Read Karbi KEBAR 34 Bible Online

KEBAR 34 - Karbi bible

KEBAR 34

¹Moses aphan HEMPHU pulo, “Aphrang asonthot arlong plangni soinon, lapen aphrang nang kephangno alongplang along ketok asonthot Ne lahei along tokpo.

²Penap adap chesik pamenon, hadak Sinai Anglong aphuchong along nephan nekechetong-jile arludamnon;

³Nanglong baduta nang padunlong-ri; nahok anatta inglong along baduta thek-longledet nangji; lapen inglong akeng-ri biresak lapen chainong ejonnatta pachopan longledet nangji.”

⁴Lasi Moses longplang hini soilo lapen HEMPHU hukum kepi atengsi adapprang alangli lahei ponsi Sinai Anglong arludamlo.

⁵Inghun pen HEMPHU nangsunlo, hadak Alang pen arjaptherlo lapen Alang men kangthir HEMPHU pu pachethang-lo.

⁶Anke alangli ingno HEMPHU damlo, lapen hang-lo, “Ne, HEMPHU ke inut Arnamlo, kangjinso pensi plengset lapen kanghon thepik, aning kethidap abang kali, lapen kanghon kethe lapen kekroi-thirklong kepaklang a-Arnamlo.

⁷Ne suri suri a-ove anta Ne kechechak chebi lapen kehingno lapen pap ta diya, bonta apo-apei apap-heihei apot asomar lapen asumar aphuthak ove-kethom lapen ove phli anta aduk kepiji aphan tengnene.”

⁸Seraksi Moses longle tongkilo, lapen ardomkhrup-lo.

⁹Alangli pulo, “HEMPHU, Nang jongsi nephan ning ingsamlo pulote, Nang netum along nangkedunji aphansi choningrilo. Lahei arat atum ke chingkino-o, bonta netum kehingno lapen apap apot diyatha, lapen netum aphan nangrat aso pura nedengtha.”

¹⁰Moses aphan HEMPHU pulo, “Non Ne Israel arat atum pen isi kechejok aloh pathik-lo. Halatum angno thedung akam-heihei aphrang pen avepinlang lapen pirthe adang akaprek akhei atum angbong lapuson klemkle pinlang akam Ne klemji. Ne HEMPHU kopi akethedung akamsi keklempoma kadokave arat atum anta thek-long phrongpo, pima Ne nangtum aphan isi manghumeme akam klempo.

¹¹Pini Ne nangtum aphan nangkepi aron-heihei nangtum kroinon, Ne Amor atum, Kanaan atum, Hitti atum, Perizzi atum, Hivi atum lapen Jebusi atum aphan nangtum dambom ahut phlung-etpo.

¹²Nangtum kedambom adet amonit atum pen nangtum kechejok alam chepathik-ri, pima lake nangtum aphan isi kepherememe ason cheplangpo.

¹³La alar latum adovan-heihei ingsek-etnon, halatum kangthir archok pavir-etnon, halatum a-arnampi, Asherah angthek-heihei chor-etnon.”

¹⁴Akaprek arnam aphan ardomri, pima Ne, HEMPHU ne hotur aphan langding un-e.

¹⁵Badu adet penta kechejok aloh chepathik-ri, pima latum amethang ahok-he arnam aphan kechardom ahut lapen lahei aphan athok kepi ahut, halatum along kejelang dunji aphan nangtum aphan latum nangphapo, lapen halatum a-arnam atum aphan kepajir a-an nangtum chodun ingtungdukpo.

¹⁶Halabangso adet a-arloso atum aphan nangsomar atum chepangri tahai, latum Nephan kekroithipthe anat si japonpo lapen halatum ahok-he a-arnam-heihei aphan pardompo.

¹⁷Ingchin pen arnam-heihei thip-ri lapen archori.

¹⁸“Thap kave ahim arong-aje talon bomnon. Ne nangtum aphan hukum nangkepi asonthot, thapkave ahim ni throksi Abib mate There-Jangmi achiklo ahut chonon, pima halaso achiklosi nangtum Ijip olo.”

¹⁹Sopinso akleng lapen pi aso kechingthok-cheng aso ke nepharman,

²⁰bonta gadha aso kechingthok-cheng aso ke la alar nangtum biresak aloso pen la namdet nangji. Jongsi nangtum namdetde pulote la achethok ingdisutnon. So pinso akleng an namdet nangji. “Nelong baduta dan vanvepin pen vang-ri.”

²¹“Nangtum akam kecheklemji aphan nangtum nithrok dolo, bonta throksi arni ke nangtum kam klemri, hai kebai ahut seta lapen sok kerot ahut seta klemri.”

²²Nangtum asok kerotcheng ahut kerot-kerim Arong-aje talon nangji, lapen nangtum thesere kepangrum ahut, chungphang-ok esek ahut kechepachong Arong-aje talon nangji.

²³Ne, HEMPHU, Israel a-Arnam aphan ningkan isi angbong batai kethom pinso amonit kedo-an atum nekarchojisi nelong vang nangji.

²⁴Nangtum angno khei kedo-an aphan Ne kephlung-et aphi lapen nangtum ahoi nang pakampidet aphi baduta la kethom arong-aje ahut nangtum aphan nangtengkheng un-elo.

²⁵Nangtum Nephan pi athok nekepi ahut thap pen kepangvui ahim nepiri, laso akarkli ahut kepathi api a-ok puthot adap an la birinon.

²⁶“Aningkan-vangta kerotcheng asok HEMPHU ahem along van-nangji. ‘Biresak mate bi aso a-ok api amok-lang pen tunri.’ ”

²⁷Moses aphan HEMPHU pulo, “Lahei alam tokjirnon, pima lahei alam paklongsi Ne nang pen lapen Israel atum kechejok aloh pathik-lo.”

²⁸Hadak Moses ke HEMPHU pen jophlikep-niphlikep choche-junjesi dolo. Alangli longplang-heihei along kechejok alam-heihei tok-lo, lake hukum kep-lo.

²⁹Sinai anglong pen Moses nanghirsi hukum kep kevan ahut, alangli mahang turbong-lo, pima alangli HEMPHU pen kechingkibom apot; bonta alangli la chechinine det-lo.

³⁰Aaron lapen rat kedo-an atum Moses aphansi langphrong-lo, lapen alangli mahang turbong thek-long-lo, lapen latum alanglidung kepatebokji haihedet-lo.

³¹Bonta latum aphan Moses hang-lo, Aaron lapen rat ajalin kedo-an atum alanglidung damlo, lapen latum aphan Moses thanlo.

³²Laso aphi, Israel arat kedo-an atum alanglidung chingrumpet-lo, lapen Sinai Anglong along Moses aphan HEMPHU kepi aron-heihei an latum aphan alangli pilo.

³³Latum aphan Moses kethan pajutsi alangli aphang kechekurki ape pen amahang chedipthip-lo.

³⁴HEMPHU kedo a-pehem arlo Moses HEMPHU pen kechingkijile kelutdam ahut alangli chekurki ape chephlok-lo. Alangli nangkebar ahut, alangli Israel arat aphan HEMPHU kepathantoiji alam an thanlo,

³⁵lapen alangli mahang keturbong halatum thek-long-lo. Anke alangli puthot HEMPHU aphan kechingkijisi puthot aphong damdetik an pe pen alangli amahang chedip-lo.