Read Karbi KEBAR 36 Bible Online

KEBAR 36 - Karbi bible

KEBAR 36

¹Bezalel, Oholiab lapen akaprek ahemai atum an aphan HEMPHU si keklemthek asai lapen akechini nangpitang-lo, nangtum pehem kangthir kekim nangji akam an lapen HEMPHU hukum nangkepi ateng pen kam keklemji chinilo.

²Bezalel, Oholiab lapen kedo-an ahemai HEMPHU kam keklem ajakong kepi an atum lapen kam kerapdunji aning kehang atum an aphan Moses hang-lo, lapen latum aphan kam kepangchengji aphan Moses thanlo.

³Pehem kangthir kekimji aphan Israel aso atum kevan adan-heihei an alangli pen latum enlo. Bonta adapvang Israel atum Moses along dan-heihei vanbomlang.

⁴Anke kam keklem asai kethek kam keklembom amonit atum damsi Moses aphan thanpachinilo,

⁵“HEMPHU hukum kepi keklem nangji akam aphan akehang an sose rat atum vanbomlang.”

⁶Lasi Moses mukam soding isi ahukum pilo, Pehem kangthir aphan baduta chirung-cherek van nangnelo; anke rat atum vanvedet-lo.

⁷Kadokave akam kepaplengdetji aphan kevantang anta dorphlup-lo.

⁸Kam keklembom atum angbong pen asai ketheknei amonit atumsi HEMPHU kedo a-pehem kimlo. Latum akelu, hepi arong lapen ake-ersip a-ul ape-kanglit pak-kep pen patangdet-lo, lapen arveng kedo api arjan-heihei roidunlo.

⁹Apaktinta kethe chingbarchit, keding ingrup ingkoira phli lapen arpan ingrup phli.

¹⁰Latum pakpho roi pacheropsi ebeng selamlo, lapen akaprek pak phota lasonthotsi selamlo.

¹¹Latum kebeng ape angchun lutu arong ape pen avaikang apaktin alongta selamlo.

¹²Kechengsi abeng ape along latum avaikang phokep selamlo lapen hini apak kejutsi aphan akung along halahei chingdenchit avaikang phokep selamlo.

¹³Latum ser avek phokep selamlo, lahei pen ajok bengni ape pacherappetsi epak pinchong unlo.

¹⁴Latum bi angmi pen keselam ape pak kre isi pen pehem kedipji aphan selamlo.

¹⁵Latum la kadokaveta apak kethe pachingbarchit, keding ingrup ingkoira throk lapen arpan ingrup phli.

¹⁶Latum pakpho roisi ebeng selamlo, lapen akaprek pak throk roisi ebeng selamlo.

¹⁷Kejutsi apak akung along latum avaikang phokep selamlo lapen avaikang phokep lake abeng kaprek along selamlo.

¹⁸Latum la bengni ape kepacheropji aphan tam avek phokep selamlo, anke lahei epaknat ape kecheplangji aphanlo.

¹⁹Latum hini abeng selamthulo, isi abang ke biresak areng rong ke-er pilo lapen akaprek abang ke ok-reng keme pen lahei athak kebeng aden aphan enlo.

²⁰Pehem aphan latum mirjove athengpi pen kekengset ahop selamlo.

²¹Ahoptinta ajon keding ingrup nerkep lapen arpan kethe ingrup isira echak,

²²Hini apengdang pachingbarchit lote ahop-heihei pachechulongpo. Kadokave ahopta lahei apengdang do.

²³Nitur anat aphan latum hop ingkoi selamlo,

²⁴lapen lahei aber keden aphan rup aden phlikep selamlo, hini apengdang kepachechuji aphan ahoptin along hini aden enlo.

²⁵Pehem nirep anat aphan latum hop ingkoi selamlo,

²⁶lapen rup aden phlikep selamlo, ahoptin along hini aden enpo.

²⁷Pehem anung anat nichi aphan latum hop throk selamlo,

²⁸lapen kechetok adim aphan hopni selamlo.

²⁹Lahei kechechu ahop ke aklong anat aden pen pachechulok lapen angchunta chechulok. Hopni kechechu longnita lasonsi selamlo.

³⁰Lasonsi hop nerkep lapen rup aden krethrok dolo, ahoptin aphan hini aden bilo.

³¹Latum mirjove athengpi pen hongkrepho arpan selamlo, pehem ehin anat ahop aphan pho selamlo,

³²ahin kaprek anat aphan pho selamlo lake nichi anat kejut anung anat-lo.

³³Angbong arpan, angsong ahop ebeng an pehem ehin pen ahin kaprek anat an.

³⁴Latum ser pen ahop-heihei top-lo, lapen arpan-heihei pen kepacherapjisi ser arnan-heihei pen pacherap-lok-lo, arpan anta ser pensi top-lo.

³⁵Latum kebeng aphan pe-kanglit akelu, hepi arong lapen ake-ersip a-ul ape selamlo, lapen avengkong kedo api-heihei arjan roidunlo.

³⁶Kebeng ape kevekji aphan latum mirjove athengpi anujok hongphli selamlo, lapen lahei ser top dunlo, lapen lahei ser avek along pavurlok-lo. Anke nujok-heihei keparchakjisi latum rup aden phli selamlo.

³⁷Pehem ajakan aphan latum pe-kanglit akelu, hepi arong lapen ake-ersip a-ul ape pen kebeng ape selamlo, lapen roidunsi alon pilo.

³⁸Laso kebeng ape aphan latum nujok hongpho avek pen pachevek-lo, halahei athak lapen apanpo ta ser pen top-lo, lapen nujok-heihei aphan tam aklong aden pho selamlo.