Read Karbi KEBAR 40 Bible Online

KEBAR 40 - Karbi bible

KEBAR 40

¹Moses aphan HEMPHU pulo,

²“Kechengsi achiklo kecheng arni HEMPHU kedo a-Pehem parjaptang-lo.

³Hukum kep kedo Kechejok a-Sinduk la along binon lapen la angno kebeng ape binon.

⁴Tebul arlo vannon lapen la athak ajohton-heihei batnon. Melur archokta vannon, lapen la along melur batnon.

⁵Kechejok a-Sinduk athengno methek kethorji aphan ser adovan batnon, lapen pehem athengno kebeng ape veknon.

⁶Kephrin athok adovan pehem athengnole binon.

⁷Pehem lapen dovan angbongle kecharsam aphumang binon lapen la lang paplengsetnon.

⁸Komchen atikup parjap-ra la amangho along kebeng ape hingnon.”

⁹Kangthir ajangthu kepatip pen ajok pehem lapen la ajohton-heihei hodai detnon, lapen la ingthir-etpo.

¹⁰Adunthu, dovan lapen la ajohton-heihei an jangthu kepatip pen ajok hodainon, lapen la ingthir pamepo.

¹¹Lasonthot-le kecharsam aphumang lapen la aklong aden hodainon. Pehem amangho along Aaron lapen la asomar atum vannon, lapen latum aphan aron-atang alang kechinglujile thannon.

¹²Anke nangtum Aaron lapen asopomar atum aphan kechetong apehem jakan along van-nangpo, lapen latum aphan lang pen pachingroipo,

¹³Aaron aphan kurusar apindeng pachingthang non, lapen la aphan jangthu patipnon, lapen lasonle la aphan pangthirnon, anke la nephan kurusar akam ingduk thekpo.

¹⁴Asomar vanra latum achoi pangchoinon.

¹⁵Anke latum aphan jangthu patipnon, latum apo aphan nang kepatip ason, anke latum nephan kurusar akam ingduk-unpo. Laso akepatip lake latum aphan kevangji arni anta kurusar paplangverpo.

¹⁶HEMPHU hukum kepi asontinta Moses klem-et-lo.

¹⁷Lasi latum Ijip ke-o hini aningkan kecheng achiklo kechengsi arni, HEMPHU kedo a-pehem parjap-lo.

¹⁸La aklong-heihei Moses bilo, ahop parjap-lo la arpan-heihei pacherap-lo, lapen la anujok-heihei parjap-lo.

¹⁹Pehem ape la limlo, lapen la athak asarnungta limlo, la HEMPHU hukum kepi ateng-lo.

²⁰Anke alangli longplang hini ensi lahei Kechejok a-Sinduk arlo denlo.

²¹Anke alangli pehem arlo Sinduk bilo lapen kebeng ape hing-lo. Lasonsi Kechejok a-Sinduk kebeng ape pen binlo, la HEMPHU kepi ahukum ateng-lo.

²²Pehem arlo alangli tebul bilo, lake pekebeng angtan nirep anat,

²³lapen HEMPHU hukum kepi ateng la athak HEMPHU aphan kehodai ahim bat-lo.

²⁴Pehem arlo alangli melur archok bilo, lake tebul anung, nitur anat,

²⁵lapen hadak HEMPHU angno alangli melur keilo, HEMPHU hukum kepi ateng.

²⁶Pehem arlo alangli ser adovan bilo, lake kebeng ape athengnolo.

²⁷Lapen HEMPHU hukum kepi atengsi kedokjok amephik thorlo.

²⁸Pehem ajakan along alangli kebeng ape hing-lo,

²⁹lapen kebeng ape athengno kephrin athok lapen sok-sang adan aphan alangli dovan bilo, lake HEMPHU hukum kepi ateng-lo.

³⁰Pehem lapen dovan angbongsi alangli kecharsam aphumang bilo lapen la lang paplengset-lo.

³¹Moses, Aaron lapen asomar atum hadak ari-akeng chingroilo,

³²Latum pehem kelutdam mate dovan along kedam aphongtin HEMPHU hukum kepi ateng klemlo.

³³Pehem lapen dovan atikup soding komchen Moses parjap-lo, lapen tikup amangho along kebeng ape hing-lo. Lasonsi alangli kedo-an akam keklem patang-lo.

³⁴Anke pehem athak inghun bangthip-lo, lapen HEMPHU kedo keturbong akethe-ang pen paplengset-lo.

³⁵Laso apot, Moses ke pehem arlo lutdam un-edet-lo.

³⁶Inghun pehem pen chirungtang lote Israel atum along kaprek adim latum mukam cheterekpo.

³⁷Hadak inghun dotik ke latum amukam nahokta cheterek-redet-lo.

³⁸Kebar ahut latum Pehem athak HEMPHU kedo inghun angpong archok anerlo latum thek-longverlo, lapen ajo lote, angsong me anujok thek-longverlo.