Read Karbi KEBAR 4 Bible Online

KEBAR 4 - Karbi bible

KEBAR 4

¹Anke HEMPHU aphan Moses thak-lo, “Jongsi Israel atum nelam kroikre lapen ne kethan alam arjuje pulote, halatum Nang nephan nang cheklangkle pu ne pulote ne kopilo keklem nangpo?”

²La apotsi laphan HEMPHU arjulo, “Nang kopisi ke-otding-lo?” “Chin ehong” alangli thak-lo.

³HEMPHU pulo, “La longle athak varchornon.” Moses la longle athak varchor aphi la pherui cheplangdet-lo, lapen alangli la pen kat-lo.

⁴Anke Moses aphan HEMPHU pulo, “Ingkupdira la arme tumchek-ra humnon.” Lasi Moses ingkupdilo, lapen la nepchek-lo, lapen la puthot chin cheplangdet-lo.

⁵HEMPHU pulo, “Nangphan HEMPHU Arnam, nangphusar atum a-Arnam, Abraham, Isaak, lapen Jakob a-Arnam nangcheklang-lo pu Israel atum aphan aporman kepaklangjile la klemnon.”

⁶Moses aphan HEMPHU puthulo, “Nangchoi arlo nangri chebinon.” Moses kroilo; lapen la ari kechesan ahut, la keso cholong-lok-lo, herai asonsi, akelok angthek pen plengset-lo.

⁷Anke HEMPHU pulo, “Nangri puthot nangchoi arlo chebithunon.” Alangli la klemlo, lapen alangli la ingtan kechepon aphong ahut ke, la mesenlo, alangli bang akaprek areng asonthot-lo.

⁸HEMPHU pulo, “Latum jongsi nangphan nangkroikre mate kechengsi manghumeme angthek pen kroikre pulote, laso abang latum aphan pakroi-unpo.

⁹Jongsi la hini manghumeme pen ajok seta latum nangphan kroithekthelang pulote, lapen latum nang kopima kepu alam arjuje pulote, Nil Aroi pen ajehak alang ponnon lapen la longle athak dungnon, anke lang vi cheplangdetpo.”

¹⁰Bonta Moses pulo, “Kali, HEMPHU, neliphan netoirinon. Neli ke lam ningje thekthe, lapen Nang neliphan keningje cheng ahut pen non anta thekthelang. Neli ke lam ningje thekthe-o, inglenpik lapen chingtonrem.”

¹¹Alangliphan HEMPHU pulo, “Monit aphan angho komatsi kepilo? Komatsi ano pangthong-lo mate alam pavelo? Komatsi laphan amek kepilo mate amek kepavelo? Lake Ne, HEMPHU si klemlo.

¹²Non damnon, nang keningjeji Ne nangrapdunpo lapen nang kopisi keningje nangjima Nesi nangthan dunpo.”

¹³Bonta Moses thak-lo, “Kali, HEMPHU, kanghon pen anut kaprek aphanle toi non.”

¹⁴Hala amat Moses aphan HEMPHU aning thihak-lo lapen pulo, Nang ik Aaron, Levi aso kopusonlo? Ne chini la ningjethekser. Chenamsi la nangphan kechetongjisi vangbomlo lapen nangphan nangthek-lok pen chehokpo.

¹⁵Nang la aphan punon, lapen kopisi kepu nangjima thannon. Nangtum banghini keningje nangji Ne nangrap dunpo, lapen nangtum banghini kopisi keklem nangjima Ne nangthanpo.

¹⁶Alangli nanglar ningjepo, lapen nanglar rat atum aphan ningjepo. Anke nangli Arnam asonpo, laphan kopima keningje nangji thanpo.

¹⁷Laso achin nanglong cheponnon, pima la pen nang manghumeme akam-heihei klempo.

¹⁸Anke Moses ahupo Jethro along chevoilo, lapen alangliphan pulo, “Nelidon-nelirap atum aphan birta ke-ap damji le kanghon pen neliphan Ijip adet padam-longtha.” Jethro chedon dunlo, lapen alangliphan chepadidunlo.

¹⁹Moses ha Midian adet kedo-un ahutsi, alangliphan HEMPHU pulo, “Ijip adet chedamthunon, pima nangphan nangkepathiji amonit atum an thi-et-lo.”

²⁰Lasi Moses apiso lapen asopo atum aphan cheponlo, latum aphan gadha ejon athak pardonlo, lapen Ijip anat latum pen-pen barlo, Arnam alangliphan kepapontoi achin ta cheponlo.

²¹Puthot Moses aphan HEMPHU pulo, “Non nang Ijip adet puthot chevoilo, chininon, recho angno kedo-an manghumeme akam-heihei keklemji ajakong Ne nangkepitang klemveknon. Bonta Ne, recho aphan aning pangtangrakji, lapen la rat atum aphan padam longledetji.

²²Anke alangliphan nang thanveknon, HEMPHU si pulo, ‘Israel ke Neso akleng-lo,

²³Ne, Nesopo kepadamlongji aphan nangpulo, anke la Nephan Ne archopo, bonta nang kroimolo. Lasi non Ne nangso akleng aphan pathipo.’ ”

²⁴Kepamukam adim, Ijip atovar along, Moses aphan HEMPHU chetong-lo, lapen alangliphan kepathiji bor-ilo.

²⁵Anke alangli piso Zipporah kereset arlong ensi bangpi asopo achelek areng rotchetsi la pen Moses akengpak papholo lapen pulo, “Chenamsi nang ne-ok nevi apenanlo.”

²⁶Pima reng-rot ke-en aron pen ajok apot bangpi alangli aphan pulo, “Nang ke ne-ok nevi apenan lo” Lasonsi Moses achethe HEMPHU pajok-lo.

²⁷Halaso ahut amat Aaron aphan HEMPHU pulo, “Moses aphan kechetongjile kejejangtang ajo damnon; Lapen alangli la aphan kechetong ahut alangli ingjup-lo.

²⁸Anke Ijip adet kepachevoi ahut la aphan HEMPHU kethan alam athetin la Aaron aphan than-et-lo; Lapen la aphan HEMPHU hukum kepi kepaklemtoi manghumeme akam-heihei alamta alangliphan thanlo.

²⁹Lasi Moses lapen Aaron Ijip adet damlo lapen kadokave Israel ajalin atum aphan pangrumlo.

³⁰Moses aphan HEMPHU kethan an alam latum aphan Aaron than-et-lo, anke rat angno Moses kadokave manghumeme akam-heihei paklang-lo.

³¹Latum kroilo, lapen latum along kopusonsi HEMPHU vang-loma lapen latum aphan alangli kethek-long-lo pu alam arjulongsi latum angphun patongkisi archolo.”