Read Karbi KEBAR 37 Bible Online

KEBAR 37 - Karbi bible

KEBAR 37

¹Mirjove athengpi pen Bezalel kechejok a-Sinduk selamlo, keding ingrup hinira echak, arpan ingrup isira echak lapen kangtui ingrup isira echak.

²Alangli la aju-kavepin aser pen arlo-ingtanta top-lo, lapen la akung-kung ser apanpo topdunlo.

³Alangli la aphan ser arnan avaikang hongphli selamlo, lapen lahei akeng hongphli along pabonlok-lo, pupu ahintinta arnan avaikang hini-ni bilo.

⁴Alangli mirjove athengpi pen kecharchong pon abarlon selamlo, lahei ta ser pensi topthip-lo;

⁵lapen Sinduk pupu ahintinta arnan angkok arlo barlon kroirep-lo.

⁶Aju-kavepin aser pen alangli la adip selamlo, keding ingrup hinira echak lapen arpan ingrup isira echak.

⁷Alangli jonni arveng kedo api ser pen thip-lo,

⁸adip angchuntin along. La isivet adip kecheplangji aphansi alangli lapuson selamlo.

⁹Adip soding arveng kedo api pupu chepangno-phrongsi dolo, lapen latum kechepur a-arveng la dip-lo.

¹⁰Mirjove athengpi pen alangli tebul selamlo, keding ingrup hini, lapen arpan ingrup isi lapen kangtui ingrup isira echak.

¹¹La alangli aju-kavepin aser pensi top-lo, lapen la komchen ser apanpo top-lo.

¹²Alangli isi adang selamlo arpan chemun phli lapen la komchen ser apanpo bilo.

¹³Alangli la kepon-i aphan ser arnan avaikang hongphli selamlo lapen lahei akeng kedo along atok-phli along pabonlo.

¹⁴Tebul keponji aphan abarlon-heihei kekroi a-arnan-heihei ke adang adungsi bilo.

¹⁵Alangli mirjove athengpi pen barlon-heihei selamlo, lapen lahei ser pensi top-lo.

¹⁶Tebul aphan alangli aju-kavepin aser pen kasu-heihei selamlo: kasuso, harlungso, langbong, lapen harlung-heihei drakha ahorlang kedungji aphan selamlo.

¹⁷Aju-kavepin aser pen alangli melur archok selamlo. Alangli la akeng-ri lapen anujok ser pensi thip-lo; la alon kepi amir apu-heihei, ahu lapen aphar isinat ateng alangli thip-lo.

¹⁸La ehin pen rothrok padamlo, ahintin pen kethom.

¹⁹Ro throk asitinta ahongtin arje ke badam angphar nangnak puthom alon kedo apu lapen apharta dolo.

²⁰Melur archok aharlung ke badam angphar alon kepi ason ahu lapen apharta do.

²¹Chorthom aro aber mir apu dolo.

²²Apu-heihei, aro-heihei lapen melur archok anta isinat kebu pen kethengtang aser angkleng-lo.

²³Melur archok aphan alangli melur throksi selamlo, lapen la kangtip-i anapit lapen methek aharlung aju-kavepin aser pensi alangli selamlo.

²⁴Alangli melur archok lapen akaprek ajohton keselamji aphan lin thomkep-ra pho aser enlo.

²⁵Methek aphan alangli mirjove athengpi pen dovan selamlo. La lepphli do, keding ingrup isi, arpan ingrup isi lapen la kangtui ingrup hini. La anu angkleng isinat atok-phli along pacherap-lo.

²⁶La thak atok-phlita alangli dip-lo, lapen la anu aju-kavepin aser pensi top-lo, lapen la komchen ser apanpo bilo.

²⁷La kepon-i kekroi aser arnan avaikang hini alangli selamlo, lapen lahei lepni ahin anat aberchot homlo, lasi la kepon ahut abarlon-heihei ot-thippo.

²⁸Mirjove athengpi pensi alangli la abarlon-heihei selamlo lapen ser pen lahei dip-lo.

²⁹Alangli kepatip ajangthu kangthir selamlo lapen mesen kedokjok angnim amephik, kepangvui ajangthu nemphru ason selamlo.