Read Karbi KEBAR 39 Bible Online

KEBAR 39 - Karbi bible

KEBAR 39

¹Akelu, hepi arong lapen ersip ahon pen latum kurusar atum aphan kelangmeme ape kangthir adim kangdukji ahut kechingthang pon nangji ape latum selampilo. Moses aphan HEMPHU hukum kepitang atengsi latum Aaron aphan kurusar ape roipilo.

²Latum lutu, hepi arong, lapen ersip ahon kanglit ape lapen ser ahon pen choi selampilo.

³Latum ser aplang thengsi pang-arveng pen paplang-lo, lapen rotsi arriso selamlo lapen lutu, hepi arong lapen ersip ahon pharlem kanglit adak adak kejordunji aphan klemlo.

⁴Latum choi aphan aphang arri hini pupu angchun pacherap-het-lo.

⁵Kepadusi latum la isipet ahormu pensi phamri semarlo, laso aphamri choi along pacherap-hetsi isipet cheplang-lo, la Moses aphan HEMPHU hukum kepi ateng-lo.

⁶Latum karnelia arlong abor sik-lo, lapen kepharlem aser angbong pangnilo; lahei Jokob asopo bang krehini amen tok det-lo.

⁷Latum lahei kepangni ke Israel khei krehini amensi pabonlo, lake Moses aphan HEMPHU hukum kepi ateng-lo.

⁸Latum isinat choi keselam amar pen ning aden selamlo, lapen isinat akeroita padolo.

⁹La atok-phli lapen duphlup, keding echak lapen arpan ta echak.

¹⁰Latum ador keso a-arlong renphli la athak pangnilo: Kechengsi aren latum kepangni ke rubi, topaz lapen garnet;

¹¹renni along ke emerald, saphire lapen bor arlong mate hira;

¹²kethom aren ke turquoise, agate lapen amethist;

¹³lapen phli aren ke beryl, karnelia lapen jasper a-arlong abor-heihei pangnilo. Lahei kepharlem aser angbongsi pangnilo.

¹⁴Arlong krehini asitin along Jakob asopo inut nut amen tok-lo, lahei Israel khei krehini atum amen pabonlo.

¹⁵Ning aden aphan latum aju-kavepin aser pensi arri pharlemlo, arri chardon selamlo, lapen arnan hini ke ning aden athak atok along pacherap-lok-lo.

¹⁶Anke latum kepharlem aser alek eplang pachorlo, lapen ser arnan hongni pachorlo, lapen ning arjan ajep ano hini la arnan thip-lo.

¹⁷Latum la ser arnan hongni along ser arri kepharlem hini pacherap-lok-lo,

¹⁸lapen plangni along ahin kaprek hini arri pen pacherap-lok-lo, lapen lasonsi lahei choi aphang arri athengno along pacherap-lo.

¹⁹Latum ser arnan hongni selamsi ning aden aber lahei pacherap-lo, choi adung arlo angchun athak along.

²⁰Latum puthot ser arnan hongni selamthusi lahei choi aphang akung angno aberchot adim pacherap-lo, lake sanglang patini akam adung lapen kethak pame avamkok athakchot.

²¹Moses aphan HEMPHU hukum kepi asonthotsi, latum akelu arri pen choi along kedo a-arnan-heihei pen ning aden along a-arnan-heihei pacherap-lo, anke ning aden vamkok athak dopo lapen la haidukdelo.

²²Choi lapen la aber kephung kechepindeng ape ke lutu a-ul ahon pensi thak-lo.

²³La achethok angkang akung ke rak-redetji aphan kethak ape pen kebeng pacherop-lo, anke chingsek un-elo.

²⁴Latum keche-um ape aber lutu, hepi arong, ersip a-ul lapen hon pharlem pen dalim arjan amang turlo.

²⁵Latum aju-kavepin aser pen porphaiso selamsi keche-um ape aber amang komchen adalim angbong bilo.

²⁶Porphaiso isi lapen dalim ethe, porphai lapen dalim athe lasonsi la keche-um ape aber amang pakomchenlo. Lake kangdukji aphanlo, HEMPHU Moses aphan hukum kepi ateng-lo.

²⁷Latum Aaron lapen la asopo atum aphan choi selampilo,

²⁸lapen apoho, aphutup-heihei, pe-kanglit apelu,

²⁹lapen pen-beng-long aphan lutu, hepi arong lapen ersip ahon pharlem pen selamlo, lapen Moses aphan HEMPHU hukum kepi asonthotsi amang roi dun pen alon pilo.

³⁰Latum kechingthang adorson selamsi HEMPHU aphan isi kepanong angthek aju-kavepin aser aplang along, “HEMPHU aphan kehodaitang” pu tok-ang-lo.

³¹La latum poho athengno akelu arri pen kok-hetsi Moses aphan HEMPHU hukum kepi ateng klemlo.

³²HEMPHU kedo a-pehem akam an keklem papleng-lo. Moses aphan HEMPHU hukum kepi atengsi Israel atum kam keklem pajut-lo.

³³Latum Moses along pehem lapen la ajohton an, la avek, la ahop, la arpan, la anujok lapen la aden-heihei van-et-lo;

³⁴kedip aphan biresak areng rong kepitang, ok-rengkeme adip, kebeng ape;

³⁵longplang hini kedo Kechejok a-Sinduk, la abarlon-heihei, lapen la adip;

³⁶tebul, lapen la ajohton an lapen Arnam aphan kepi ahim;

³⁷aju-kavepin aser amelur archok, la amelur-heihei, la ajohton kedo-an lapen melur-heihei aphan ajangthu;

³⁸ser adovan; kepatip ajangthu; kedokjok angnim amethek; pehem aphan jakan kebeng ape;

³⁹tam adovan lapen tam apaivokak, la abarlon-heihei lapen la ajohton-heihei an; kecharsam aphumang lapen la aklong aden;

⁴⁰tikup aphan kebeng ape lapen la anujok-heihei lapen aklong aden-heihei; tikup ajakan aphan kebeng ape lapen la arri-heihei; pehem aphan akurdang-heihei; pehem aphan kenangji ajohton-heihei an,

⁴¹lapen kangthir adim along kurusar atum kechingthang nangji kelangmeme ape-ari, kurusar Aaron lapen la asopo atum aphan pe-ri kangthir anta van-et-lo.

⁴²Moses aphan HEMPHU hukum kepitang ateng pensi Israel atum kadokave akam klem patang-et-lo.

⁴³Asontinta Moses lang pamelo, lapen latum HEMPHU hukum kepi atengsi selamlo pu thek-long-lo. Lasi Moses lahei aputhak pahirjumelo.