapen pulo, “Laso arat atum isi kepherememe apap choklemtang-lo. Latum ser pen inut arnam thip-lo, lapen la aphan ardomkhrup-lo.

³²Kanghon pen halatum apap diyatha; nang jongsi un-e pulote nangrat atum amen nang ketok aloh along pen nemen paphreithip non.”

³³HEMPHU thak-lo, “Lake komatma nephan langplotsi pap keklem atum amensi Ne loh pen amen paphreidetpo.

³⁴Non damnon, Ne nangphan nangkethan adimle rat aphan japonnon. Chininon Ne pherangkesi nangtum aphan nangja ponpo, bonta lahei arat halatum apap-heihei apot aduk kepinangji apor nangletang-lo.”

³⁵Lasi rat atum aphuthak isi avur akeso HEMPHU toilo, pima latumsi Aaron aphan ser achainong aloso pathiptoilo.