Read Karbi KEBAR 33 Bible Online

KEBAR 33 - Karbi bible

KEBAR 33

¹Moses aphan HEMPHU pulo, “Nang lapen nang Ijip pen kevan arat kedo-an laso adim onon, lapen Abraham, Isaak, Jakob lapen latum aso-asu aphan Ne kepiji pu kechak alongle along damnon.

²Nangtum aphan kepajajisi Ne pherangke nangtoipo, lapen Nesi Kanaan aso, Amor aso, Hitti aso, Perizzi aso, Hivi aso lapen Jebusi aso atum aphan phlung-etpo.

³Nangtum isi keplang lapen ho-or kedo alongle alongsi dampo. Bonta Ne methang ke Ne nangtum along nangdundelo, pima nangtum ke isi kechingkino arat apot, Ne nangtum aphan tovar ebeng nangpavir-klung tahai.”

⁴Rat atum laso alam arjulongsi, latum chirulo lapen dorson chingthangthe det-lo.

⁵Athema rat atum aphan kepathanjisi Moses aphan HEMPHU hukumpilo, “Nangtum ke isi kechingkino arat, Ne jongsi malomso aphan seta nangtum along nangdun nangji pulote Ne nangtum aphan nangpavir-et tahaipo. Non lasi nangtum adorson-heihei an chephloknon lapen nangtum aphan Ne kopisi klempoma Ne nangpharpo.”

⁶Lasi latum Sinai Anglong odet aphi, Israel arat atum dorson chingthang thedet-lo.

⁷Israel arat atum mukam kekim ahuttin, Moses-si kangthir a-pehem ponpo, lapen mukam pen chehelomuchot adimsi la parjappo. Lake HEMPHU kedo a-pehem pulo, lapen mane jongsi HEMPHU aphan karjujido pulote barsi la along dampo.

⁸Hadak Moses kedam ahuttin, rat atum amethang apehem anghap along charjap reppo lapen Moses la arlo lut-letik an langdunlorpo.

⁹Moses arlo lutdet aphi, inghun anujok nangsunpo, lapen pehem anghap along sakokpo lapen Moses aphan HEMPHU inghun pen ningjepo.

¹⁰Inghun anujok pehem anghap along kesa rat atum kethek-long pen latum ingkupdi dapo.

¹¹Moses pen HEMPHU chepangnolorsi chingkipo, inut amonit le ajirpo pen kechingki ason chingkipo. Anke mukam along Moses chevoilo. Bonta la aphan kerap abang riso amonit, Nun asopo Joshua abang pehem arlosi dobomlang.

¹²HEMPHU aphan Moses pulo, “Halaso adet lahei arat aphan kejapon nangji pu nang nephan nekethan alam lake ahok-lo, bonta netum along komatsi nangdun poma nang nephan nethanthelang. Nang pulo nang nephan chini pame lapen nephan nangning dok-olo.

¹³Non nang jongsi lapulo pulote nang keklemji akam nethannon, anke ne nangphan nang ingduk bompo lapen nangning nangpadok-longbompo. Laso akhei aphan nangmethang arat pusi nang chongvailo la chemathatha.”

¹⁴HEMPHU pulo, “Ne nanglong nangdunpo, lapen ne nangphan pahaithorpo.”

¹⁵Moses thak-lo, “Nang jongsi netum along nangdunde pulote, laso adim netum aphan nepa-o longrinon.

¹⁶Nang jongsi netum along nangdunde pulote nang rat aso aphan lapen nephan ning ingsamlo pu kosonsi netum nangphan chinipo? Nang netum along nangdodunsi netum lapen pirthe athak kedo akaprek akhei atum pen paprekdakpo.”

¹⁷Moses aphan HEMPHU pulo, “Nang kehang atengthotsi Ne klempo, pima Ne nangphan nangchini pame, lapen Ne nangphan nening nang ingsam-o.”

¹⁸Anke Moses choningrilo, “Kanghon pen nang kedo keturbong akethe-ang nephan nepathek-longtha.”

¹⁹HEMPHU thak-lo, “Nehir asang kedo-an nangphrang padampo lapen nang ingno Ne men kangthir nangthanpo, Ne kangvaitang atum aphan Ne kangjinso paklang lapen kanghon paklangpo.

²⁰Nangphan Ne Nemahang nang paklangklelo, pima baduta nephan thek-long pen reng un-e.

²¹Bonta ladak adung isi adim do hadaksi nang arlong athak arjap unji.

²²Ne kedo keturbong akethe-ang kedam ahut, Ne parpetik arlong angkep along Neri pen Ne nang mahang nangdip thippo.

²³Anke Ne Neri che-enpo lapen nang nenungsi thek-longpo, bonta Ne mahang kali.”